[Phnom Penh Post] - PPLC នឹងឈានដល់កិច្ចព្រមព្រៀងជាមួយ YCH ឆាប់ៗ
2020-12-23
Go to the website published Phnom Penh Post
ភ្នំពេញៈ ក្រសួងសាធារណការ និងដឹកជញ្ជូន គ្រោងនឹងបញ្ចប់សេចក្តីព្រាងនៃកិច្ចព្រមព្រៀងក្របខ័ណ្ខសម្រាប់គម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញ (PPLC) នៅពេលឆាប់ៗ ដើម្បីឈានទៅចុះហត្ថលេខាកិច្ចព្រមព្រៀងក្របខ័ណ្ឌនេះជាមួយក្រុមហ៊ុន YCH។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនរួមជាមួយនឹងថ្នាក់ដឹកនាំក្រសួងស្ថាប័នពាក់ព័ន្ធ និងលោក Alex Sanford អ្នកប្រឹក្សាយោបល់ផ្នែកច្បាប់អន្តរជាតិកាលពីថ្ងៃទី ២១ ធ្នូ បានចូលរួមកិច្ចប្រជុំតាមរយៈប្រព័ន្ធវីដេអូពីចម្ងាយដើម្បីពិនិត្យ និងអនុម័តលើសេចក្តីព្រាងចុងក្រោយនៃកិច្ចព្រមព្រៀងក្របខ័ណ្ឌនេះ។
កិច្ចប្រជុំនេះធ្វើឡើងក្នុងគោលបំណងពិនិត្យលើសេចក្តីព្រាងចុងក្រោយនៃកិច្ចព្រមព្រៀងក្របខ័ណ្ឌរបស់គម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញរវាងក្រសួងសាធារណការ និងដឹកជញ្ជូន (តំណាងរដ្ឋាភិបាល) ជាមួយក្រុមហ៊ុន YCH ដែលជាក្រុមហ៊ុនសិង្ហបុរីក្នុងការប្រមូលធាតុចូលបន្ថែមពីគ្រប់ស្ថាប័នពាក់ព័ន្ធសំដៅឱ្យកិច្ចព្រមព្រៀងនេះមានខ្លឹមសារជាគតិយុត្តគ្រប់ជ្រុងជ្រោយក្នុងបទដ្ឋានជាតិ និងអន្តរជាតិ និងអាចទទួលយកបានពីគ្រប់ភាគីពាក់ព័ន្ធ។
លោក ស៊ុន ចាន់ថុល ថ្លែងថាស្របតាមចក្ខុវិស័យវែងឆ្ងាយរបស់រដ្ឋាភិបាល ក្រសួងនឹងបញ្ចប់សេចក្ដីព្រាងនៃកិច្ចព្រមព្រៀងនេះនាពេលឆាប់ៗ ដើម្បីដាក់ជូនទៅក្រុមហ៊ុន YCH។
លោក ចាន់ថុល បានបន្តថា ភ័ស្តុភារកម្មភ្នំពេញ គឺជាមជ្ឈមណ្ឌលដ៏មានសក្ដានុពលក្នុងការលើកស្ទួយវិស័យដឹកជញ្ជូនឱ្យកាន់តែមានប្រសិទ្ធភាព និងមានលក្ខណៈប្រកួតប្រជែងជាមួយនឹងប្រទេសក្នុងតំបន់ និងសកលលោកទាំងតម្លៃ និងសេវាកម្ម។
លោកបន្ថែមថា មជ្ឈមណ្ឌលភ័ស្តុភារកម្មភ្នំពេញក៏ជាកម្លាំងចលករជួយជំរុញកំណើនសេដ្ឋកិច្ចកម្ពុជាឱ្យកាន់តែរីកចម្រើន និងសម្រេចបាននូវចក្ខុវិស័យរបស់រដ្ឋាភិបាលក្នុងការអភិវឌ្ឍកម្ពុជាទៅជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសចំណូលខ្ពស់នៅឆ្នាំ ២០៥០។
លោកថ្លែងថា៖ «ខ្ញុំសូមថ្លែងអំណរគុណយ៉ាងជ្រាលជ្រៅចំពោះអង្គប្រជុំ ដែលបានផ្ដល់ធាតុចូលដ៏មានតម្លៃក្នុងបុព្វហេតុរៀបចំកិច្ចព្រមព្រៀងនេះឱ្យមានសង្គតភាព ស្របតាមបរិបទច្បាប់ សង្គម និងសេដ្ឋកិច្ចកម្ពុជា សេដ្ឋកិច្ចតំបន់ និងសកលលោកនាបច្ចុប្បន្ន និងអនាគត»។
លោក ឈៀង ពេជ្រ អគ្គនាយកអគ្គនាយកដ្ឋានភ័ស្តុភារកម្មនៃក្រសួងសាធារណការ និងដឹកជញ្ជូនប្រាប់ ភ្នំពេញ ប៉ុស្តិ៍ នៅថ្ងៃទី ២២ ធ្នូ ថា ក្រោយពីពិនិត្យមើលគ្រប់ជ្រុងរួចមក គណៈកម្មាធិការអន្តរក្រសួងបានឯកភាពជាគោលការណ៍កែសម្រួលចំនួន ៣ ចំណុចដាក់បញ្ចូលទៅក្នុងសេចក្តីព្រាងក្របខ័ណ្ឌនេះ ដើម្បីផ្ញើឱ្យក្រុមហ៊ុន YCH ពិនិត្យ និងសម្រេច។ ប៉ុន្តែចំណុចទាំង ៣ នេះមិនទាន់អាចបញ្ចេញជាសាធារណៈបាននៅឡើយទេ ព្រោះមិនទាន់មានការសម្រេចជាផ្លូវការរបស់ក្រុមហ៊ុន។
លោកនិយាយថា៖ «បើសិនក្រុមហ៊ុនឯកភាពលើ ៣ ចំណុចនេះ គឺយើងនឹងកំណត់ពេលចុះហត្ថលេខាលើកិច្ចព្រមព្រៀងក្របខ័ណ្ខនៅពេលឆាប់ៗ ដែលអាចនឹងធ្វើឡើងនៅដើមឆ្នាំក្រោយ»។
គម្រោងភ្នំពេញឡូជីស្ទីក មានទីតាំងនៅសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញលើផ្ទៃដី ៩៨ ហិកតា ដែលជាទីតាំងយុទ្ធសាស្ដ្រមួយតភ្ជាប់កំពង់ផែសមុទ្រទឹកជ្រៅក្នុងខេត្តព្រះសីហនុ និងខ្សែផ្លូវដែកភាគខាងជើងភ្ជាប់ទៅព្រំដែនថៃ។ វាក៏នៅជិតព្រលានយន្តហោះអន្តរជាតិផ្លូវជាតិលេខ ៤ និងផ្លូវជាតិលេខ ៣ ព្រមទាំងទីតាំងស្ដុកទំនិញនៅស្ថានីយរថភ្លើង និងតំបន់សេដ្ឋកិច្ចពិសេសភ្នំពេញ៕
