លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីវឌ្ឍនភាពការងារវិស័យសាធារណការ និងដឹកជញ្ជូន (MPWT Live Show) ក្រោមប្រធានបទ៖ " ការឈ្វេងយល់ពីផ្លាកលេខពិសេស និងពិសេសផ្ទាល់ខ្លួនសម្រាប់រថយន្ត " កាលពី​ថ្ងៃ៩រោច ខែភទ្របទ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃព្រហស្បតិ៍ ទី៣០ ខែកញ្ញា ឆ្នាំ២០២១។ ក្នុង​ឱកាសនោះ លោកជំទាវ កុយ សុដានី បានគូសបញ្ជាក់អំពីសារៈសំខាន់នៃកត្តាសុខសន្តិភាព ស្ថិរភាពនយោបាយ និងការបង្រួបបង្រួមជាតិ ក្រោមការដឹកនាំប្រកប ដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានជំរុញឱ្យមានកំណើនសេដ្ឋកិច្ចជាតិលើគ្រប់វិស័យ និងបានផ្តល់ឱកាសឱ្យក្រសួងសាធារណការ និងដឹកជញ្ជូន ស្វែងរកវិធីធ្វើយ៉ាងណាដើម្បីឱ្យហេដ្ឋារចនាសម្ព័ន្ធដឹកជញ្ជូនផ្លូវគោក ផ្លូវទឹក ផ្លូវដែក និងកំពង់ផែ មានការតភ្ជាប់ប្រទាក់ក្រឡាគ្នា ដើម្បីផ្ដល់ជូនជាសេវាដល់បងប្អូនប្រជាពលរដ្ឋប្រកបដោយភាពងាយស្រួល។ ជាមួយគ្នានេះដែរ លោក​ជំទាវរដ្ឋលេខាធិការ​ បាន​មាន​ប្រសាសន៍ថា ក្រសួងបានចូលរួមជាមួយរាជរដ្ឋាភិបាល ក្នុងការបម្រើសេវាជូនបងប្អូនប្រជាពលរដ្ឋ ឱ្យមានភាពរលូន និងប្រសិទ្ធភាពខ្ពស់ តាមរយៈការរៀបចំកំណែទម្រង់ជាបន្តបន្ទាប់ លើផ្លាកលេខរថយន្តឱ្យមានភាពល្អប្រសើរឡើង និងជាជម្រើសបន្ថែមថែមទៀតជូនបងប្អូនប្រជាពលរដ្ឋ យោងតាមអនុសាសន៍ណែនាំដ៏ខ្ពង់ខ្ពស់ របស់សម្ដេចតេជោនាយករដ្ឋមន្ត្រី ដែលបានលើកឡើងថា ធ្វើឱ្យលឿន ធ្វើឱ្យមានប្រសិទ្ធភាព។ ទន្ទឹមនឹងនេះ លោកជំទាវ បានគូសបញ្ជាក់ថា ពាក់ព័ន្ធនឹងការបំពាក់ផ្លាកលេខរថយន្តកន្លងមក ក្រសួងសង្កេតឃើញថា មានការរៀបចំជាប្រភេទលេខដែលចុះតាមលេខរៀង តំាងពីសម័យសង្គមរាស្រ្តនិយម ។ ប៉ុន្តែតាមការអភិវឌ្ឍសង្គម និងដោយមើលឃើញ​ពីតម្រូវការជាក់ស្តែងរបស់ប្រជាពលរដ្ឋ នៅឆ្នំា២០១៧ក្រសួងបានរៀបចំឱ្យមានការលក់លេខពិសេស ដែលអនុញ្ញាតឱ្យមានការផ្លោះស៊េរីលេខចុះបញ្ជី ព្រមទំាងការជ្រើសរើសលេខល្អ លេខសំណាង ហើយក្រោយមកនៅឆ្នាំ២០២០ ក្រសួងបានរៀបចំឱ្យមានការលក់លេខចុះបញ្ជីពិសេសផ្ទាល់ខ្លួនបន្ថែមទៀត ដែលជាគំនិតច្នៃប្រឌិតមួយថ្មី និងជាការផ្តល់ជម្រើសដល់អ្នកប្រើប្រាស់បន្ថែមទៀត ។ បច្ចុប្បន្នប្រជាពលរដ្ឋមានសិទ្ធិអាចជ្រើសរើសលេខចុះបញ្ជីពិសេសលេខផ្ទាល់ខ្លួនណាមួយ ដែលពេញចិត្តសម្រាប់ចុះបញ្ជីបំពាក់លើរថយន្តរបស់ខ្លួនបាន។ លោកជំទាវរដ្ឋលេខាធិការ បានគូសបញ្ជាក់បន្ថែមទៀតថា លេខចុះបញ្ជីនេះអាចដាក់ជាឈ្មោះរបស់ខ្លួន ឬអាចជាបង្គុំមានជាលេខ ឬ/និងអក្សរឡាតាំង តែមិនឱ្យលើសពី៨ខ្ទង់ និងមិនអនុញ្ញាតចំពោះការបង្គុំលេខចុះបញ្ជីណាដែលមានអត្ថន័យ ឬសូរសព្ទដែលប៉ះពាល់ដល់សណ្តាប់ធ្នាប់សាធារណៈ ឬឈ្មោះទីកន្លែងប្រវត្តិសាស្រ្តឡើយ។ ការរៀបចំនេះក៏បានអនុញ្ញាតឱ្យម្ចាស់កម្មសិទ្ធិលេខចុះបញ្ជីមានសិទ្ធិរក្សាទុកលេខ ចុះបញ្ជីរបស់ខ្លួនសម្រាប់ចុះបញ្ជីបំពាក់លើរថយន្តរបស់ខ្លួន ដែលមិនទាន់ចុះបញ្ជីមួយផ្សេងទៀតបាន ហើយយន្តការនេះជាចំណែកមួយនៃការបង្កើន និងប្រមូលចំណូលថវិការជូនរដ្ឋផងដែរ។ សូមបញ្ជាក់ថា នីតិវិធីនៃការចុះបញ្ជីលេខពិសេសផ្ទាល់ខ្លួន ក៏ដូចជានីតិវិធីនៃការចុះបញ្ជីលេខធម្មតា គឺរថយន្តមួយអាចចុះបញ្ជីជាមួយនឹងលេខចុះបញ្ជីបានតែមួយគត់ និងអាចប្រើប្រាស់បានរហូត។ ទាំងលេខចុះបញ្ជីពិសេស និងពិសេសផ្ទាល់ខ្លួន នៅពេលលក់រថយន្តទៅអ្នកផ្សេង ម្ចាស់កម្មសិទ្ធិអាចស្នើសុំរក្សាទុកលេខចុះបញ្ជីរបស់ខ្លួនសម្រាប់ទុកចុះបញ្ជីលើរថយន្តថ្មីមួយទៀតដែលមិនទាន់ចុះបញ្ជី ឬអាចលក់ទំាងរថយន្ត និងផ្លាកលេខទៅជាមួយគ្នាក៏បាន៕