នៅព្រឹក ថ្ងៃព្រហស្បតិ៍ ៤កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣១ ខែតុលា ឆ្នាំ២០១៩ នៅសាលប្រជុំសាលាខេត្តឧត្តរមានជ័យ ក្រុមការងារជំរុញអនុវត្តផែនការសកម្មភាពសុវត្ថិភាពចរាចរណ៍ផ្លូវគោក នៃគណ:កម្មាធិការជាតិសុវត្ថិភាពចរាចរណ៍ផ្លូវគោក បានរៀបចំការប្រជុំណែនាំស្តីពីការត្រួតពិនិត្យការអនុវត្តផែនការសកម្មភាពសុវត្ថិភាពចរាចរណ៍ផ្លូវគោកឆ្នាំ២០១៩ ដឹកនាំដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក ជាតំណាងប្រធានក្រុមការងារទី៣ ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ និងជាអនុប្រធានអចិន្ត្រៃយ៍អនុគណ:កម្មការទី២ និងលោកឧត្តមសេនីយ៍ទោ ឡុង ធូ អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណ: នៃអគ្គស្នងការនគរបាលជាតិ។ កិច្ចប្រជុំនេះមានការអញ្ជើញចូលរួមជាអធិបតីភាពពី ឯកឧត្តម វ៉ាត ប៉ារ៉ានីន អភិបាលរង នៃគណ:អភិបាលខេត្តឧត្តរមានជ័យ ព្រមទាំងតំណាងមកពី នាយកដ្ឋានសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្ត និងសាលាខេត្តឧត្តរមានជ័យ ស្នងការនគរបាលខេត្ត មន្ទីរអប់រំ យុវជន និងកីឡាខេត្ត មន្ទីរព័ត៌មានខេត្ត មន្ទីរសុខាភិបាលខេត្ត មន្ទីរការងារ និងបណ្តុះបណ្តាលវិជ្ជាជីវ:ខេត្ត កងរាជអាវុធហត្ថខេត្ត សរុបមានចំនួន ១៤នាក់។ កិច្ចប្រជុំនេះ មានគោលបំណងដើម្បីពង្រឹងយន្តការដឹកនាំ និងគ្រប់គ្រងការងារសុវត្ថិភាពនៅគ្រប់លំដាប់ថ្នាក់ ក្នុងការអនុវត្តការងារឱ្យមានប្រសិទ្ធិភាពលើវិធានការសំខាន់ៗទាំងបួន រួមមាន ការរឹតបន្តឹងការអនុវត្តច្បាប់ ការផ្សព្វផ្សាយអប់រំច្បាប់ និងបទដ្ឋានសុវត្ថិភាពចរាចរណ៍ផ្លូវគោក ការរៀបចំសណ្តាប់ធ្នាប់ផ្លូវសាធារណ:ឱ្យមានសុវត្ថិភាពដល់ការធ្វើចរាចរណ៍ និងការសិក្សាកែលម្អរខ្លឹមសារច្បាប់ស្តីពីចរាចរណ៍ផ្លូវគោក ហើយនិងបានណែនាំស្តីពីការអនុវត្តចលនាប្រឡងប្រណាំង “តំបន់ពិសេសនៃសុវត្ថិភាពចរាចរណ៍ផ្លូវគោក” ដើម្បីធ្វើការវាយតម្លៃតំបន់ដែលធ្វើសកម្មភាពរៀបចំជាសង្វាក់ប្រព័ន្ធដំណើរការឱ្យមានសុវត្ថិភាពចរាចរណ៍ផ្លូវគោកក្នុងតំបន់កំណត់ណាមួយ ឈានទៅសម្រេចផ្តល់ជ័យលាភីដល់តំបន់ដែលទទួលបានជោគជ័យនៅទូទាំង ២៥ រាជធានី ខេត្ត។