កណ្តាល ៖ ដើម្បីបង្កភាពងាយស្រូល ដល់បងប្អូនប្រជាពលរដ្ឋអ្នកធ្វើដំណើរ ក៍ដូចជាភ្ញៀវទេសចរជាតិ និងអន្តរជាតិមកលេងកម្សាន្ត កម្មវិធីបុណ្យសង្ក្រាន្តចូលឆ្នាំថ្មី ដែលកាន់តែខិតចូលមកដល់ក្នុងពេលឆាប់ៗខាងមុខនេះ អាជ្ញាធរខេត្តកណ្តាល នៅថ្ងៃទី០៤ ខែមេសា ឆ្នាំ២០២៣នេះ បានចុះពិនិត្យ វឌ្ឍនភាពនៃការជួសជុលផ្លូវបរិវេណជុំវិញភ្នំព្រះរាជទ្រព្យ នៅក្នុងឃុំផ្សារដែលនិងឃុំភ្នំបាត ស្រុកឧត្តុង្គ ខេត្តកណ្តាល។ ឯកឧត្តម តាំង ម៉េងលាន អភិបាលរងខេត្តកណ្តាលនិងជាអនុប្រធានគណៈកម្មការរៀបចំបុណ្យ សង្ក្រាន្តបានមានប្រសាសន៍ថា ពិធីបុណ្យសង្ក្រានចូលឆ្នាំខ្មែរ កាន់តែខិតជិតមកដល់ក្នុងពេលឆាប់ៗនេះ ពោលគឺនៅសល់តែប្រមាណជា១០ថ្ងៃទៀតប៉ុណ្ណោះ ដូច្នេះលោកស្នើឱ្យក្រុមការងារក៍ដូចជាអាជ្ញាធរពាក់ព័ន្ឋទាំងអស់ ខិតខំពន្លឿនជុលជួលក៍សាងផ្លូវ នៅជុំវិញបរិវេណភ្នំព្រះរាជទ្រព្យនេះឱ្យបានឆាប់ ដើម្បីបង្ករភាពងាយស្រួល ដល់បងប្អូនប្រជាពលរដ្ឋ ភ្ញៀវទេសចរណ៍ជាតិ អន្តរជាតិ មកលេងកម្សាន្តដោយក្តីសោមនស្សរីករាយ។ កាលណាផ្លូវស្អាតមិនមានការកកស្ទះភ្ញៀវមកលេងច្រើន ដោយក្តីរីករាយ តែបើសិនជាផ្លូវលំបាកវិញនោះផ្លូវរលាក់ ចង្អៀតស្ទះចរាចរណ៍ ភ្ញៀវក៍ដូចជាបងប្អូនប្រជាពលរដ្ឋពិតជារអ៊ូរទាំ និងមិនចង់មកទស្សនា កម្សាន្តទៀតឡើយ។ ក្រៅពីការកសាងនិងជួលជុលផ្លូវនេះ អាជ្ញាធរពាក់ព័ន្ឋទាំងអស់ ត្រូវរៀបចំអនាម័យ សោភណ្ឌភាព ក្នុងបរិវេណវត្តក៍ដូចជាតាមដងផ្លូវនានា កុំឱ្យមានការលក់ដូរបង្ករការកកស្ទះ ពេលមានភ្ញៀវច្រើន ហើយត្រូវដាក់ភ្លើងបំភ្លឺគ្រប់ដងផ្លូវធ្វើដំណើរទាំងអស់ ក៍ដូចជាដាក់ភ្លើងតាមបរិវេណលេងកម្សាន្តនានា និងត្រូវរក្សាសន្តិសុខសណ្តាប់ធ្នាប់ឱ្យមានប្រសិទ្ឋិភាពខ្ពស់ ធ្វើយ៉ាងណាផ្តល់ទំនុកចិត្តដល់ភ្ញៀវទេសចរនៅលេងរហូតដល់យប់ជ្រៅ។ សូមជម្រាបថា នៅក្នុងគម្រោងសាងសង់និងជួសជុលខាងលើ អាជ្ញាធរខេត្តកណ្តាលបានរៀបចំចាក់កៅស៊ូ(AC) សម្រាប់ផ្លូវចូលទៅក្នុងបរិវេណភ្នំព្រះរាជទ្រព្យ និងចាក់ផ្លូវបេតុងសម្រាប់ផ្លូវចូលវត្តធម្មកេរ្ត៍។