រាជធានីភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល បានឱ្យដឹងថា យានយន្តអគ្គិសនីនៅកម្ពុជាមានការកើនឡើងជាង៨០០ភាគរយ ហើយឯកឧត្តមទេសរដ្ឋមន្ត្រី សំដែងការពេញចិត្តចំពោះកំណើនយានយន្តអគ្គិសនីបែបនេះ។ រយៈពេល៥ខែឆ្នាំ២០២២ មានយានយន្តអគ្គិសនី៨៤គ្រឿង ត្រូវបាននាំចូល បើធៀបនឹងរយៈពេលដូចគ្នាក្នុងឆ្នាំ២០២១ មានយានយន្តអគ្គិសនីត្រឹមតែ៩គ្រឿងប៉ុណ្ណោះ។ ឯកឧត្តមទេសរដ្ឋមន្ត្រី ស៊ុន ចាន់ថុល ថ្លែងឱ្យដឹងដូច្នេះ ​ក្នុងកម្មវិធី MPWT LIVE SHOW ប្រធានបទ «ការប្រើប្រាស់យានយន្តអគ្គិសនី(EV) នៅកម្ពុជា» ថ្ងៃទី២៧ ខែឧសភា ឆ្នាំ២០២២។ ចំពោះទីតាំងបញ្ចូលថាមពលយានយន្តអគ្គិសនី ឯកឧត្តមទេសរដ្ឋមន្ត្រី ស៊ុន ចាន់ថុល ឱ្យដឹងថា មានបីកន្លែងហើយ គឺនៅក្រសួងសាធារណការ និងដឹកជញ្ជូន មានមួយកន្លែង នៅខេត្តព្រះសីហនុមួយកន្លែង និងនៅស្ថានីយប្រេងកាល់តិច មានមួយកន្លែង។ ក្រសួងគ្រោងដាក់ទីតាំងបញ្ចូលថាមពលយានយន្តអគ្គិសនី មួយកន្លែង នៅខេត្តបាត់ដំបង មួយកន្លែងនៅខេត្តសៀមរាប ស្របពេលដែលក្រុមហ៊ុនប្រេងឥន្ធនៈភីធីធី គ្រោងដាក់ពីរកន្លែង តាមផ្លូវល្បឿនលឿនភ្នំពេញ ក្រុងព្រះសីហនុ។ រយៈពេលនៃការបញ្ចូលថាមពលយានយន្តអគ្គិសនី គឺចន្លោះពី៣០ទៅមួយម៉ោង អាស្រ័យលើប្រភេទនៃម៉ាស៊ីនបញ្ចូលថាមពល និងតាមប្រភេទយានយន្ត។ សម្រាប់ចម្ងាយនៃការរត់វិញ ក៏អាស្រ័យទៅតាមប្រភេទយានយន្តដែរ ដោយរថយន្តអគ្គិសនីខ្លះអាចរត់បានចម្ងាយ៥០០គីឡូម៉ែត្រ ខ្លះរត់បាន១៧៥គីឡូម៉ែត្រ ខ្លះ២២៥គីឡូម៉ែត្រ។ ចំពោះតម្លៃរថយន្តអគ្គិសនី មានចាប់ពី១ម៉ឺន៧ពាន់ដុល្លារអាម៉េរិក រហូតដល់ជាង១០ម៉ឺនដុល្លារអាម៉េរិក។ នេះជាការលើកឡើងរបស់ឯកឧត្តមទេសរដ្ឋមន្ត្រី។ ឯកឧត្តមទេសរដ្ឋមន្ត្រី បានឱ្យដឹងផងដែរថា សព្វថ្ងៃមានក្រុមហ៊ុនចំនួន៩ដែលនាំចូលរថយន្ត និងម៉ូតូប្រើអគ្គិសនី។ បន្ថែមពីនេះ នៅកម្ពុជា ក៏មានក្រុមហ៊ុនមួយ គឺក្រុមហ៊ុ​ន ONION កំពុងដំឡើងកង់បីនៅកម្ពុជា ដោយគ្រោងផលិតឱ្យបាន២ពាន់ទៅ៣ពាន់គ្រឿង ក្នុងមួយឆ្នាំ ហើយក៏មានក្រុមហ៊ុនផលិតម៉ូតូអគ្គិសនីផងដែរ ដែលផលិតផលទាំងនេះ អាចនាំចេញទៅក្រៅប្រទេសផងដែរ។ ផ្អែកលើនិន្នាការនេះ ឯកឧត្តមទេសរដ្ឋមន្ត្រីរំពឹងថា យានយន្តអគ្គិសនី នឹងកើនឡើងច្រើនបន្ថែមទៀត។ ឯកឧត្តមទេសរដ្ឋមន្ត្រី ស៊ុន ចាន់ថុល បន្តថា បច្ចុប្បន្នក្រសួងសាធារណការ និងដឹកជញ្ជូន កំពុងសហការគ្នាជាមួយ UNDP និងផ្នែកឯកជន ដើម្បីជំរុញកំណើនយានយន្តអគ្គិសនី ក៏ដូចជាបង្កើនវត្តមាននៃកន្លែងបញ្ចូលថាមពល ក្នុងប្រទេសកម្ពុជា ខណៈរាជរដ្ឋាភិបាលកម្ពុជា បន្ថយពន្ធនាំចូល៥០% ដើម្បីលើកទឹកចិត្តការប្រើប្រាស់រថយន្តអគ្គិសនីនៅកម្ពុជា៕