ភ្នំពេញ៖ ក្រសួងសាធារណការ និងដឹកជញ្ជូន និងក្រុមហ៊ុនសាងសង់ បានពិភាក្សាគ្នា និងបានកំណត់ថា នឹងដាក់ឱ្យដំណើរការបណ្តោះអាសន្នផ្លូវល្បឿនលឿនភ្នំពេញ-ព្រះសីហនុ នៅដើមខែកញ្ញា ឆ្នាំ២០២២ខាងមុខនេះវិញ។ នេះបើតាមការឱ្យដឹងពី លោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូន នៅថ្ងៃទី១ ខែកក្កដានេះ។ តាមការគ្រោងទុក ផ្លូវល្បឿនលឿនដំបូងគេនៅកម្ពុជា ពីរាជធានីភ្នំពេញ ទៅកាន់ក្រុងព្រះសីហនុ នឹងត្រូវដាក់ឱ្យដំណើរការបណ្តោះអាសន្ននៅខែកក្កដា ឆ្នាំ២០២២នេះ។ លោក គង់ វិមាន បានឱ្យដឹងថា ហេតុផលនៃការពន្យាពេលបើកឱ្យប្រើប្រាស់ជាបណ្តោះអាសន្នផ្លូវល្បឿនលឿនភ្នំពេញ -ខេត្តព្រះសីហនុ ដោយមូលហេតុដូចខាងក្រោម : ១/ លទ្ធផលសាងសង់បាន៩៤% នៅឡើយ ២/ បញ្ហាស្លាកសញ្ញាចរាចរណ៍មិនទាន់បានបំពាក់ឱ្យបានគ្រប់គ្រាន់នៅឡើយ ៣/ របងការពារសុវត្ថិភាពផ្លូវទើបបានជាង៧០% ៤/រនាំងទ្រូងផ្លូវនិង សួនច្បារ ទើបបានប្រហែល៨០% ៥/ ស្ពានរំលងអាកាសមួយចំនួនពុំទាន់បានរួចរាល់ ៦/ ចំនុចចាប់ផ្តើមដើមទី ចុងទីពុំទាន់បានបញ្ចប់ជាស្ថាពរនៅឡើយ ៧/ទីតាំងចំណតទាំង៤កន្លែងនៅពុំទាន់រួចរាល់១០០% ៨/ បរិក្ខាមួយចំនួនទៀតពុំទាន់បានបំពាក់រួចរាល់ និង ៩/ បញ្ហាផ្សេងៗ បើតាមលោក គង់ វិមាន បានបញ្ជាក់បន្ថែមថា ការងារដែលនៅសេសសល់ទាំងនេះ នឹងត្រូវបញ្ចប់ទាំងស្រុង នៅចុងខែសីហាខាងមុខនេះ។គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧,០៥ គីឡូម៉ែត្រ ដែលបានបើកការដ្ឋានសាងសង់ កាលពីថ្ងៃទី២២ ខែមីនា នឹងគ្រោងបញ្ចប់នៅថ្ងៃទី៣១ ខែឧសភា ឆ្នាំ២០២៣ ដោយប្រើប្រាស់ថវិកាប្រមាណ ២,០១៩លានដុល្លារសហរដ្ឋអាមេរិក។ ផ្លូវនេះតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។ ផ្លូវល្បឿនលឿននេះ មានគន្លងផ្លូវចំនួន៤គន្លង ទទឹងផ្លូវសរុប ២៤,៥ ម៉ែត្រ មានផ្លូវបំបែកទិស៧កន្លែង មានកន្លែងឈប់សម្រាកចំនួន៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំចំនួន ៤កន្លែង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥កន្លែង ដែលឆ្លងកាត់រាជធានីភ្នំពេញ ប្រមាណ ៨គីឡូម៉ែត្រ និងខេត្តចំនួន០៤បួន ក្នុងនោះ ៖ ខេត្តកណ្តាលប្រវែង ៩,១ គីឡូម៉ែត្រ ខេត្តកំពង់ស្ពឺ ប្រវែង ៨០,៨ គីឡូម៉ែត្រ ខេត្តកោះកុងប្រវែង១,៩២ គីឡូម៉ែត្រ និងខេត្តព្រះសីហនុប្រវែង ៨៩,៨៩គីឡូម៉ែត្រ៕