[Kampuchea Thmey] - ស្ពានចំនួន២ នៅស្រុកសំឡូត ត្រូវបានដាច់ទាំងស្រុង ដោយសារទឹកជំនន់
2019-09-17
Go to the website published Kampuchea Thmey
បាត់ដំបង ៖ ស្ពានចំនួន២ ដែលជាស្ពានដ៏សំខាន់សម្រាប់អោយប្រជាពលរដ្ឋឆ្លងកាត់ និង ដឹកជញ្ជូនភោគផលកសិកម្មទៅកាន់ទីផ្សារនានា ត្រូវបានបាក់ដាច់ទាំងស្រុង បន្ទាប់ពីមានភ្លៀងធ្លាក់ជាប់ៗគ្នា ដែលបង្កឲ្យមានទឹកជំនន់ ជន់ជោរឡើងយ៉ាងលឿនជាទីបំផុត។
គួរបញ្ជាក់ថា ស្ទឹងគ្រញូង គឺជាស្ទឹងមួយស្ថិតនៅក្នុងស្រុកសំឡូត ហើយក៏ជាចំណែក នៃក្បាលស្ទឹង ដែលបានហូរធ្លាក់មកក្នុងស្ទឹងសង្កែ ដែលមួយរយៈចុងក្រោយនេះ ទឹកស្ទឹងគ្រញូង និង ស្ទឹងបរឡាង បានហក់ឡើងជាញឹកញាប់ដែលធ្វើឲ្យទឹកស្ទឹងសង្កែ មានសភាពជន់ឡើងជាលំដាប់។
ជាក់ស្ដែងកាលពីថ្ងៃទី១៦ ខែកញ្ញា វេលាម៉ោង១១ម្សិលមិញនេះ ទឹកស្ទឹងគ្រញូងបានស្ទុះឡើងយ៉ាងគំហុកខុសពីធម្មតា ព្រមទាំងបានវាយបំផ្លាញស្ពានចំនួន២ ឲ្យដាច់ទាំងស្រុង ចូលទៅក្នុងទឹកផងដែរ គឺស្ពានយោល ដែលស្ថិតនៅក្នុងឃុំតាសាញ និងស្ពានឈើ នៅក្នុងឃុំអូរសំរិល។
តាមប្រភពនៅទីនោះបានបញ្ជក់ថា ស្ពានទាំង២នេះ គឺមានសារៈសំខាន់ណាស់ សម្រាប់ឲ្យប្រជាពលរដ្ឋ ដឹកភោគផលកសិកម្ម ពិសេសព្រះសង្ឃដែលនិមន្តឆ្លងទៅមក ដោយពេលនេះ គឺបានជួបនឹងគ្រោះធម្មជាតិ គឺទឹកជំនន់ ដែលបានវាយបំផ្លាញខូចខាតទាំងស្រុង។
ដោយឡែកឃុំមួយចំនួនក្នុងស្រុកសំឡូត ក៏ទទួលរងនូវផលប៉ះពាល់ផងដែរ ប៉ុន្តែមិនបានប៉ះពាល់ដល់ជីវិតមនុស្ស និងសត្វឡើយ ហើយបច្ចុប្បន្ននេះ ទឹកស្ទឹងគ្រញូង គឺនៅមិនទាន់ស្រកចុះនៅឡើយ៕
