នៅព្រឹកថ្ងៃទី៩ ខែមិថុនា ឆ្នាំ២០២៣ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងដោយមានការអញ្ជើញចូលរួមដោយ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីបើកការដ្ឋានលើកកម្រិត ជួសជុល និងថែទាំផ្លូវខេត្តលេខ៣១២ ប្រវែងសរុប ២៨,៣៧២ គ.ម ចាប់ពីឃុំល្វា ត្រង់បំបែកផ្លូវជាតិលេខ១) ដល់បន្ទាយស្រី ស្រុកព្រះស្តេច ខេត្តព្រៃវែង (ព្រំប្រទល់កម្ពុជា-វៀតណាម) ក្រោមឥណទានសម្បទានរបស់ធនាគារអភិវឌ្ឍន៍អាស៊ី។ គម្រោងលើកកម្រិត ជួសជុល និងថែទាំផ្លូវខេត្តលេខ ៣១២ មានប្រវែង ២៨,៣៧២គីឡូម៉ែត្រ មានចំណុចចាប់ផ្តើមពី ភូមិសំរោង ឃុំល្វា (ត្រង់បំបែកផ្លូវជាតិលេខ១ គីឡូម៉ែត្រលេខ៧៧+០៨២) រហូតដល់ភូមិករគោ ឃុំបន្ទាយចក្រី(ព្រំប្រទល់កម្ពុជា-វៀតណាម) នៃភូមិសាស្ត្រស្រុកព្រះស្តេច ខេត្តព្រៃវែង។ គម្រោងនេះនឹងត្រូវ ស្ដារពង្រីកទទឹងតួផ្លូវដែលបច្ចុប្បន្នមានប្រវែងប្រមាណពី ៤ ទៅ ៥ម៉ែត្រ ទៅទទឹងតួផ្លូវ ប្រវែង ១២ម៉ែត្រ និងលើកកម្រិតគុណភាពពីប្រភេទផ្លូវក្រាលកៅស៊ូពីរស្រទាប់(DBST) ទៅជាប្រភេទ ផ្លូវក្រាលកៅស៊ូAC មានកម្រាស់ ៦សង់ទីម៉ែត្រ និង ៨សង់ទីម៉ែត្រ និងក្រាលបេតុងសរសៃដែក កម្រាស់ ២៥សង់ទីម៉ែត្រ ដែលមានទទឹងរួម ១១ម៉ែត្រ និងមានគន្លងសម្រាប់រថយន្ត និងគន្លង សម្រាប់ទោចក្រយានធ្វើចរាចរណ៍(២គន្លង ទៅ-មក)។ គម្រោងនេះក៏នឹងរួមបញ្ចូលនូវការដាក់ លូគ្រប់ប្រភេទនៅតាមបណ្ដោយផ្លូវ ព្រមទាំងការបំពាក់ស្លាកសញ្ញា គំនូសសញ្ញា បង្គោលគីឡូម៉ែត្រ និងបង្គោលសុវត្ថិភាពទៅតាមបទដ្ឋានបច្ចេកទេសផ្លូវថ្នល់ផងដែរ។ ផ្លូវខេត្តលេខ៣១២នេះ នឹងត្រូវអនុវត្តការសាងសង់ដោយក្រុមហ៊ុន ILSUNG-KR JOINT VENTURE ប្រើប្រាស់រយៈពេលសាងសង់ចំនួន ១៨ខែ និងរយៈពេលថែទាំចំនួន ៦០ខែ និង ប្រើប្រាស់ថវិកាដែលជាឥណទានសម្បទានរបស់ធនាគារអភិវឌ្ឍន៍អាស៊ី សរុបប្រមាណ២៤,៨៩លានដុល្លារអាមេរិក សម្រាប់ការ សាងសង់ ការបោសសម្អាតគ្រាប់មីនយុទ្ធភ័ណ្ឌមិនទាន់ផ្ទុះ និង ពន្ធអាករផ្សេងៗ រួមជាមួយនឹងថវិកាបដិភាគរបស់រាជរដ្ឋាភិបាលសម្រាប់ការដោះស្រាយផល ប៉ះពាល់ផងដែរ។ ផ្លូវខេត្តលេខ៣១២នេះ គឺជាខ្សែផ្លូវយុទ្ធសាស្ត្រដ៏សំខាន់មួយដែលឆ្លងកាត់ឃុំចំនួន ៤ ក្នុង ភូមិសាស្ត្រនៃស្រុកព្រះស្តេច ខេត្តព្រៃវែង រួមមាន៖ ឃុំល្វា ឃុំជ័យកំពក ឃុំអង្គររាជ និងឃុំ បន្ទាយចក្រី។ ខ្សែផ្លូវនេះមានភាពប្រទាក់ក្រឡាគ្នាជាមួយនឹងផ្លូវជាតិលេខ១ ផ្លូវខេត្តលេខ៣១២A និងផ្លូវក្រវាត់ព្រំដែន ដែលបានតភ្ជាប់តំបន់ទីប្រជុំជនទៅកាន់តំបន់ព្រំដែន(កម្ពុជា-វៀតណាម)។ ក្រោយបញ្ចប់ការសាងសង់ ខ្សែផ្លូវនេះនឹងជួយសម្រួលដល់ការធ្វើដំណើរទៅមន្ទីរពេទ្យរបស់ បងប្អូនប្រជាពលរដ្ឋ និងទៅសាលារៀនរបស់សិស្សានុសិស្ស និងសម្រួលការដឹកជញ្ជូនទំនិញ និង កសិផលផ្សេងៗទៅកាន់ទីផ្សារក្នុងស្រុក និងទៅកាន់តំបន់ផ្សេងៗ ជាពិសេសខ្សែផ្លូវនេះនឹងជួយ លើកកម្ពស់បន្ថែមនូវសកម្មភាពផ្លាស់ប្ដូរពាណិជ្ជកម្មរវាងកម្ពុជា និងវៀតណាម ឱ្យកាន់តែល្អ ប្រសើរឡើងបន្ថែមទៀត។ គួរបញ្ជាក់ថា ផ្លូវខេត្តលេខ៣១២នេះ ត្រូវបានសាងសង់កាលពីឆ្នាំ២០១១ ម្ដងរួចមកហើយ ជាប្រភេទផ្លូវក្រាលកៅស៊ូពីរស្រទាប់(DBST) ក្រោមជំនួយរបស់រដ្ឋាភិបាលនៃសាធារណរដ្ឋសង្គមនិយមវៀតណាម និងបានធ្វើការជួសជុល និងថែទាំជាបន្តបន្ទាប់ដោយប្រើប្រាស់ថវិកាជាតិ ប៉ុន្តែរហូតមកដល់បច្ចុប្បន្ននេះ ដោយ សារទំហំចរាចរណ៍ និងកំណើនដឹកជញ្ជូនមានការកើនឡើង ទើបធ្វើឱ្យផ្លូវនេះ ទទួលរងខូចខាត និងទ្រុឌទ្រោម ដែលតម្រូវឱ្យធ្វើការលើកកម្រិត ជួសជុល និងស្តារឡើងវិញ ដើម្បីបម្រើដល់ការធ្វើដំណើរប្រចាំថ្ងៃ និងការដឹកជញ្ជូនទំនិញគ្រប់ប្រភេទរបស់បងប្អូនប្រជាពលរដ្ឋយើង៕