(រាជធានីភ្នំពេញ)៖ ដើម្បីជំរុញទំនើបកម្មវិស័យដឹកជញ្ចូនសាធារណៈរបស់កម្ពុជាឱ្យកាន់តែខ្លាំង ក្រុមហ៊ុន Doppelmayr Group របស់អឺរ៉ុប ដែលជំនាញទាក់ទងនឹងវិស័យដឹកជញ្ជូនសាធារណៈដោយកន្រ្តកខ្សែកាប(Cable Car) បានបង្ហាញបំណងចង់វិនិយោគសង់ កន្រ្តកខ្សែកាបនៅកម្ពុជា។ នេះបើតាមជំនួបរបស់តំណាងក្រុមហ៊ុនខាងលើ ជាមួយមន្ត្រីក្រសួងសាធារណការ និងដឹកជញ្ជូន កាលទី២៣ ខែវិច្ឆិកា ឆ្នាំ២០២២។ នៅក្នុងឱកាសនោះ លោក Peter Vogelmann នាយកផ្នែកលក់អន្តរជាតិ តំណាងក្រុមហ៊ុន Doppelmayr Group បានធ្វើបទបង្ហាញសកម្មភាពរបស់ក្រុមហ៊ុនចាប់តាំងពីពេលកកើតរហូតមកដល់បច្ចុប្បន្ន ព្រមទាំងលើកបង្ហាញពីគុណសម្បត្តិនៃការជ្រើសយកការដឹកជញ្ជូនដោយ“កន្រ្តកខ្សែកាប” (Cable Car) ដែលមានលក្ខណៈសមស្រប់ ដែលអាចយកមកបម្រើឱ្យវិស័យដឹកជញ្ជូនសាធារណៈនៅក្នុង តំបន់ទីក្រុង ទីប្រជុំជន និងតំបន់ទេសចរណ៍នានា។​ បន្ថែមពីលើនេះ លោក ក៏បានបង្ហាញពីចំណាប់អារម្មណ៍របស់ខ្លួនលើវិស័យដឹកជញ្ជូនសាធារណៈនៅក្នុងប្រទេសកម្ពុជា តាមរយៈការសង់កន្រ្តកខ្សែកាបនេះ គឺដោយសារតែមើលឃើញពីភូមិសាស្ត្ររាជធានីភ្នំពេញផ្ទាល់ ដែលមាននិន្នាការ ងាកទៅរកការដឹកជញ្ជូនរួមមួយប្រកបដោយនិរន្តភាព និងការគិតគូរដល់បរិស្ថាន។ក្រោយស្តាប់បទបង្ហាញគម្រោងរបស់ក្រុមហ៊ុនខាងលើ ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានបង្ហាញចំណាប់អារម្មណ៍លើគម្រោងដែលក្រុមហ៊ុនលើកយកមកបង្ហាញ ហើយអះអាងថា ក្រសួងក៏កំពុងស្វែងរកដៃគូអភិវឌ្ឍន៍លើវិស័យដឹកជញ្ចូនសាធារណៈផងដែរ ដើម្បីកាត់បន្ថយការកកស្ទះចរាចរណ៍ និងលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងទីក្រុង និងទីប្រជុំជន ឱ្យកាន់តែប្រសើរឡើងថែមទៀត។ យ៉ាងណាមិញ មន្ត្រីរូបនេះបញ្ជាក់ថា ការប្រើប្រាស់សេវាដឹកជញ្ជូនសាធារណៈរបស់ពលរដ្ឋនៅក្នុងរាជធានីភ្នំពេញ នៅមានកម្រិតនៅឡើយ ប៉ុន្តែក្រសួងរំពឹងថា នាពេលអនាគត ពលរដ្ឋនឹងងាកមកប្រើប្រាស់សេវាដឹកជញ្ជូនសាធារណៈបានកាន់តែច្រើនឡើង ទន្ទឹមនឹងការដែលក្រសួងបន្តបញ្ជ្រាបការយល់ដឹងពីគុណសម្បត្តិនៃការប្រើប្រាស់សេវាដឹកជញ្ជូនសាធារណៈទៅកាន់ពួកគាត់៕