(កែប)៖ ខេត្តកែប បានទទួលផ្លូវអ៊ុតកៅស៊ូប្របមាត់សមុទ្រប្រវែងជាង១២គីឡូម៉ែ ចំនួន១ខ្សែ នៅស្រុកដំណាក់ចង្អើរ ដែលរៀបចំក្រុងពាលាបើកការដ្ឋានស្ថាបនាផ្លូវ នាថ្ងៃទី១ ខែមីនា ឆ្នាំ២០២២ ស្ថិតក្នុងភូមិអង្កោល ឃុំអង្កោល ស្រុកដំណាក់ចង្អើរ ក្រោមអធិបតីភាពលោក វង្សពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន, លោក សំ សារីម ប្រធានក្រុមប្រឹក្សាខេត្ត និងលោកអភិបាលខេត្តកែប សោម ពិសិដ្ឋ ដោយចូលរួមពីប្រតិភូអមដំណើរ ម្ចាស់គម្រោង មន្ត្រីនៃស្ថាប័នជំនាញ អាជ្ញាធរពាក់ព័ន្ធ ប្រជាពលរដ្ឋ និងអ្នកពាក់ព័ន្ធ ជាច្រើនរូប។ លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប បានលើកឡើងក្នុងរបាយការណ៍ថា គម្រោងសាងសង់ផ្លូវ ដែលរៀបចំក្រុងពាលាបើកការដ្ឋានស្ថាបនាកំណាត់ផ្លូវអ៊ុតកៅស៊ូ ប្របមាត់សមុទ្រមួយខ្សែនាពេលនេះ ជាប្រភេទផ្លូវអ៊ុតកៅស៊ូAC មានប្រវែងសរុប ១២,៧៥ គីឡូម៉ែត្រ ចាប់ពីផែកោះទន្សាយស្ថិតនៅភូមិកែប សង្កាត់កែប ក្រុងកែប ដល់ចំណុចប្រសព្វផ្លូវ១៣៣២ ស្ថិតក្នុងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ដោយផ្អែកតាមស្ថានភាពភូមិសាស្រ្តជាក់ស្ដែង កំណាត់ផ្លូវនេះត្រូវបានចែកជា៤ផ្នែកសំខាន់ៗរួមមាន៖ *ទី១៖ ផ្នែកដំបូងចាប់ផ្តើមពី PK0+000 (ផែកោះទន្សាយ) ដល់ PK1+200 ប្រវែង1.2គម ទទឹង១ម ផ្នែកខាងស្តាំមានចែកជាគន្លងសម្រាប់ផ្លូវជិះកង់ទទឹង២ម។ *ទី២៖ ផ្នែកសំខាន់ចាប់ពី PK1+200 ដល់ PK9+500 ប្រវែង៨.៣គ.ម ទទឹង១៥ ផ្នែកខាងស្តាំមានចែកជាគន្លងផ្លូវជិះកង់ទទឹង២,៥ម៉ែត្រ។ *ទី៣៖ ផ្នែកតភ្ជាប់ទៅផ្លូវខេត្ត១៣៣២ ចាប់ពី PK9+669 ដល់ PK11+620 ប្រវែង1.96គម ទទឹង៩ម និងចិញ្ចើមផ្លូវទទឹង១,៥ម សង់ខាង។ *ទី៤៖ ផ្នែកភូមិអង្កោល ចាប់ពី PK9+669 ដល់PK10+000 ទទឹង១៥ម និងចិញ្ចើមខាងស្តាំសម្រាប់ផ្លូវជិះកង់ ទទឹង២,៥ម និងខាងឆ្វេងទទឹង១,៥ម សម្រាប់ផ្លូវថ្មើរជើង។ កំណាត់ផ្លូវនេះ រួមបញ្ចូលទាំងការងារសាងសង់លូប្រអប់ ចំនួន ១៣ កន្លែង, លូមូលចំនួន ២៩ កន្លែង នឹងធ្វើជញ្ជាំងទប់ដី ចាក់បំពេញតួផ្លូវ តាមមាត់សមុទ្រប្រវែង ១,២០០ ម៉ែត្រ ព្រមទាំងតម្លើងបង្គោល និងបំពាក់ភ្លើងបំភ្លឺផ្លូវ LED ដែលមានបន្ទះសូឡាភ្ជាប់ជាមួយ លើប្រវែងផ្លូវ ៣,៥០០ ម៉ែត្រ សតិបញ្ញា ២៥៥ដើម។ គម្រោងនេះនឹងប្រើប្រាស់ រយៈពេលសាងសង់ចំនួន ២២ខែ ហើយគ្រោងនឹងបញ្ចប់នៅក្នុងអំឡុងខែតុលា ឆ្នាំ២០២៣ សាងសង់ដោយក្រុមហ៊ុន MTA CONSTRUCTION .,LTD ប្រើប្រាស់ថវិកាសរុបប្រមាណ ១០,៥០ លានដុល្លារ ក្រោមឥណទានធនាគារអភិវឌ្ឍន៍ អាស៊ី(ADB) ដោយមិនរួមជាមួយនឹងថវិកាបដិភាគរបស់រាជរដ្ឋាភិបាល សម្រាប់ការងារដោះស្រាយផលប៉ះពាល់ បោសសំអាតមីន និងយុទ្ធភណ្ឌមិនទាន់ផ្ទុះផងទេ។ លោកអភិបាលខេត្តកែប សោម ពិសិដ្ឋ បានលើកឡើងថា សម្រាប់ថ្ងៃនេះការរៀបចំក្រុងពាលា បើកការដ្ឋានសាងសង់កំណាត់ផ្លូវប្របមាត់សមុទ្រ យើងអាចនិយាយបានថា ជាព្រឹត្តិការណ៍មួយថ្មីទៀត ដែលប្រជាពលរដ្ឋរស់នៅ តាមដងផ្លូវ ឬអាស្រ័យផលលើផ្លូវនេះទន្ទឹងរង់ចាំ។ បើយើងក្រឡេកទៅមើលពីអតីតកាល ប្រហែលជាជាង ១០ឆ្នាំមុន នៅទីនេះក៏មានផ្លូវសម្រាប់ធ្វើដំណើរ ដោយមិនងាយស្រួលឡើយ សូម្បីតែការធ្វើដំណើរដោយប្រើកង់ឬម៉ូតូ គឺពិតជាមានការលំបាកសម្រាប់បងប្អូន ដែលរស់នៅតំបន់នេះ។ សម្រាប់រយៈពេលប៉ុន្មានឆ្នាំចុងក្រោយនេះ ចាប់តាំងពីសម័យកាលលោកអភិបាលខេត្តកែប ហាស សារ៉េត បន្តមកលោកអភិបាលខេត្តកែប កែន សត្ថា បានធ្វើដំណើរកសាងផ្លូវនេះជាបន្តបន្ទាប់ សម្រេចបានជាផ្លូវគ្រួសក្រហម ធ្វើឱ្យដីធ្លីមានតម្លៃ សម្រួលបានដល់ការធ្វើដំណើរ ប្រជាពលរដ្ឋមានជីវភាពធូរធាមួយកម្រិត។ សម្រាប់ពេលនេះ តាមរយៈការកែលំអរនិងការស្ថាបនាបន្ថែម លើកំណាត់ផ្លូវនេះជាកំណាព្យផ្លូវអ៊ុតកៅស៊ូ AC វាពិតជាកាន់តែមាន សារៈសំខាន់ ក្នុងការឆ្លើយតបនិងតម្រូវការរបស់ប្រជាពលរដ្ឋ ហើយវាក៏ជាសរសៃឈាម