ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ឱ្យដឹងថា ក្រសួង កំពុងពិភាក្សាលើការបង្កើតប្រព័ន្ធតេឡេក្រាមជូនសាធារណជនប្រើប្រាស់ដោយសេរី ក្នុងការផ្តល់ព័ត៌មានអំពីស្ថានភាពចរាចរណ៍ផ្លូវគោកទាន់ហេតុការណ៍ ដើម្បីបង្ការទប់ស្កាត់គ្រោះថ្នាក់ចរាចរណ៍ និងអំពើល្មើសច្បាប់ស្តីពីចរាចរណ៍ផ្លូវគោក។ ក្នុងកិច្ចប្រជុំនាថ្ងៃទី៥ ខែមករា លោកទេសរដ្ឋមន្ត្រី ស៊ុន ចាន់ថុល បានឱ្យដឹងថា ការបង្កើតប្រព័ន្ធតេឡេក្រាមនេះ គឺយោងតាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ លោកទេសរដ្ឋមន្ត្រី បានលើកឡើងថា ក្រសួង កំពុងពិភាក្សាជាមួយអគ្គស្នងការនគរបាលជាតិក្រសួងមហាផ្ទៃ ដើម្បីជំរុញយន្តការនៃការប្រើប្រាស់ប្រព័ន្ធតេឡេក្រាមនេះ ឱ្យមានលក្ខណៈអាចដំណើរការបានដោយនិរន្តរភាព និងមានភាពចាស់ទុំ បង្កភាពងាយស្រួលជូនប្រជាពលរដ្ឋក្នុងការប្រើប្រាស់។ ជាងនេះទៀត បើតាមលោក ស៊ុន ចាន់ថុល ក្រសួង ក៏កំពុងពិនិត្យលទ្ធភាពផងដែរក្នុងការដាក់បញ្ចូលកម្មវិធី (App) និងយន្តការបច្ចេកវិទ្យាស្វ័យប្រវត្តិមួយចំនួន ដើម្បីធ្វើឱ្យការគ្រប់គ្រង បញ្ជូន និងទទួលទិន្នន័យសម្រាប់មន្ត្រី និងនគរបាលពាក់ព័ន្ធកាន់តែមានភាពងាយស្រួល ងាយស្រួលគ្រប់គ្រង និងមានទិន្នន័យសម្រាប់បង្កើតជាផែនការយុទ្ធសាស្ត្រ។ សូមបញ្ជាក់ថា កាលពីថ្ងៃទី៣ ខែមករា ក្នុងពិធីបើកការដ្ឋានគម្រោងសាងសង់ លើកកម្រិតគុណភាព ផ្លូវជាតិលេខ៤៨ សម្តេចតេជោ ហ៊ុន សែន បានណែនាំថា “មានបញ្ហាមួយ ខ្ញុំគួរតែនិយាយដែរ រឿងច្បាប់ចរាចរណ៍ ខ្ញុំសុំថាឯកឧត្តម ស៊ុន ចាន់ថុល ទៅពិភាក្សាជាមួយសម្តេចក្រឡាហោម ថាតើអាចធ្វើបានទេខាងផ្នែកចរាចរណ៍ផ្លូវគោក យើងអនុញ្ញាតឱ្យមានខាងនគរបាលរបស់យើងបង្កើតតេលេក្រាម ឱ្យប្រជាពលរដ្ឋគាត់ជួយថតហើយបញ្ជូនចូលក្នុងគ្រុបតេឡេក្រាម ដែលយើងដាក់ប្រចាំការ ខ្ញុំថាបើធ្វើអាហ្នឹងបាន ហើយអាហ្នឹងជាការផ្តល់មតិ របស់សាធារជនរបស់យើង ដែលផ្តល់មតិមក ខ្ញុំថាគួរតែមានការទទួលព័ត៌មាន...! អញ្ចឹងបើយើងប្រើប្រព័ន្ធតេឡេក្រាម អាចជួយយើងបានអ្នកណាល្មើសច្បាប់ យើងថតអ្នកណាល្មើស និងថតទាំងលេខឡាន ដើម្បីបញ្ជូនក្នុងគ្រុបតេឡេក្រាម ឱ្យនគរបាលអនុវត្តច្បាប់...!។” សម្រាប់សម្តេចតេជោ ហ៊ុន សែន ការផ្តល់យោបល់ក្នុងការបង្កើតគ្រុបតេឡេក្រាមនេះ គឺដើម្បីផ្តល់ភាពងាយស្រួលសម្រាប់ប្រជាពលរដ្ឋថត និងរាយការណ៍ចំពោះបទល្មើសចរាចរណ៍ផ្លូវគោក ជូនដល់សមត្ថកិច្ចជំនាញ ដើម្បីអនុវត្តច្បាប់លើបុគ្គលដែលបានប្រព្រឹត្តិល្មើសនឹងច្បាប់ចរាចរណ៍ផ្លូវគោក ជាពិសេសអ្នកបើកបរលើសល្បឿនកំណត់ បើកបរបញ្ច្រាសទិស និងការបើកបរល្មើសច្បាប់ផ្សេងៗទៀត ដែលហេតុបង្កឱ្យមានចំនួនគ្រោះថ្នាក់ចរាចរណ៍បន្តកើនឡើង រហូតមានអ្នកស្លាប់ និងរបួសជាបន្តបន្ទាប់ ជាដើម៕