កិច្ចប្រជុំពិនិត្យ-ប្រគល់ទទួលអនុគម្រោងសាងសង់ទីលានទុកដាក់សំរាមដែលជាសមិទ្ធផលថ្មីក្នុងខេត្តចំនួន ៥ ទីស្ដីការក្រសួង៖ ថ្ងៃពុធ ២កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៦ ខែតុលា ឆ្នាំ២០២២ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យ-ប្រគល់ទទួលអនុគម្រោងសាងសង់ទីលានទុកដាក់សំរាមក្នុងក្រុងកំពង់ឆ្នាំង ក្រុងពោធិ៍សាត់ ក្រុងបាត់ដំបង ក្រុងកែប និង ក្រុងកំពត ក្រោមឥណទានសម្បទានរបស់ធនាគារអភិវឌ្ឍន៍អាស៊ី (ADB)។ កិច្ចប្រជុំនេះរៀបចំឡើងក្នុងគោលបំណងពិនិត្យមើលរបាយការណ៍ទាក់ទងនឹងអនុគម្រោងសាងសង់ទីលានចំនួន៥ទីតាំងខាងលើ ក្រោមកិច្ចសហប្រតិបត្តិការរវាងរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី(ADB)។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានចែករំលែកមតិយោបល់លើការបញ្ជ្រាបចំណេះដឹងដល់ប្រជាពលរដ្ឋឱ្យបានកាន់តែប្រើសើរឡើងលើការទុកដាក់ និងការបែងចែកសំរាមទៅតាមប្រភេទផ្សេងៗគ្នា និងជំរុញឱ្យក្រុមការងារពង្រឹងបន្ថែមលើការផ្សព្វផ្សាយពីសមិទ្ធផលថ្មីៗដែលសម្រេចបានជូនប្រជាពលរដ្ឋឱ្យបានជ្រាបជាព័ត៌មាន ដើម្បីចូលរួមទាំងអស់គ្នាក្នុងការប្រើប្រាស់សេវាសាធារណៈ ដែលអាចជំរុញឱ្យការអនុវត្តការងារបានកាន់តែប្រសើរ។ សូមជម្រាបជូនថា៖ ក្រុមការងារក្រសួងសាធារណការ និងដឹកជញ្ជូន នឹងអញ្ជើញចុះពិនិត្យផ្ទាល់ទីលានទុកដាក់សំរាមក្នុងក្រុងបាត់ដំបង និងខេត្តចំនួន៤ផ្សេងទៀត ដើម្បីត្រៀមប្រគល់ទទួលអនុគម្រោងនេះជូនទៅរដ្ឋបាលខេត្តនីមួយៗដើម្បីគ្រប់គ្រង៕