រដ្ឋបាលខេត្ត និងប្រជាពលរដ្ឋនៅទូទាំងខេត្តបន្ទាយមានជ័យ បានគោរពថ្លែងអំណរ​គុណយ៉ាងជ្រាលជ្រៅជូនសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា​​ដែលសម្តេចបានផ្តល់នូវអំណោយផ្លូវក្រាលកៅស៊ូលើខ្នងអាងត្រពាំងថ្ម ឃុំប៉ោយចារ ស្រុក​ភ្នំស្រុក ដើម្បីធ្វើឱ្យកាន់ប្រសើរឡើងនូវប្រព័ន្ធគមនាគមន៍ក្នុងតំបន់នេះ សម្រាប់បម្រើ ដល់ការធ្វើ​ដំណើររបស់ប្រជាពលរដ្ឋ។ ​អភិបាលខេត្តបន្ទាយមានជ័យឯកឧត្តម អ៊ុំ រាត្រី ក្នុងនាមរដ្ឋបាលខេត្ត និងប្រជាពលរដ្ឋ ទូទាំងខេត្ត នៅថ្ងែទី១៥ ខែកក្កដា ឆ្នាំ២០២២នេះ សូមគោរពថ្លែងអំណរគុណយ៉ាងជ្រាលជ្រៅ ជូនសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចបានផ្តល់ អំណោយផ្លូវក្រាលកៅស៊ូលើអាងត្រពាំងថ្ម សម្រាប់ការធ្វើដំណើររបស់បងប្អូនប្រជាពលរដ្ឋ និងជាផ្លូវយុទ្ធសាស្ត្រតភ្ជាប់ទេសចរណ៍តភ្ជាប់ពីប្រាសាទបន្ទាយ​ឆ្មារ ស្រុកថ្មពួក ដល់ខ្នងអាង ត្រពាំងថ្ម ស្រុកភ្នំស្រុក ខេត្តបន្ទាយមានជ័យ និងចេញបន្តទៅកាន់ខេត្តសៀមរាប។​ ឯកឧត្តម អ៊ុំ រាត្រី បន្តទៀតថា ឆ្លើយតបទៅនឹងអនុសាសន៍ដ៏ខ្ពង់ខ្ពស់ របស់សម្តេច តេជោ ហ៊ុន សែន នាយករដ្ឋមន្ត្រី ស្តីពីយុទ្ធនាការ​បោសសម្អាត​មីន​ផ្តើមចេញពីឃុំប៉ោយចារ ស្រុកភ្នំស្រុក ជាឃុំគ្មានមីន និងការស្ថាបនាផ្លូវលើខ្នងអាងត្រពាំងថ្ម កាល​ពី​ថ្ងៃ​ទី០១ ខែកក្កដា​ឆ្នាំ២០២២​ ក្នុងឱកាសទិវាមច្ឆជាតិ ទាំងសកម្មភាពក្រុមការងារបោសសម្អាតមីន នៅឃុំប៉ោយចារ និងសកម្មភាពក្រុមការងារក្រសួងធនធានទឹក និងឧតុនិយម បាន និងកំពុងធ្វើផ្លូវយ៉ាងសស្រាក់សស្រាំនៅលើអាងត្រពាំងថ្ម ស្រុកភ្នំស្រុក ដែលជាលទ្ធផល មកត្រឹមថ្ងៃទី​១៤ ខែកក្កដា ឆ្នាំ២០២២ គ្រឿងចក្របានបែងចែកការងារជា ៣ក្រុម ដោយ ក្រុមទី១ ​សម្រេចការងារដោយបានចាក់ថ្ម សរុបចំនួន​ជាង៤០០រថយន្ត និងកំពុងបាន ដឹកថ្មល្អិតបន្តទៀត។ ​ក្រុមទី២ គ្រឿងចក្រកៀរកិនបង្ហាប់ សម្អាត ខ្នងអាង យកដីជ្រាយ ចេញពីលើខ្នងអាង និងបានពង្រាយថ្មលើខ្នងអាង កៀរកិនបង្ហាប់ កម្រាស់ ០,១៥ម៉ែត្រ បានប្រវែង ​១០គីឡូម៉ែត្រ​ និងក្រុមទី៣ សម្អាតព្រៃជើងទេ សងខាងអាង ២១​គីឡូម៉ែត្រ និងបន្តសម្អាតបន្ថែម ព្រៃដែលនៅសេសសល់ទៀតនោះ៕