ឯកឧត្ដមរដ្ឋលេខាធិការ រស់ វណ្ណា ដឹកនាំកិច្ចប្រជុំប្រចាំខែស្ដីពីវឌ្ឍនភាពគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិចនៅកំពង់ផែ (Port EDI) តាមប្រព័ន្ធវីដេអូពីចម្ងាយ ថ្ងៃសុក្រ ១៣រោច ខែចេត្រ ឆ្នាំខាល ចត្វាស័ក ព.ស. ២៥៦៥ ត្រូវនឹងថ្ងៃទី២៩ ខែមេសា ឆ្នាំ២០២២ នៅទីស្តីការក្រសួង ឯកឧត្ដម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែតាមប្រព័ន្ធវីដេអូពីចម្ងាយស្ដីពីវឌ្ឍនភាពគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិចនៅកំពង់ផែ (Port EDI) ដោយមានការអញ្ជើញចូលរួមពីថ្នាក់ដឹកនាំក្រសួង ទីប្រឹក្សាមកពីក្រុមហ៊ុន Mitsubishi Research Institute, Incនិងក្រុមហ៊ុនExeo Group Corporation មន្រ្តីពាក់ព័ន្ធមកពីនាយកដ្ឋាននាវា ជំនួញសមុទ្រ នាយកដ្ឋានព័ត៌មានវិទ្យា និងទំនាក់ទំនងសាធារណៈ កំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ អគ្គនាយកដ្ឋានគយ និងរដ្ឋាករកម្ពុជា នាយកដ្ឋានច្រកទ្វារទី២នៃអគ្គនាយកដ្ឋានអន្តោប្រវេសន៍ និងនាយការិយាល័យច្រកទ្វារផ្លូវទឹក និងកំពង់ផែអន្តរជាតិ។ អង្គប្រជុំបានពិភាក្សាអំពីលទ្ធផលវឌ្ឍនភាពក្នុងខែមេសានៃគម្រោងប្រព័ន្ធ Port EDI មានដូចជា៖ កិច្ចប្រជុំណែនាំដល់ក្រុមហ៊ុននាវាដែលត្រូវចូលការធ្វើតេស្តលើកទី២ (User Acceptance Test 2) អំពីការប្រើប្រាស់ប្រព័ន្ធ Port EDI។ កិច្ចប្រជុំពិភាក្សាស្តីពីទម្រង់លិខិតបែបបទនាវាចូលចេញកំពង់ផែ។ ការធ្វើតេស្តលើកទី២(User Acceptance Test 2) អំពីការប្រើប្រាស់ប្រព័ន្ធ Port EDI សម្រាប់ផ្នែកមន្ត្រី រៀបចំបែបទនាវានៅច្រកទ្វារកំពង់ផែស្វយ័តភ្នំពេញ។ អង្គប្រជុំបានសម្រេចលើកាលបរិច្ឆេទចាប់ផ្តើមវគ្គ បណ្តុះបណ្តាលស្តីពីការប្រើប្រាស់ប្រព័ន្ធ Port EDI ដល់ក្រុមហ៊ុននាវា និងក្រុមហ៊ុនភ្នាក់ងារនាវា ពីថ្ងៃទី១៦-២៥ ខែឧសភា ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន។ បន្ថែមពីលើនេះ អង្គប្រជុំបានពិភាក្សាអំពីទិសដៅដែលត្រូវអនុវត្តបន្តសម្រាប់ខែឧសភា ឆ្នាំ២០២២ មានដូចជា៖ ចាប់ផ្តើមធ្វើតេស្តទី២ (User Acceptance Test 2) អំពីការប្រើប្រាស់ប្រព័ន្ធ Port EDI សម្រាប់ផ្នែកមន្ត្រីរៀបចំបែបទនាវានៅតាមច្រកទ្វារកំពង់ផែស្វយ័តក្រុងព្រះសីហនុ។ រៀបចំវគ្គបណ្តុះបណ្តាលស្តីពីការប្រើប្រាស់ប្រព័ន្ធ Port EDI ដល់ក្រុមហ៊ុននាវា និងក្រុមហ៊ុនភ្នាក់ងារនាវា នៅថ្ងៃទី១៦-២៥ ខែឧសភា ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន។ រៀបចំវគ្គបណ្តុះបណ្តាលបន្ថែម ស្តីពីការប្រើប្រាស់ប្រព័ន្ធ Port EDI ដល់មន្ត្រីក្រសួង/ស្ថាប័ន ដែលរៀបចំបែបបទនាវាចូលចេញកំពង់ផែ នៅថ្ងៃទី៣០ ខែឧសភា ១៦ ខែមិថុនា ឆ្នាំ២០២២ និងបន្តប្រជុំពិនិត្យលើសេចក្តីព្រាងអនុក្រឹត្យស្តីពីការដាក់ឱ្យដំណើរការប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ ក្នុងកម្រិតថ្នាក់អន្តរក្រសួង៕