សម្រាប់តភ្ជាប់តំបន់ទេសចរណ៍ ដ៏មានសក្តានុពលនៃឆ្នេរអង្កោល ទាក់ទាញបានភ្ញៀវទេសចរកាន់តែកើនឡើង ជំរុញសេដ្ឋកិច្ចមូលដ្ឋាន បង្កើតបានឱកាសការងារ រកប្រាក់ចំណូល ជីវភាព រស់នៅរបស់ប្រជាពលរដ្ឋ មានភាពប្រសើរឡើង រួមចំណែកកាត់បន្ថយភាពក្រីក្រ ឆ្លើយតបនឹងយុទ្ធសាស្ត្ររបស់រាជរដ្ឋាភិបាល។ ក្នុងឱកាសនោះដែរ លោកអភិបាលខេត្ត សោម ពិសិដ្ឋ ក្នុងនាមរដ្ឋបាលខេត្តកែប ក៏សូមគោរពថ្លែងអំណរគុណដ៏ខ្ពង់ខ្ពស់បំផុត ចំពោះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងអរគុណចំពោះធនាគារអភិវឌ្ឍន៍អាស៊ី (ADB) ក្រសួងសាធារណការនិងដឹកជញ្ជូន និងក្រសួងទេសចរណ៍ ដែលបានផ្ដល់និងសម្របសម្រួល ផ្ដល់គម្រោងនេះដល់ប្រជាពលរដ្ឋខេត្តកែប។ លោកអភិបាលខេត្ត ក៏បានអំពាវនាវ ដល់បងប្អូនប្រជាពលរដ្ឋ ដែលបានរស់នៅ ឬធ្វើដំណើរតាមដងផ្លូវនេះ មេត្តាយោគយល់អធ្យាស្រ័យពីផលប៉ះពាល់ ឬផលរំខាន ដែលកើតមានឡើងក្នុងកំឡុងពេលនៃការស្ថាបនាផ្លូវនេះ និងសូមមេត្តាចូលរួមថែរក្សា ក្រោយពីស្ថាបនារួចរាល់។ លោកអភិបាលខេត្ត ក៏បានណែនាំនិងអំពាវនាវផងដែរ ដល់ប្រជាពលរដ្ឋនិងសាធារណជនទូទៅ សូមមេត្តាចូលរួមទប់ស្កាត់ ការឆ្លងរីករាលដាលនៃជំងឺកូវីដ ១៩ តាមរយៈការអនុវត្តវិធានការសុខាភិបាល និងគោរពប្រតិបត្តិតាមឲ្យ បានខ្ជាប់ខ្ជួន នូវវិធានការ ៣កុំ និង ៣ ការពារ និង២ចូលរួមោ ហ៊ុន សែន ដើម្បីជៀសផុតពីការឆ្លងជំងឺ ដ៏កាចសាហាវនេះ ចូលមកក្នុងគ្រួសារ និងសហគមន៍យើង។ លោក វង្ស ពិសិដ្ឋ បានលើកឡើងថា ផ្លូវនេះជាផ្លូវរបៀងដ៏ធំរបស់អាស៊ាន តភ្ជាប់ប្រទេសថៃ កម្ពុជា និងវៀតណាម ហើយផ្លូវនេះមានប្រយោជន៍ច្រើនណាស់ សម្រាប់ប្រជាពលរដ្ឋរស់នៅតាមដងផ្លូវ ក្រោយពេលផ្លូវនេះស្ថាបនារួចរាល់ ពួកគាត់នឹងមានទឹកចិត្តរីករាយយ៉ាងខ្លាំងជាក់ជាមិនខានឡើយ ខណ: ពេលមានផ្លូវល្អ នឹងអាចទាក់ទាញទេសចរណ៍ឲ្យមកច្រើន បង្កើនឱកាសរកប្រាក់ចំណូល ជំរុញដល់ជីវភាពកាន់តែប្រសើរឡើង៕