លោក ឈួន វិន ប្រធានក្រុមការងារសហភាពសហព័ន្ធយុវជនកម្ពុជាវិស័យសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងារស.ស.យ.ក វិស័យសាធារណការ និងដឹក ជញ្ជូន ថ្ងៃសុក្រ ១២កើត ខែស្រាពណ៍ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២០ ខែសីហា ឆ្នាំ២០២១ លោក ឈួន វិន ប្រធានក្រុមការងារសហភាពសហព័ន្ធយុវជនកម្ពុជា វិស័យសាធារណការ និងដឹកជញ្ជូន(ស.ស.យ.ក) បានអញ្ជើញដឹកនាំកិច្ចប្រជុំការងាររបស់ក្រុមការងារ ស.ស.យ.ក វិស័យសាធារណការ និងដឹកជញ្ជូន ដោយមានការចូលរួមពីសមាជិកសមាជិកាក្រុមការងារ តាមប្រព័ន្ធវីដេអូពីចម្ងាយ។ អង្គប្រជុំបានផ្តោតការពិភាក្សាលើរបៀបវារៈសំខាន់ៗដូចជា៖ ១. ផ្សព្វផ្សាយរបាយការណ៍ស្ដីពីលទ្ធផលកិច្ចប្រជុំ គណៈកម្មាធិការកណ្ដាលសហភាពសហព័ន្ធយុវជនកម្ពុជាកាលពីថ្ងៃទី៧ ខែសីហា ឆ្នាំ២០២១តាម ប្រព័ន្ធអនឡាញ ២. ប្រកាសសេចក្តីសម្រេចស្តីពី: - ការទទួលស្គាល់សមាសភាពបំពេញបន្ថែមរបស់ក្រុមការងារ សហភាពសហព័ន្ធយុវជនកម្ពុជា វិស័យសាធារណការ និងដឹកជញ្ជូន - ការកែសម្រួលតួនាទី និងបន្ថែមសមាសភាពសមាជិក សមាជិកាក្នុងផ្នែកការងាររដ្ឋបាល - ការកែសម្រួល និងរៀបចំសមាសភាពផ្នែកការងារសាធារណការ និងផ្នែកការងារបច្ចេកទេស - ការចូលជាសមាសភាពបំពេញបន្ថែមរបស់លេខាធិការដ្ឋាន ស.ស.យ.ក វិស័យសាធារណការ និងដឹកជញ្ជូន - ការសង្ខេបរបាយការណ៍បច្ចុប្បន្នភាពសមាជិកសមាជិកា ស.ស.យ.ក វិស័យសាធារណការ និងដឹកជញ្ជូន និង - ការបង្ហាញពីការចុះឈ្មោះស្នើសុំកាត ស.ស.យ.ក។ ៣. បញ្ហាផ្សេងៗ ថ្លែងទៅកាន់អង្គប្រជុំនាឱកាសនោះ លោកប្រធានក្រុមការងារ បានលើកឡើងពីគោលបំណងសំខាន់ ចំនួនបួននៃការបង្កើតស.ស.យ.ក ក្នុងនោះ ១) ប្រមូលផ្តុំយុវជនគ្រប់ទិសទីទាំងក្នុងនិងក្រៅប្រទេស ដោយមិនប្រកាន់ពូជសាសន៍ ពណ៌សម្បុរ ភេទ សាសនា ជំនឿ ឋានៈ និងនិន្នាការនយោបាយ ដើម្បីជា កម្លាំងមហាសាមគ្គីក្នុងការចូលរួមចំណែកកសាងកម្ពុជាមួយប្រកបដោយឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម ២) ការពារសិទ្ធិនិងផលប្រយោជន៍ដ៏ត្រឹមត្រូវរបស់ប្រជាជន កម្ពុជាទាំងជីវភាព ស្មារតី និងសង្គម ៣) ទំនាក់ទំនង សហការល្អជាមួយអង្គការ សមាគម សហព័ន្ធ ដែលធ្វើសកម្មភាពពាក់ព័ន្ធនឹងយុវជនសំដៅអប់រំ លើកទឹកចិត្តយុវជន ក្នុងការរៀនសូត្រនិងលើកកម្ពស់ការអប់រំ និងថែរក្សាសុខភាពរបស់កុមារកម្ពុជា ៤) ទំនាក់ទំនងមិត្តភាព និងសហប្រតិបត្តិការរួមជាមួយអង្គការជាតិនិងអន្តរជាតិ បុគ្គល ប្រជាជន និងយុវជនប្រទេសនានាលើសកលលោកក្នុង ការតស៊ូដើម្បីសន្តិភាព ឯករាជ្យ ប្រជាធិបតេយ្យ វឌ្ឍនភាពសង្គម និងអនាគតស្រស់បំព្រងរបស់យុវវ័យ។ ជាមួយគ្នានេះផងដែរ លោកប្រធានក្រុមការងារ បានគូសបញ្ជាក់ពីលទ្ធផលការងារសម្រេចបាន និង ទិសដៅការងារដែលត្រូវអនុវត្តបន្តសម្រាប់សមាជិកសមាជិកាទាំងអស់ទាក់ទងនឹង ការពង្រីកនិងពង្រឹកសមាជិកភាពឱ្យបានទូលំទូលាយ ការពង្រឹងនិងពង្រីកការងាររចនាសម្ព័ន្ធឱ្យមាន ដំណើរការដោយរលូន ការរៀបចំនិងជ្រើសរើសសមាជិកឱ្យបានជាបន្តបន្ទាប់ ការងារសុវត្ថិភាពចរាចរណ៍ ការងារសង្គមនិង ការងារមនុស្សធម៌ ការងារកីឡា សារសំខាន់នៃការងារបណ្តុះបណ្តាលបង្កើនសមត្ថភាពជាប្រចាំ តាម ប្រព័ន្ធអនឡាញសម្រាប់សមាជិក សមាជិកាទាំងអស់ និងសកម្មភាពការងាររបស់ក្រុមអាជីវកម្មផងដែរ៕