អាជ្ញាធរនឹងធ្វើការផ្អាកចរាចរយានយន្ដគ្រប់ប្រភេទនៅលើកំណាត់មហាវិថីសម្ដេចតេជោ ហ៊ុន សែន ( ៦០ម៉េត្រ) ចំនួន៣ថ្ងៃចាប់ពីថ្ងៃទី២៩ ដល់ថ្ងៃទី៣១ ខែសីហា ឆ្នាំ២០២២។ នេះបើយោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ បានចេញផ្សាយនៅថ្ងៃទី២៩ ខែសីហា ឆ្នាំ២០២២។តាមការបញ្ជាក់ក្នុងសេចក្ដីជូនដំណឹង ការផ្អាកចរាចរនេះក្នុងគោលបំណងដើម្បីរៀបចំទីតាំងប្រារព្ធពិធីបើកការដ្ឋានសាងសង់អាកាសនៅចំណុចប្រសព្វមហាវិថីសម្ដេចតេជោ ហ៊ុន សែន ( ៦០ម៉ែត្រ) ជាមួយនឹងវិថីកងយោធពលខេមរភូមិន្ទ និងសាសងស់អាកាសនៅចំណុចប្រសព្វមហាវិថីសហព័ន្ធរុស្សីជាមួយនឹងមហាវិថីសម្ដេចចៅហ្វាវាំងវរវៀងជ័យអធិបតីស្រីអង្គារ គង់ សំអុល នាថ្ងៃទី៣១ ខែសីហា ឆ្នាំ២០២២។ នៅក្នុងពិធីនេះ ក៏មានការអញ្ជើញចូលរួមក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាផងដែរ។ សម្រាប់ការផ្អាកចរាចរចំនួន​ ៣ ថ្ងៃខាងលើនេះដែរគឺដើម្បីរៀបចំកម្មវិធីដូចខាងក្រោម៖ ថ្ងៃទី២៩ ខែសីហា ឆ្នាំ ២០២២ចាប់ពីវេលាម៉ោង ៥:០០នាទីព្រឹក រដ្ឋបាលរាជធានីភ្នំពេញនឹងធ្វើការលាងសម្អាតមហាវិថី និងរៀបចំទីតាំងប្រារព្ធពិធី។ ថ្ងៃទី ៣០ ខែសីហា ឆ្នាំ២០២២ រៀបចំពិធីក្រុងពាលី និងការងារចាំបាច់មួយចំនួន។ ថ្ងៃទី ៣១ ខែសីហា ឆ្នាំ ២០២២ រៀបចំពិធីបើការដ្ឋានសាងសង់អាកាសទាំង២ខ្សែរខាងលើ៕