ភ្នំពេញ៖ គណៈកម្មការអន្តរក្រសួងគ្រប់គ្រងការចុះបញ្ជីលេខពិសេស លេខពិសេសផ្ទាល់ខ្លួន បានឲ្យដឹងថា ចាប់តំាងពីការបង្កើតឱ្យមានកម្មវិធីលក់ផ្លាកលេខពិសេស និងពិសេសផ្ទាល់ខ្លួន រហូតមកដល់ថ្ងៃទី២៥ ខែកញ្ញា ឆ្នាំ២០២១នេះ ផ្លាកលេខពិសេសលក់បានចំនួន១៧៩.០៣៤ ផ្លាក ទទួលបានចំណូលថវិកា ១៨៦.៣១២.៦៣០.៨០០ រៀល ស្មើនឹង៤៦.៥៧៨.១៥៨ ដុល្លារ ផ្លាកលេខ ពិសេសផ្ទាល់ខ្លួនលក់បានចំនួន ៧៥៧៨ ផ្លាក ទទួលបានចំណូលថវិកា ៥៩.៩១២.៦០២.៧០០ រៀល ស្មើនឹង១៤.៩៧៨.១៥១ ដុល្លារ ចំណូលពីការលក់លេខចុះបញ្ជី៩ខែ ឆ្នាំ២០២១ បានចំនួនជាង៤៩ ពាន់លានរៀល ធៀបនឹង៩ខែឆ្នាំ២០២០ បានចំនួន៥២ពាន់លានរៀល ថយចុះចំនួន៤,២៨%។ គណៈកម្មការអន្តរក្រសួងខាងលើនេះ បញ្ជាក់ថា «ថវិកាដែលបានមកពីការលក់ មួយចំណែកចូលរួមការងារសប្បុរសធម៌ ការកសាងហេដ្ឋារចនាសម្ព័ន្ធ ថវិកាជាតិ និងលើកទឹកចិត្តមន្រ្តីរាជការ»។ សូមបញ្ជាក់ថា លេខចុះបញ្ជីនេះអាចដាក់ជាឈ្មោះរបស់ខ្លួន ឬអាចជាបង្គុំមានជាលេខ ឬ/និង អក្សរឡាតាំង តែមិនឱ្យលើសពី៨ខ្ទង់ និងមិនអនុញ្ញាតចំពោះការបង្គុំលេខចុះបញ្ជីណាដែលមានអត្ថន័យ ឬសូរស័ព្ទដែលប៉ះពាល់ដល់សណ្តាប់ធ្នាប់សាធារណៈ ឬឈ្មោះទីកន្លែង ប្រវត្តិសាស្រ្តឡើយ៕