ភ្នំពេញ ៖ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និង ជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានឱ្យដឹងថា ករណីគ្រោះថ្នាក់ចរាចរណ៍ឆ្នាំ២០២១ បានថយចុះចំនួន៥០៩លើក ស្មើ ១៦% អ្នកស្លាប់ ថយចុះចំនួន ១៤៩នាក់ ស្មើ៩% និងអ្នករបួសថយចុះចំនួន១០៧១នាក់ ស្មើ ២៣% ប្រៀបធៀបនឹងឆ្នាំ២០២០។ ក្នុងពិធីបើកសិក្ខាសាលាស្តីពីការ ប្រមូលធាតុចូលសម្រាប់ផែន ការទសវត្សរ៍ជាតិសុវត្ថិភាពចរាចរណ៍ផ្លូវគោក ឆ្នាំ២០២១- ២០៣០ កាលពីថ្ងៃទី២២ខែមិថុនា ឆ្នាំ២០២២ នៅទីស្តីការក្រសួង លោកជំទាវ មឹន មាណវី បានមានប្រសាសន៍ថា យោងតាមទិន្នន័យគ្រោះថ្នាក់ចរាចរណ៍ផ្លូវគោក របស់អគ្គស្នងការដ្ឋាននគរបាលជាតិក្នុងឆ្នាំ២០២១បានឱ្យដឹងថា គ្រោះថ្នាក់ចរាចរណ៍បានកើតឡើងចំនួន២៦៧០លើក បណ្តាលឱ្យស្លាប់ចំនួន១៤៩៧នាក់ និងរបួស ចំនួន៣៦១៥នាក់ របួសធ្ងន់ ២២៤៦នាក់ ក្នុងនោះអ្នក ស្លាប់នៅរាជធានីភ្នំពេញមានចំនួន២៤៥នាក់ ខេត្តកណ្តាលចំនួន១៤១នាក់ និងខេត្តកំពង់ចាម ចំនួន៩៦នាក់។ មូលហេតុបណ្តាលឱ្យមានគ្រោះថ្នាក់ រួមមាន៖ បើកបរលើសល្បឿនកំណត់៣៨% មិនគោរពសិទ្ធិ ២៤% មិនប្រកាន់ស្តាំ១៤% វ៉ាជែង៨% បត់៨% ស្រវឹង៤% កត្តាយានយន្ត៣% និងងងុយ ១% ប្រៀបធៀប នឹងឆ្នាំ២០២០ ហេតុការណ៍គ្រោះ ថ្នាក់ថយចុះចំនួន៥០៩លើក ស្មើ ១៦% អ្នកស្លាប់ថយចុះចំនួន១៤៩នាក់ ស្មើ៩% និងអ្នករបួស ថយចុះចំនួន១០៧១នាក់ ស្មើ ២៣% ។ លោកជំទាវរដ្ឋលេខាធិការ បានបន្តថា ទាក់ទងនឹងស្ថានភាពគ្រោះថ្នាក់ចរាចរណ៍ក្នុងត្រីមាស ទី១ ឆាំ្ន ២០២២នេះ នៅពេលរាជរដ្ឋាភិបាលបានប្រកាសបើក ប្រទេសឡើងវិញ លើគ្រប់វិស័យ បន្ទាប់ពីរាជរដ្ឋាបាល បាន ដាក់ចេញវិធានការគ្រប់គ្រងបាន យ៉ាងល្អប្រសើរនូវការរីករាល ដាលជំងឺកូវីដ-១៩ ការធ្វើ ចរាចរណ៍នៅទូទំាងប្រទេសមានភាពមមាញឹក ធ្វើឱ្យករណីគ្រោះថ្នាក់កើនឡើង អ្នកស្លាប់ និងអ្នករបួស ធៀបនឹងរយៈពេលដូចគ្នាឆ្នាំ២០២១។ ករណីគ្រោះថ្នាក់ចរាចរណ៍ទាំងនោះបង្កឡើងដោយសារការបើកបរ ក្នុង ល្បឿនហួសកំណត់ ការបើកបរក្រោមឥទ្ធិពលគ្រឿងស្រវឹង ការ មិនពាក់មួកសុវត្ថិភាព និងមិនពាក់ខ្សែក្រវាត់សុវត្ថិភាព ការជែងដោយប្រថុយប្រថាន បានបង្កឱ្យគ្រោះថ្នាក់ចរាចរណ៍មានសភាពធ្ងន់ធ្ងរ ធ្វើឱ្យបាត់បង់ ជីវិត មនុស្ស ឬរបួស ពិការយ៉ាងអាណោចអាធម រួមជាមួយនឹងការខូចខាតទ្រព្យសម្បត្តិរដ្ឋ និង ឯកជន យ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើន មកលើសង្គមកម្ពុជា៕