ភ្នំពេញ ៖ ស្ពានបាឡេឬស្សីកែវ ស្ថិតក្នុងនៅសង្គាត់ឬស្សីកែវ ខណ្ឌឬស្សីកែវ ត្រូវបានផ្អាកចរាចរបណ្ដោះអាសន្ន បន្ទាប់ពីមានករណីសាឡង់ដឹកខ្សាច់បើកគាបជាប់ក្រោមស្ពាន។ មន្ត្រីជំនាញបានអះអាងថា ស្ពានបាឡេ ឆ្លងទន្លេសាប ភ្ជាប់ពីក្រុងរណបជ្រោយចង្វារ មកកាន់ផ្លូវជាតិលេខ៥ ត្រូវ បានផ្អាកការធ្វើដំណើរ បណ្តោះអាសន្នសិន ដោយមិនទាន់អាចកំណត់បានភ្លាមៗនោះទេ ដោយរង់ចាំការចុះពិនិត្យ អំពីផលប៉ះពាល់សិន បន្ទាប់ពីសាឡង់ដឹកខ្សាច់មួយគ្រឿង បានបើកបុកនិងលិចពិតជាមួយនឹងសសរស្ពាន។ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានឱ្យដឹងថា ស្ពានបាឡេឆ្លងទន្លេសាប តភ្ជាប់ពីក្រុងរណបជ្រោយចង្វារ មកកាន់ផ្លូវជាតិលេខ៥ នៅល្ងាចថ្ងៃទី២០ ខែវិច្ឆិកា ឆ្នាំ២០២២នេះ មានករណីសាឡង់ដឹកខ្សាច់មួយគ្រឿង បានបើកបុកស្ពានដែកបាឡេបណ្តាលឱ្យលិចសាឡង់ ជាប់ជាមួយសសរស្ពានតែម្តង។ លោកបន្តថា ពេលនេះស្ពានបាឡ ត្រូវ បានបិទជាបណ្តោះ អាសន្ន តែនៅមិនទាន់ដឹងច្បាស់ថា ត្រូវបិទរយៈពេលប៉ុន្មានថ្ងៃនោះទេ ដោយរងចាំការវាយតំលៃ ពីមន្ត្រីជំនាញពិនិត្យ និងសិក្សាសិន ។ លោក សាំ ពិសិដ្ឋ បានបញ្ជាក់ថា តាមការប៉ាន់ស្មាន លើករណីនេះ ហាក់មិនមានសភាពធ្ងន់ធ្ងរទេ គឺអាចដំណើរការឡើងវិញក្នុងពេលឆាប់ៗនេះ៕