[Property Area] - ដំណឹងល្អ! រដ្ឋាភិបាលនឹងចាប់ផ្តើមកែលម្អផ្លូវសំខាន់ៗនៅក្នុងប្រទេសកម្ពុជា
2018-11-01
Go to the website published Property Area
ភ្នំពេញ៖ រដ្ឋាភិបាលកម្ពុជានឹងចាប់ផ្តើមការងារត្រួតពិនិត្យ និងកែលម្អទៅលើគម្រោងផ្លូវថ្នល់សំខាន់ៗ រួមមានផ្លូវជាតិលេខ ១ និងផ្លូវជាតិលេខ៦ នៅក្នុងឆ្នាំ២០១៩ខាងមុខនេះ អោយកាន់តែល្អប្រសើរមួយកម្រិតថែត សម្រាប់ប្រជាពលរដ្ឋក្នុងការធ្វើដំណើរ និងដឺកជញ្ជូនទំនិញដើម្បីជម្រុញសេដ្ឋកិច្ចកាន់តែរីកចម្រើន។
លោកទេសរដ្ឋមន្ត្រី ស៊ុន ចាន់ថុលកាលពីម្សិលមិញបានធ្វើអធិបតីក្នុងពិធីចុះហត្ថលេខាលើអនុស្សរណៈនៃការយោគយល់ រវាងក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេស Korea Consultants International (KCI) សម្រាប់ការងារត្រួតពិនិត្យ និងគាំទ្រការអនុវត្តគម្រោង ដែលមានតម្លៃទឹកប្រាក់សរុបប្រមាណ ៣ ៣១៧ ៦៤០ ដុល្លារសហរដ្ឋអាមេរិក ដែលក្នុងនោះ៖ ក្រុមហ៊ុន KCI ទទួលបានទឹកប្រាក់ចំនួន២,៨៨៤,៩០៤ ដុល្លារសហរដ្ឋ អាមេរិក។
រាជរដ្ឋាភិបាលកម្ពុជាបានទទួលប្រាក់កម្ចីសម្បទាន ពីធនាគារអភិវឌ្ឍន៍អាស៊ីលេខ. ៣៥៧៦-CAM (COL) ចំនួន ៧០លានដុល្លារអាមេរិក ដើម្បីអនុវត្តគម្រោងកែលម្អ និងលើកកម្រិតបណ្ដាញផ្លូវជាតិលេខ១ ពីគីឡូម៉ែត្រ០៦៣+៣០០ ដល់គីឡូម៉ែត្រ ១៥៩+០០០ (អ្នកលឿង-បាវិត) និងផ្លូវជាតិលេខ៦ពីគីឡូម៉ែត្រ៣១៧+៦៣០ ដល់គីឡូម៉ែត្រ ៣៦៧-៥១២ (ក្រុងសៀមរាប-ក្រឡាញ់)មានប្រវែងសរុប១៤៥,៥៨គីឡូម៉ែត្រ ពីកម្រាលកៅស៊ូ DBST ទៅកម្រាលកៅស៊ូ AC ព្រមទាំងដាក់លូសងខាងផ្លូវដើម្បីរំដោះទឹកភ្លៀងផងដែរ។
គម្រោងនេះ គ្រោងចំណាយពេល៥៤ខែ ពោលគឺ រយៈពេលសាងសង់១៨ខែ និងថែទាំរយៈពេល៣៦ខែ ដោយចាប់ផ្ដើមអនុវត្តចាប់ពីខែមករា ឆ្នាំ២០១៩ ដល់ខែមិថុនា ឆ្នាំ2023។
គម្រោងកែលម្អបណ្តាញផ្លូវទាំងនេះ ក៏មានការស្ថាបនាមន្ទីរពិសោធន៍ចំនួន៤កន្លែង នៅខេត្តក្រចេះ កំពត សៀមរាប និងពោធិ៍សាត់ ដើម្បីបង្ករលក្ខណៈអោយក្រសួងសាធារណៈការ និងដឹកជញ្ជូន ធ្វើការត្រួតពិនិត្យបច្ចេកទេស ការស្ថាបនាផ្លូវថ្នល់អោយមានកាន់តែមានគុណភាព រឹងមុំាល្អ៕
