[Rasmei Kampuchea Daily News] - បើកការដ្ឋានកសាងផ្លូវបេតុង ប្រវែងជាង ២ ពាន់ម៉ែត្រ ក្នុងឃុំសំរោងសែន
ដោយៈ ទេពកង្រី / កំពង់ឆ្នាំងៈ លោក ស៊ុន សុវណ្ណរិទ្ធិ អភិបាល នៃគណៈអភិបាល ខេត្តកំពង់ឆ្នាំង នៅព្រឹកថ្ងៃទី២០ ខែឧសភា ឆ្នាំ២០២២នេះ បានអញ្ជើញចូលរួម ក្នុងពិធីបើក ការដ្ឋានកសាងផ្លូវបេតុង ប្រវែងជាង ២.០០០ ម៉ែត្រ និងជួបសួរសុខទុក្ខ ចែកអំណោយ ជូន ប្រជាពលរដ្ឋ ជាង ៤០០ គ្រួសារ នៅក្នុងឃុំសំរោងសែន ស្រុកកំពង់លែង។
ក្នុងពិធីនេះ ក៏មានការចូលរួមពីលោកស្រី កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង លោក កែវ វ៉ាន់ដេត ព្រមទាំងលោក លោកស្រី ក្រុមការងារជាតិថ្នាក់កណ្ដាល ចុះពង្រឹង ស្រុកកំពង់លែង ព្រមទាំងក្រុមការងារថ្នាក់ខេត្ត ថ្នាក់ស្រុក និងអាជ្ញាធរឃុំ ។
នៅក្នុងពិធីនេះ លោកស្រី កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង បានសំណេះសំណាល ជាមួយប្រជាពលរដ្ឋថាៈ រយៈពេលជាង ៤០ ឆ្នាំ កន្លងមកនេះ ក្រោមការដឹកនាំដ៏ឈ្លាសវៃ របស់សម្ដេចតេជោ ហ៊ុនសែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានអនុ វត្តគោលនយោបាយបង្រួបបង្រួមជាតិ យុទ្ធសាស្ត្រឈ្នះឈ្នះ បានចប់សង្គ្រាមរវាងខ្មែរនិងខ្មែរ បានដោយជោគជ័យ និងបានកសាងអភិវឌ្ឍន៍ជាតិ លើគ្រប់វិស័យ តាំងពីទីក្រុងរហូត ដល់ជនបទ និងធ្វើឲ្យប្រទេសជាតិ មានសុខសន្តិភាព ប្រជាពលរដ្ឋ មានសិទ្ធិសេរីភាព មានជីវភាពរស់នៅល្អប្រសើរ ។ ដោយឡែក នៅពេលប្រទេសជាតិ ជួបនឹងវិបត្តិជំងឺកូវីដ១៩ សម្ដេចតេជោ បានស្វះស្វែងទិញ វ៉ាក់សាំង មកចាក់ជូនប្រជាពលរដ្ឋ ដោយឥតគិតថ្លៃ ដើម្បីជួយសង្គ្រោះជីវិតប្រជាពលរដ្ឋ ដោយមិនប្រកាន់ពូជសាសន៍ និន្នាការនយោបាយ ។
នៅក្នុងពិធីនេះដែរ លោក ស៊ុន សុវណ្ណរិទ្ធិ ក៏បានបកស្រាយ នូវសំណូមពរ របស់ប្រជាពលរដ្ឋ ថា ទាក់ទងនឹងការដកហូតដីតំបន់៣ កន្លងមក គឺរដ្ឋាភិបាល ពិនិត្យឃើញពួកឈ្មួញមួយចំនួន បានឈូសឆាយទន្ទ្រានកាន់កាប់ដីតំបន់៣ រាប់ពាន់រាប់ម៉ឺនហិកតា ដែលធ្វើឱ្យបាត់បង់ព្រៃលិច ទឹក ជុំវិញបឹងទន្លេសាប ។
ចំពោះដីតំបន់ ៣ មួយចំនួន របស់ប្រជាពលរដ្ឋអាស្រ័យផល តាំងពីដូនតាមកនោះ អាជ្ញាធរស្រុក ខេត្ត បានរាយការណ៍ជូនប្រមុខរាជរដ្ឋាភិបាលរួចហើយ ដែលសង្ឃឹមថា ក្នុងពេលខាងមុខនេះ រាជរដ្ឋាភិបាល នឹងដោះស្រាយ ជូនប្រជាពលរដ្ឋយើងវិញ។
ចំពោះការបង្ក្រាបបទល្មើសនេសាទ ក៏ដូចគ្នា គឺគោលដៅរបស់ប្រមុខរាជរដ្ឋាភិបាល និង អាជ្ញាធរខេត្ត គឺបង្ក្រាបមើលរបស់ឈ្មួញទុច្ចរិតធំៗ អ្នកឆក់ត្រីខុសច្បាប់ ដែលធ្វើឱ្យមច្ឆជាតិ បាត់បង់ ។
ចំពោះការនេសាទជាលក្ខណៈគ្រួសារ របស់ប្រជាពលរដ្ឋ គឺប្រមុខរាជរដ្ឋាភិបាល និងអាជ្ញា ធរខេត្ត មិនហាមឃាត់ឡើយ គឺយើងត្រូវតែរួមគ្នា ទប់ស្កាត់បទល្មើសនេសាទ យើងរួមគ្នាដាំ ព្រៃលិចទឹក ឱ្យបានច្រើនលើដីតំបន់ ៣ ដែលបានដកហូត ទើបត្រីគ្រប់ប្រភេទ នៅក្នុងបឹង ទន្លេសាបយើង សំបូរឡើងវិញ ។
នៅក្នុងពិធីនេះដែរ លោកអភិបាលខេត្ត លោកស្រីតំណាងរាស្ត្រ និងក្រុមការងារ បានចែកអំ ណោយជូនប្រជាពលរដ្ឋ ជាង ៤០០ គ្រួសារ ដែលក្នុងមួយគ្រួសារៗ ទទួលបានអង្គរ ២០ គីឡូ, មីមួយកេស, ត្រីខ ១យួរ, ទឹកត្រី ១យួរ និងថវិកា ១ ម៉ឺនរៀល ។ ដោយឡែក ប្រជាពលរដ្ឋ ដែលមកពីឃុំច្រណូក ជាង ៥០ គ្រួសារ ទទួលបានសារុង១ និងថវិកា ២ ម៉ឺនរៀល។
នៅព្រឹកថ្ងៃដដែលនេះដែរ លោកអភិបាលខេត្តកំពង់ឆ្នាំង និងលោកស្រី តំណាងរាស្ត្រ ក៏បានចូលរួមបើកការដ្ឋានកសាងផ្លូវបេតុងមួយខ្សែ មានប្រវែងជាង ២ ពាន់ម៉ែត្រ នៅក្នុងភូមិសំរោងសែន និងភូមិប៉ប្រក ក្នុងឃុំសំរោងសែន ។ ទន្ទឹមនឹងនេះ លោកអភិបាល ខេត្តកំពង់ឆ្នាំង ក៏បានបញ្ជាក់ពីការជួយជួសជុល ផ្លូវលំប្រវែងជាង ៧ ពាន់ម៉ែត្រ ពីឃុំសំរោងសែន ទៅឃុំដារ ក្នុងស្រុកកំពង់លែង ផងដែរ ដើម្បីជួយសម្រួលដល់ ការធ្វើចរាចរណ៍ ជូនប្រជាពលរដ្ឋ ៕/V
