[Phnom Penh Post] - បញ្ហាប្រឈមថ្មីៗរបស់រដ្ឋសមាជិក CICA នៅក្នុងឧស្សាហកម្មដឹកជញ្ជូនក្នុងបរិបទនៃជំងឺរាតត្បាតជាសកល
2021-09-17
Go to the website published Phnom Penh Post
ភ្នំពេញៈ របៀបវារៈសំខាន់ៗចំនួន ៤ ត្រូវបានលើកយកមកបង្ហាញក្នុងសិក្ខាសាលាស្តីពី«ការអភិវឌ្ឍច្រករបៀងដឹកជញ្ជូន និងចក្ខុវិស័យសម្រាប់ការធ្វើឱ្យប្រសើរឡើងនៃការដឹកជញ្ជូនក្នុងចំណោមប្រទេស CICA» (Conference on Interaction and Confidence Building Measures in Asia)។ នេះបើតាមសេចក្តីប្រកាសព័ត៌មានរបស់ក្រសួងសាធារណការ និងដឹកជញ្ជូន។
សិក្ខាសាលាដែលរៀបចំឡើងដោយក្រសួងឧស្សាហកម្ម និងអភិវឌ្ឍន៍ហេដ្ឋារចនាសម្ព័ន្ធ នៃសាធារណរដ្ឋ Kazakhstan នេះត្រូវបានធ្វើឡើងតាមរយៈប្រព័ន្ធវីដេអូ កាលពីថ្ងៃទី ១៦ ខែកញ្ញា ឆ្នាំ២០២១ ដោយមានការចូលរួមពីតំណាងអង្គការអន្តរជាតិនានា និងតំណាងស្ថាប័នទាំងឡាយអញ្ជើញមកពីវិស័យដឹកជញ្ជូននៃរដ្ឋជាសមាជិក CICA។
ចំណុចទាំង ៤ នោះរួមមានវិធានការឆ្លើយតបបញ្ហាប្រឈមថ្មីៗរបស់រដ្ឋរបស់សមាជិក CICA នៅក្នុងឧស្សាហកម្មដឹកជញ្ជូនក្នុងបរិបទនៃជំងឺរាតត្បាតជាសកល, បង្កើនប្រសិទ្ធភាពដំណើរការដឹកជញ្ជូន ដើម្បីលើកកម្ពស់គុណភាពនៃការដឹកជញ្ជូន និងកាត់បន្ថយថ្លៃដើមដឹកជញ្ជូន, ការបង្កើនភាពទាក់ទាញនៃច្រករបៀងដឹកជញ្ជូនអន្តរជាតិរបស់ CICA, និងទស្សនវិស័យសម្រាប់កិច្ចសហប្រតិបត្តិការរវាងរដ្ឋជាសមាជិក CICA និងសកម្មភាពរួមគ្នាក្នុងវិស័យដឹកជញ្ជូន។
វិស័យដឹកជញ្ជូនត្រូវបានគេដឹកថា ទទួលរងផលប៉ះពាល់យ៉ាងខ្លាំងចាប់តាំងពីផ្ទុះឡើងនៃជំងឺកូវីដ ១៩។ ប្រទេសកម្ពុជា បានអះអាងថា ការនាំចេញផលិតផលសំខាន់ៗមួយចំនួន ពិសេសអង្ករទៅកាន់ទីផ្សារអឺរ៉ុប បានធ្លាក់ចុះដោយសារបញ្ហាកង្វះកុងតឺន័រ និងការកើនឡើងតម្លៃដ៏ខ្ពស់មិនធ្លាប់មាន ដែលបានអូសបន្លាយពេលរហូតមកដល់ពេលនេះ។
លោក ឈៀង ពេជ្រ អគ្គនាយកនៃអគ្គនាយកដ្ឋានភ័ស្តុភារកម្ម នៃក្រសួងសាធារណការ និងដឹកជញ្ជូន ដែលបានដឹកនាំគណៈប្រតិភូក្រសួងចូលរួមក្នុងសិក្ខាសាលានេះបានលើកឡើងថា សិក្ខាសាលានេះពិតជាមានសារៈសំខាន់ណាស់ក្នុងវិស័យដឹកជញ្ជូន ពិសេសនៅក្នុងបរិបទនៃការរីករាលដាលជំងឺរាតត្បាតសកលកូវីដ១៩។
តាមរយៈសិក្ខាសាលានេះ លោក ឈៀង ពេជ្រ ក៏បានចែករំលែកអំពីបញ្ហាមួយចំនួននៃវិស័យដឹកជញ្ជូននៅកម្ពុជា ដែលរួមមាន រចនាសម្ព័ន្ធគ្រប់គ្រងនៅក្នុងផ្នែកភ័ស្តុភារកម្មនៅកម្ពុជា, ការអភិវឌ្ឍផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ, និងការអនុវត្តផែនការមេភ័ស្តុភារកម្ម។
CICA គឺជាវេទិកាអន្តររដ្ឋាភិបាលមួយសម្រាប់បង្កើនកិច្ចសហប្រតិបត្តិការឆ្ពោះទៅរកការជំរុញសន្តិភាពសន្តិសុខនិងស្ថិរភាពនៅអាស៊ី។ វាគឺជាវេទិកាមួយ ដែលមានទំនាក់ទំនងជិតស្និទ្ធរវាងសន្តិភាព សន្តិសុខ និងស្ថិរភាពនៅអាស៊ី និងនៅលើពិភពលោក។
បង្កើតឡើងក្នុងឆ្នាំ១៩៩៩ បច្ចុប្បន្ន CICA មានប្រទេសសមាជិកចំនួន ២៧ ប្រទេស ដោយមានលេខាធិកាដ្ឋាននៅក្នុងទីក្រុង Nur-Sultan ប្រទេស Kazakhstan៕
