(បាត់ដំបង)៖ ក្រសួងសាធារណការ និងដឹកជញ្ជូន និងរដ្ឋបាលខេត្តបាត់ដំបង នាព្រឹកថ្ងៃទី១០ ខែកុម្ភ: ឆ្នាំ២០២២ បានបើកការដ្ឋានសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ នៅចំណុចភូមិតាគម ឃុំពាមឯក ស្រុកឯកភ្នំ ខេត្តបាត់ដំបង ក្រោមកម្ចី ADB, AFD និងជំនួយឥតសំណងពី EU ក្នុងតម្លៃជិត ៣០លានដុល្លារ (២៩,៤៦២,៨៤២ដុល្លារ)។ លោក វង្ស ពិសិដ្ឋ អនុរដ្ឋលេខាធិការ តំណាងទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោក សុខ លូ អភិបាលខេត្តបាត់ដំបង បានអញ្ជើញក្រុងពាលី និងបើកការដ្ឋានសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់មួយនេះ។ លោក វង្ស ពិសិដ្ឋ បានបញ្ជាក់ថា ដោយមានការយកចិត្តទុកដាក់ពីថ្នាក់ដឹកនាំកំពូលរបស់រាជរដ្ឋាភិបាល ពិសេសក្នុងនាមក្រសួងជំនាញ តែងបានសហការជាមួយរដ្ឋបាលខេត្តបាត់ដំបងរហូតដល់ទទួលបានសម្រេច និងត្រូវបានអនុវត្ត អនុគម្រោងនេះ ឡើងលើកទឹកដីខេត្តបាត់ដំបង ដំបូងគេ ព្រមទាំងមានគាំទ្រពីធនាគារ ក្រោមកម្ចី ឥណទានរបស់ ADB , AFD និងជំនួយឥតសំណងពីសហគមអឺរ៉ុប (EU) ដែលមានទំហំទឹកប្រាក់ ២៩,៤៦២,៨៤២ដុល្លារ។ លោក វង្ស ពិសិដ្ឋ បានបន្តថា បន្ទាប់ពីបានចុះកិច្ចសន្យាទទួលអនុគម្រោងនេះជាបន្តបន្ទាប់ហើយ ក៏បានសម្រេចឲ្យក្រុមហ៊ុនចំនួន២ជាអ្នកសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងបាត់ដំបងផ្នែកខាងលិចស្ទឹងសង្កែចាប់ពីថ្ងៃចុះកិច្ចសន្យា ២៩ខែធ្នូ ឆ្នាំ២០២១ ទឹកប្រាក់កិច្ចសន្យា២៩,៤៦២,៨៤២ដុល្លារ និងប្រើរយ:ពេលសាងសង់ ៣ឆ្នាំ ចាប់ពីខែសីហា ឆ្នាំ២០២១ដល់ដល់ខែសីហា ២០២៤។ អ្នកម៉ៅការសាងសង់ត្រូវផ្តល់ការបណ្តុះបណ្តាលដល់បុគ្គលិក និយោជិក និងធ្វើប្រតិបត្តិការ និងថែទាំការងាររយ:ពេល៦ខែ ចាប់ពីថ្ងៃបញ្ចប់កិច្ចការងារសាងសង់នេះផងដែរ។ លោក ព្រួញ រិទ្ធីថា ប្រធានមន្ទីសាធារណការនិងដឹកជញ្ជូនខេត្តបាត់ដំបង បានបញ្ជាក់ថា កន្លងមក ដោយសារការអភិវឌ្ឍទីក្រុងហេដ្ឋារចនាសម្ព័ន្ធផ្លូវថ្នល់ ប្រព័ន្ធប្រឡាយទឹក សំណង់អគារលំនៅស្ថាន ព្រមទាំងកំណើនប្រជាជនដែលរស់នៅក្នុងក្រុងបាត់ដំបងទាំងមូលក៏ដូចជាប៉ែកខាងលិចស្ទឹង មានការកើនឡើង យ៉ាងឆាប់រហ័ស ដែលធ្វើឱ្យបញ្ហាចោទឡើងពាក់ព័ន្ធជាមួយនឹងការគ្រប់គ្រងទឹកកខ្វក់សំណល់ ដែលជាកង្វល់ដ៏ធំមួយទាមទារត្រូវយកចិត្តទុកដាក់ខ្ពស់លើការដោះស្រាយទាន់ពេលវេលា និងចំគោលដៅ។ ដើម្បីចូលរួមចំណែក ក្នុងការដោះស្រាយបញ្ហាខាងលើ ក្រសួងសាធារណការ និងដឹកជញ្ជូន រួមជាមួយភាគីពាក់ព័ន្ធ និងដៃគូអភិវឌ្ឍន៍ ផ្សេងទៀត បានដាក់ចេញផែនការសកម្មភាពក្នុងការគ្រប់គ្រងទៅលើទឹកកខ្វក់ តាមរយៈកិច្ចសហការជាមួយក្រសួង និងស្ថាប័នពាក់ព័ន្ធនានាក្នុងការរៀបចំប្រព័ន្ធលូទឹកកខ្វក់ និងប្រព័ន្ធលូទឹកភ្លៀងដាច់ដោយឡែកពីគ្នា និងបង្កើតអាង ប្រព្រឹត្តកម្មទឹកកខ្វក់ឱ្យបានសមស្របដើម្បីប្រមូល និងធ្វើប្រព្រឹត្តកម្មសម្អាតទឹកកខ្វក់មុននឹងបង្ហូរចូលទៅក្នុងប្រភព ទឹកធម្មជាតិ។ លោក សុខ លូ បានជំរុញឲ្យប្រជាពលរដ្ឋគ្រប់រូបទៅចាក់វ៉ាក់សាំងការពារឆ្លងរោគកូវីដ១៩ឲ្យបានគ្រប់គ្នានូវដូសទី១ដល់ដូសទី៣និងទី៤ ដែលជាដូសជំរុញ ខណ:ថ្មីៗនេះមេរោគបម្លែងថ្មី អូមីក្រុង កំពុងផ្ទុះឆ្លងនៅភ្នំពេញ១ថ្ងៃ ២០០នាក់។ កន្លងមកប្រជាពលរដ្ឋទូទាំងប្រទេស កុំតែបានថ្នាក់ដឹកនាំកំពូល គឺសម្តេចតេជោនាយករដ្ឋមន្រ្តី ហ៊ុន សែន មានការឈ្លាវៃ និងបានឲ្យក្រសួងសុខាភិបាលសហការជាមួយរដ្ឋបាលខេត្តទាំង២៥រាជធានី-ខេត្តចុះចាក់វ៉ាក់សាំងជូនប្រជាពលរដ្ឋនៅតាមសហគម ការពារបានទាន់ពេលវេលា។ លោកអភិបាលខេត្ត ក៏បានអំពាវនាវដល់ប្រជាប្រជាពលរដ្ឋទូទៅផងដែរ នាំគ្នាគោរពច្បាប់ចរាចរណ៍ផ្លូវគោកដល់អ្នកបើកបរយាន្តយន្តគ្រប់ប្រភេទ គឺរឹតបន្តឹងច្បាប់ ដើម្បីកាត់បន្ថយអត្រាស្លាប់និងរងគ្រោះដោយសារគ្រោះថ្នាក់ចរាចរណ៍ ព្រមទាំងរំលឹកពីការប្រើប្រាស់គ្រឿងញៀន កុំសាកល្បងឲ្យសោះព្រោះវាអាចធ្វើឲ្យប៉ះពាល់ដល់សុខភាពមនុស្សនៅតាមសហគមន៍៕