ភ្នំពេញ ៖ អ្នកជំនាញមកពីប្រទេសជប៉ុន បានចែករំលែកបទពិសោធន៍ដល់មន្រ្តីជំនាញកំពង់ផែ កម្ពុជា ទាក់ទិននឹងនីតិវិធីផ្ទេរទំនិញ និងការដោះដូរទំនិញតាមប្រព័ន្ធអេឡិចត្រូនិច ។ សិក្ខាសាលាស្ដីពីវិស័យកំពង់ផែកម្ពុជា-ជប៉ុន ឆ្នាំ២០១៨នេះ រៀបចំឡើងដោយសមាគមសហប្រ​តិបត្តិការកំពង់ផែក្រៅប្រទេសជប៉ុន និងក្រសួងសាធារណការ និងដឹកជញ្ជូនកម្ពុជា ដោយមានការចូលរួមពីមន្រ្តីរដ្ឋាភិបាល សាកលវិទ្យាល័យ Open University of Japan ទីភ្នាក់ងារJICA ស្ថានទូតជប៉ុន និង ក្រុមហ៊ុនឯកជនមកពីប្រទេសជប៉ុន និងកម្ពុជា ប្រមាណជាង ១០០ នាក់ ។ បើតាមលោក ញ៉ែម សារវង្ស អគ្គនាយករងនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានអោយដឹងថា សិក្ខាសាលានេះ ផ្តោតសំខាន់ទៅលើការអភិវឌ្ឍកំពង់ផែស្វយ័តភ្នំពេញ លើនីតិវិធីទាក់ទងនឹងការផ្ទេរទំនិញនៅកំពង់ផែ និង ការដោះដូរទំនិញតាមប្រព័ន្ធអេឡិចត្រូនិច (Port EDI) ។ លោក អគ្គនាយករង បានលើកឡើងថា នេះជាផ្នែកមួយនៃកិច្ចសហប្រតិបត្តិការជប៉ុន ក្នុងវិស័យកំពង់ផែនៅកម្ពុជា តាមរយៈការផ្លាស់ប្តូរបច្ចេកទេសកំពង់ផែទ្វេភាគី សារសំខាន់ស្ដង់ដារបច្ចេក​ទេស និង ការថែទាំហេដ្ឋារចនាសម្ព័ន្ធកំពង់ផែ ។ លោកអគ្គនាយករង បានបញ្ជាក់ពីសារសំខាន់នៃការប្រើប្រាស់ធនធានសមាគមអតីតនិស្សិតរបស់ទីភ្នាក់ងារ JICA ដោយហេតុថា សមាគមនេះ ដើរតួយ៉ាងសំខាន់ក្នុងការអភិវឌ្ឍសមត្ថភាពគ្រប់គ្រងទំនិញ និង ពង្រឹងសមត្ថភាពគ្រប់គ្រង និងកិច្ចប្រតិបត្តិការនៃកំពង់ផែស្វយ័តភ្នំពេញ និងកំពង់ផែស្វ័យតក្រុងព្រះសីហនុ។ លោកអគ្គនាយករង បានបន្ថែមថាការយល់ដឹងពីគ្នាទៅវិញទៅមក និងការផ្លាស់ប្តូរទស្សនៈរវាងគ្នាក្នុងវិស័យកំពង់ផែនឹងរួមចំណែកយ៉ាងសំខាន់ក្នុងការអភិវឌ្ឍកំពង់ផែ និងសេដ្ឋកិច្ចនៃព្រះរាជាណាចក្រកម្ពុជា៕