ភ្នំពេញ៖ លោក តូច ចាន់កុសល រដ្ឋមន្ត្រីស្ដីទី ក្រសួងសាធារណការ និងដឹកជញ្ជូន បានបញ្ជាក់ថា ក្រសួងសាធារណការ មានតួនាទីយ៉ាងសំខាន់ ក្នុងការសាងសង់ ផ្លូវ-ស្ពាន-កំពង់ផែ និងហេដ្ឋារចនាសម្ព័ន្ធរូបវ័ន្ត ជាច្រើនទៀតផងដែរ ។ ក្នុងជំនួបពិភាក្សា ការងារជាមួយ គណៈប្រតិភូប្រឹក្សាធុរកិច្ចអង្គការ JCIA ដឹកនាំដោយលោក Takeshi Saito កាលពីថ្ងៃទី២ ខែកក្កដា ឆ្នាំ២០១៩ លោក តូច ចាន់កុសល បានមានប្រសាសន៍ថា “ខ្ញុំសម្ដែងការស្វាគមន៍ចំពោះគម្រោងនេះ ព្រោះថា ក្រសួងសាធារណការ និងដឹកជញ្ជូនមានតួនាទីក្នុងការសាងសង់ ផ្លូវ ស្ពាន កំពង់ផែ និងហេដ្ឋារចនាសម្ព័ន្ធ រូបវ័ន្តដទៃទៀតជាច្រើន។ បើមានឧបករណ៍ទំនើប សម្រាប់ពិសោធន៍ដី នោះនឹងធ្វើឲ្យគុណភាពសំណង់ ទាំងនោះរឹតតែមានគុណភាពថែមទៀត”។ បន្ថែមពីនេះ រដ្ឋមន្ត្រីស្ដីទី អំណរគុណចំពោះគណៈប្រតិភូ ដែលមានបំណងមកវិនិយោគ លើវិស័យសាធារណការ និងដឹកជញ្ជូននៅកម្ពុជា និងស្នើឲ្យអង្គការ នាំយកឧបករណ៍ បច្ចេកទេស ទាំងនោះមកកម្ពុជា ដើម្បីធ្វើពិសោធន៍ ព្រមទាំងស្នើឲ្យអង្គការជួយ បណ្ដុះបណ្ដាលមន្ត្រីជំនាញ របស់ក្រសួង (នៅជប៉ុន) ឲ្យមានសមត្ថភាពគ្រប់គ្រាន់ ក្នុងការប្រើប្រាស់ ឧបករណ៍ទំនើបនោះ។ សូមរំលឹកថា នៅជំនួបពិភាក្សានេះ ធ្វើឡើងដើម្បីស្ដាប់ការធ្វើបទ បង្ហាញរបស់តំណាងអង្គការ JCIA អំពីឧបករណ៍បច្ចេកវិទ្យា សម្រាប់ពិសោធន៍ដី មុននឹងធ្វើការសាងសង់ ហេដ្ឋារចនាសម្ព័ន្ធដឹកជញ្ជូន ក៏ដូចជាស្វែងរកសក្ដានុពល និងឱកាសវិនិយោគលើវិស័យសាធារណការ និងដឹកជញ្ជូននៅកម្ពុជា។ ជាងនេះទៅទៀត JCIA គឺជាអង្គការមនុស្សធម៌ មានទីស្នាក់ការនៅជប៉ុន និងបានចុះពិធីសារកិច្ចព្រមព្រៀង ជាមួយក្រសួងសង្គមកិច្ច អតីតយុទ្ធជននិងយុវនីតិសម្បទា ក្នុងភាពជាដៃគូតាំពីឆ្នាំ១៩៩៦។ JCIA កំពុងបន្តការគាំទ្រដល់មជ្ឈមណ្ឌលអភិវឌ្ឍន៍សង្គម ពោធិ៍សែនជ័យ លើកម្មវិធីបណ្ដុះបណ្ដាលវិជ្ជាជីវៈ ដូចជាកាត់ដេរសម្លៀកបំពាក់ ជួសជុលម៉ូតូ និងម៉ាស៊ីនធុនតូច ជួសជុលទូរទស្សន៍ និងបរិក្ខាអគ្គិសនី កាត់សក់ ជួសជុលទូរស័ព្ទ បង្រៀនកុំព្យូទ័រ ភាសាអង់គ្លេស ភាសាជប៉ុន សំណង់ និងបដិសណ្ឋារកិច្ចជាដើម៕