(ភ្នំពេញ)៖ ឯកឧត្តម គង់ វិមាន អ្នក​នាំ​ពាក្យ​ក្រសួង​សាធារណការ ​និង​ដឹក​ជញ្ជូន បានបញ្ជាក់ហេតុផលនៃការពន្យារពេលបើកឱ្យប្រើប្រាស់ជាបណ្តោះអាសន្ននូវផ្លូវល្បឿនលឿនភ្នំពេញ-ខេត្តព្រះសីហនុ នៅថ្ងៃទី១ ខែកក្កដា ឆ្នាំ២០២២នេះ។ ការបញ្ជាក់នេះត្រូវបានលើកឡើងក្នុងសារអេឡិចត្រូនិច តេឡេក្រាម បន្ទាប់ពីមានចម្ងល់ជាច្រើនពីសំណាក់បងប្អូនដែលមានបំណងចង់បើកបរលើផ្លូវល្បឿនលឿន តែមិនត្រូវបានអនុញ្ញាតជូន។ អ្នក​នាំ​ពាក្យ​រូបនេះបានជម្រាបជូននូវមូលហេតុមួយចំនួន រួមមាន៖ ១- លទ្ធផលសាងសង់បាន៩៤% នៅឡើយ ២-បញ្ហាស្លាកសញ្ញាចរាចរណ៏មិនទាន់បានបំពាក់ឱ្យបានគ្រប់គ្រាន់នៅឡើយ ៣- របងការពារសុវត្ថិភាពផ្លូវទើបបានជាង៧០% ៤- រនាំងទ្រូងផ្លូវនិង សួនច្បារ ទើបបានប្រហែល៨០% ៥- ស្ពានរំលងអាកាសមួយចំនួនពុំទាន់បានរួចរាល់ ៦- ចំណុចចាប់ផ្តើមដើមទី-ចុងទីពុំទាន់បានបញ្ចប់ជាស្ថាពរនៅឡើយ ៧- ទីតាំងចំណតទាំង៤កន្លែងនៅពុំទាន់រួចរាល់១០០% ៨- បរិក្ខារមួយចំនួនទៀតពុំទាន់បានបំពាក់រួចរាល់ និងបញ្ហាផ្សេងៗទៀត។ ឯកឧត្តមបានមានប្រសាសន៍ថា៖ «ការងារដែលនៅសេសសល់នឹងត្រូវបញ្ចប់ចុងខែសីហាខាងមុខនេះ។ ក្រសួង និងក្រុមហ៊ុនបានពិភាក្សាគ្នា និងបានកំណត់ថានឹងដាក់ឱ្យដំណើរការបណ្តោះអាសន្ននៅដើមខែកញ្ញាឆ្នាំ២០២២ខាងមុខនេះ»។ គូសបញ្ជាក់ថា កន្លងមករដ្ឋមន្ត្រីក្រសួងសាធារណការ បានពិភាក្សាជាមួយនឹងតំណាងក្រុមហ៊ុនសាងសង់ផ្លូវល្បឿនលឿនភ្នំពេញ-ព្រះសីហនុ ភាគីសម្រេចថា ឆ្នាំដំបូងបន្ទាប់ពីដាក់ដំណើរការផ្លូវនេះ សំបុត្រដំណើរសម្រាប់រថយន្តគ្រួសារមានតម្លៃ ១២ដុល្លារ សម្រាប់ជិះម្ដង និងតម្លៃ២៤ដុល្លារសម្រាប់ទៅវិញទៅមក។ ប៉ុន្តែជាទូទៅ សម្រាប់ផ្លូវល្បឿនលឿនថ្លៃធ្វើដំណើរលើផ្លូវនេះមានតម្លៃ១០សេន ក្នុងមួយគីឡូម៉ែត្រ ដូច្នេះបើតាមតម្លៃធម្មតាប្រហែលជាមានតម្លៃ ១៩ដុល្លារ។គួររំលឹកផងដែរថា កាលពីថ្ងៃទី ០៥ ខែមិថុនា ឆ្នាំ ២០២២ ថ្មីៗនេះ មានគ្រោះថ្នាក់ចរាចរណ៍លើកដំបូងសម្រាប់កម្ពុជាលើផ្លូវល្បឿនលឿន ដែលរថយន្ត២គ្រឿងបើកបញ្ច្រាស់ទិសគ្នាបានបុកមួយទំហឹង បណ្ដាលឱ្យមនុស្ស៣នាក់រងរបួស ដែលស្ថិតលើផ្លូវល្បឿនលឿន ចន្លោះគីឡូ១៣៤-១៣៥ ស្ថិតក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សីលា ខេត្តព្រះសីហនុ៕