[Cambonomist] - តើអ្នកយកចិញ្ចើមផ្លូវមកប្រកបអាជីវកម្មជាទង្វើបំពានច្បាប់ដែរទេ? ហើយរដ្ឋមានចំណាត់ការបែបណា?
2021-11-30
Go to the website published Cambonomist
មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានអះអាងថា ការប្រើប្រាស់ចិញ្ចើមផ្លូវសម្រាប់ប្រកបអាជីវកម្មពីសំណាក់ប្រជាពលរដ្ឋមួយចំនួនដើម្បីបម្រើផលប្រយោជន៍ផ្ទាល់ខ្លួនជាទង្វើនឹងខុសច្បាប់ ព្រោះវាមិនត្រឹមតែធ្វើឲ្យប៉ះពាល់ដល់សណ្តាប់ធ្នាប់សាធារណៈប៉ុណ្ណោះទេ តែវាជាការរួមចំណែកក្នុងការធ្វើឲ្យអ្នកដំណើរអាចប្រឈមគ្រោះថ្នាក់ចរាចរណ៍ និងខូចគុណភាពផ្លូវជាដើម។
អ្នកយកចិញ្ចើមផ្លូវមកប្រកបអាជីវកម្ម ត្រូវបានចាត់ទុកជាទោសបញ្ញត្តិ ដែលអាចអនុវត្តពេលណាក៏បាន។ តែយ៉ោងណា ក្រសួងបន្តស្នើឲ្យពលរដ្ឋបញ្ឈប់ប្រើប្រាស់ចិញ្ចើមផ្លូវសម្រាប់ធ្វើអាជីវកម្ម ដើម្បីរួមចំណែកថែរក្សាសណ្តាប់ធ្នាប់សាធារណៈ កាត់បន្ថយគ្រោះថ្នាក់ចរាចរណ៍ ការចំណាយ និងថែរក្សាគុណភាពផ្លូវជាដើម។ មន្ត្រីជាន់ខ្ពស់ដដែលរូបនេះទទួលស្គាល់ថា ការថែទាំផ្លូវ គឺជាកាតព្វកិច្ចរបស់ក្រសួង និងស្ថាប័នពាក់ព័ន្ធនានា តែវាក៏ទាមទារឲ្យមានការចូលរួមពីប្រជាពលរដ្ឋ ដែលជាអ្នកប្រើប្រាស់ផងដែរ។
នៅក្នុងកម្មវិធីឆ្លើយតបសំណួររបស់ប្រជាពលរដ្ឋ ដែលរៀបចំឡើងដោយ ក្រសួងសាធារណៈការនិង ដឹកជញ្ជូន ក្រោមប្រធានបទ«ការថែទាំផ្លូវថ្នល់ និងការចូលរួមពីប្រជាពលរដ្ឋ» ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូនបានលើកឡើងពីទោសទណ្ឌរបស់អ្នក ដែលប្រើប្រាស់ចិញ្ចើមផ្លូវ និងទ្រូងផ្លូវសាធារណៈបម្រើផលប្រយោជន៍ផ្ទាល់ខ្លួន។ ឯកឧត្តមអះអាងថា ការយកចិញ្ចើមផ្លូវសាធារណៈមកប្រកបអាជីវកម្មជាទង្វើខុសច្បាប់ដែលអ្នកប្រព្រឹត្តត្រូវជាប់ទោសបញ្ញត្តិ ដែលអាចអនុវត្តនៅនឹងកន្លែងពេលណាក៏បាន។ តែយ៉ាងណាឯកឧត្តមបានគូសបញ្ជាក់ថា ក្រសួងមិនចង់ឃើញអ្នកប្រព្រឹត្តទង្វើបែបនេះត្រូវរងចំណាត់ការនិងវិធានការក្តៅបែបនេះនោះទេ ដោយគ្រាន់តែបន្តស្នើឲ្យពលរដ្ឋបញ្ឈប់ការយកចិញ្ចើមផ្លូវ ឬទ្រូងផ្លូវមកប្រកបអាជីវកម្មបន្តទៀត។
សម្រាប់ ឯកឧត្តម យិត បុណ្ណា ការប្រើប្រាស់ចិញ្ចើមផ្លូវសម្រាប់ប្រកបអាជីវកម្មមិនត្រឹមតែធ្វើឲ្យប៉ះពាល់ដល់សណ្តាប់ធ្នាប់សាធារណប៉ុណ្ណោះទេ តែវាជាការរួមចំណែកមួយក្នុងការធ្វើឲ្យអ្នកដំណើរអាចប្រឈមនឹងគ្រោះថ្នាក់ចរាចរណ៍ ដោយយថាហេតុ។ ព្រោះកាលណាពលរដ្ឋយកចិញ្ចើមផ្លូវមកប្រកបអាជីវកម្ម វាបង្ខំឲ្យអ្នកដំណើរដែលធ្វើដំណើរក្នុងល្បឿនយឺតរួមមានអ្នកថ្មើជើង អ្នកជិះកង់ និងម៉ូតូជាដើម ត្រូវបង្វែមកដើរ ឬ ជិះក្នុងគន្លងសម្រាប់យានជំនិះដែលមានល្បឿនលឿន ដែលជាហានិភ័យក្នុងការជួបគ្រោះថ្នាក់។
រដ្ឋលេខាធិការក្រសួងសាធារណការរូបនេះ បានគូសបញ្ជាក់ទៀតថា ការយកចិញ្ចើមផ្លូវមកប្រកបអាជីវកម្ម ក៏ជាមូលហេតុចម្បងមួយក្នុងការបង្កឲ្យមានការកកស្ទះចរាចរណ៍សម្រាប់អ្នកធ្វើដំណើរតាមដងផ្លូវ ជាពិសេសនៅទីប្រជុំជន និងទីក្រុង ដែលធ្វើឲ្យអ្នកដំណើរត្រូវចំណាយថវិកា និងពេលវេលាច្រើនជាងមុន។ លើសពីនេះ ទង្វើនេះក៏ជាកត្តារួមចំណែកធ្វើឲ្យមានការស្ទះលូ ចិញ្ចើមផ្លូវគ្របដណ្តប់ដោយសំរាម និងដី និង ធ្វើឲ្យផ្លូវឆាប់ខូចគុណភាពជាដើម។
ទន្ទឹមនឹងនេះឯកឧត្តម យិត បុណ្ណា ស្នើឲ្យពលរដ្ឋចូលរួមសហការជាមួយ ក្រសួងសាធារណការ និងដឹកជញ្ជូននិងស្ថាប័នពាក់ព័ន្ធនានាថែទាំគុណភាពផ្លូវទាំងអស់គ្នា ដើម្បីចូលរួមកាត់បន្ថយការចំណាយថវិការបស់រដ្ឋ ក៏ដូចជារក្សាគុណភាពផ្លូវឲ្យមានភាពយូរអង្វែង។ ក្រសួងទទួលស្គាល់ថា ការថែទាំគុណភាពផ្លូវវាជាកាតព្វកិច្ចរបស់ក្រសួង ក៏ប៉ុន្តែក្រសួងតែមួយមិនអាចរក្សាផ្លូវឲ្យមានគុណភាពយូរអង្វែងបាននោះទេ ពោលគឺវាទាមទារឲ្យមានការចូលរួមពីប្រជាពលរដ្ឋ និងអ្នកប្រើប្រាស់ទាំងអស់គ្នា៕
