ថ្ងៃពុធ ៣កើត ខែអស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៦ ខែតុលា ឆ្នាំ២០១៩ អគ្គនាយកដ្ឋានបច្ចេកទេសសហការជាមួយនាយកដ្ឋានព័ត៌មានវិទ្យា និងទំនាក់ទំនងសាធារណៈ និងមន្ទីរសាធារណការ និងដឹកជញ្ជូនខេត្តកំពង់ស្ពឺ បានបន្តធ្វើយុទ្ធនាការបណ្តុះបណ្តាល និងផ្សព្វផ្សាយបច្ចេកទេសជួសជុលថែទាំផ្លូវ និងការប្រើប្រាស់កម្មវិធីថែទាំផ្លូវ (ROAD CARE Mobile App) ក្រោមកិច្ចសហការគាំទ្រពីកម្មវិធីអភិវឌ្ឍសហប្រជាជាតិប្រចាំព្រះរាជាណាចក្រកម្ពុជា (UNDP) នៅមន្ទីរសាធារណការ និងដឹកជញ្ជូនខេត្តកំពង់ស្ពឺ ដែលមានអ្នកចូលរួមប្រមាណ៥២រូបជាមន្រ្តីបច្ចេកទេសនៃមន្ទីរសាធារណការ និងដឹកជញ្ជូនខេត្តកំពង់ស្ពឺ។ យុទ្ធនាការបណ្តុះបណ្តាលនេះ អាចអោយមន្រ្តីបច្ចេកទេសនៃមន្ទីរសាធារណការ និងដឹកជញ្ជូនខេត្តកំពង់ស្ពឺ បានយល់ដឹងបន្ថែមពី បច្ចេកទេសនៃការជួសជុលថែទាំផ្លូវ ក៏ដូចជាការប្រើប្រាស់កម្មវិធីថែទាំផ្លូវ (ROAD CARE Mobile App) ដែលអាចផ្ដល់ភាពងាយស្រួលក្នុងការឆ្លើយតបទំនាក់ទំនងទៅកាន់ប្រជាពលរដ្ឋ និងផ្សព្វផ្សាយដល់ប្រជាពលរដ្ឋក្នុងតំបន់អោយយល់ពីអត្ថប្រយោជន៍ និងវិធីប្រើប្រាស់ដើម្បីរាយការណ៍ផ្ទាល់ ពីស្ថានភាពគ្រលុកសំបុកមាន់ ដើម្បីធ្វើការជួសជុលបានទាន់ពេលវេលាកាត់បន្ថយគ្រោះថ្នាក់ចរាចរណ៍។ បន្ទាប់ពីបានធ្វើយុទ្ធនាការបណ្តុះបណ្តាល និងផ្សព្វផ្សាយ នៅខេត្តកណ្ដាល និងខេត្តកំពង់ឆ្នាំងរួចមក ក្រសួងសង្កេតឃើញថាមានការចូលរួមប្រើប្រាស់ពីសំណាក់ប្រជាពលរដ្ឋក្នុងការទាញយកកម្មវិធីថែទាំផ្លូវ (ROAD CARE Mobile App) កើនឡើងរហូតដល់ ២,២៤២ នាក់។ ទន្ទឹមនឹងនេះ ក្រសួងសូមស្នើដល់ប្រជាពលរដ្ឋទាំងអស់ឱ្យចូលរួមក្នុងការទាញយកកម្មវិធីថែទាំផ្លូវ (ROAD CARE Mobile App)នេះ ដើម្បីប្រើប្រាស់ជាប្រយោជន៍ក្នុងការរាយការណ៍ផ្លូវខូច និងជង្ហុកសំបុកមាន់តាមដងផ្លូវនានាក្នុងរាជធានី-ខេត្ត ព្រមទាំងអាចចូលរួមចំណែកក្នុងការកាត់បន្ថយគ្រោះថ្នាក់ចរាចរណ៍នៅប្រទេសកម្ពុជាផងដែរ។ ទាញយកកម្មវិធីថែទាំផ្លូវ (ROAD CARE Mobile App)៖ - App Store: roadcare.mpwt.gov.kh/ios - Play Store: roadcare.mpwt.gov.kh/android ::: សម្រាប់ព័ត៌មានបន្ថែម សូមទំនាក់ទំនងមកកាន់លេខ៖ 085 92 90 90 / 015 92 90 90 / 067 92 90 90