ចាប់អនុវត្តពីថ្ងៃទី១៦ ខែមេសា ឆ្នាំ២០២៥ នេះតទៅលើការពិន័យរថយន្តដឹកជញ្ជូនលើសទម្ងន់កម្រិតកំណត់ ដែលផ្ទុកទម្ងន់លើសសរុប និងផ្ទុកទម្ងន់លើសតាមភ្លៅ នៃរថយន្ត ទីស្តីការក្រសួង ៖ នាព្រឹកថ្ងៃចន្ទ ទី៧ ខែមេសា ឆ្នាំ២០២៥ ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ បានអញ្ជើញជាអធិបតីក្នុងកម្មវិធីវគ្គបណ្តុះបណ្តាល ស្តីពីវិធីសាស្រ្តគណនាទម្ងន់ និងនីតិវិធីពិន័យចំពោះយានយន្តល្មើសលើការផ្ទុកលើសទម្ងន់សរុប និងការផ្ទុកលើសទម្ងន់នៃភ្លៅនីមួយៗ ដោយមានការចូលរួមពី ឯកឧត្តមអនុរដ្ឋលេខាធិការទទួលបន្ទុក អនុប្រធានគណៈកម្មាធិការសម្របសម្រួលអចិន្ត្រៃយ៍ ប្រធាន អនុប្រធាន សមាជិក សមាជិការ នៃលេខាធិការដ្ឋានគណៈកម្មាធិការសម្របសម្រួលអចិន្ត្រៃយ៍ ក្រុមការងារត្រួតពិនិត្យចល័ត និងមន្រ្តីជំនាញ នៃស្ថានីយជញ្ជីងថ្លឹងរថយន្តទាំងអស់។ វគ្គបណ្តុះបណ្តាលនេះត្រូវបានធ្វើឡើង បន្ទាប់ពីក្រសួងបានធ្វើការផ្សព្វផ្សាយពីលិខិតលេខ២៩១ សជណ.អស ចុះថ្ងៃទី២១ ខែកុម្ភៈ ឆ្នាំ២០២៥ របស់ទីស្តីការគណៈរដ្ឋមន្រ្តី លើសេចក្តីជូនដំណឹង ឱ្យម្ចាស់មកទទួលយករថយន្តដែលបានឃាត់ទុក និងបានប្រគល់ជូនចប់សព្វគ្រប់ កាលពីថ្ងៃទី២៣ ខែមីនា ឆ្នាំ២០២៥ និងការចាត់វិធានការបន្ថែមទៀតទៅលើយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ ក្នុងករណីមានអំពើល្មើសលើការផ្ទុកទម្ងន់ ត្រូវពិន័យទាំងការផ្ទុកទម្ងន់សរុប និងការផ្ទុកទម្ងន់នៃភ្លៅទាំង ២ករណី ។ សូមបញ្ជាក់ថា ការពិន័យទម្ងន់លើសតាមភ្លៅ នៃយានយន្តល្មើស មានចែងក្នុងមាត្រា៦០ នៃច្បាប់ស្តីពីផ្លូវថ្នល់ឆ្នាំ២០១៤ មកម្ល៉េះ ប៉ុន្តែដោយសារការអនុវត្តច្បាប់ ត្រូវធ្វើជាជំហានៗ និងមានភាពទន់ភ្លន់ ទើបកន្លងមកពុំបានអនុវត្តពេលលេញតាមបទបញ្ញត្តិនៃច្បាប់កំណត់នៅឡើយ។ ហេតុនេះដើម្បីរឹតបន្តឹងការអនុវត្តច្បាប់ និងឱ្យម្ចាស់យានយន្តដឹកជញ្ជូនធុនធ្ងន់ទាំងអស់រាងចាល ក្រសួងបានសម្រេចបន្ថែមវិធានការពិន័យការផ្ទុកលើសទម្ងន់តាមភ្លៅ ចាប់ពីថ្ងៃទី១៦ ខែមេសា ឆ្នាំ២០២៥ នេះតទៅ។ ស្របពេលជាមួយគ្នានេះ ក្រសួងក៏បាននិងខិតខំជំរុញការងារធ្វើវិសោធនកម្មច្បាប់ស្តីពីផ្លូវថ្នល់ ពិសេស មាត្រា២៦ និងមាត្រា៦០ ដើម្បីឱ្យស្របទៅនឹងស្ថានភាពអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងឆ្លើយតបចំពោះការរីកចម្រើនលូតលាស់នៃសេដ្ឋកិច្ចសង្គមជាតិ។ វគ្គបណ្តុះបណ្តាលនាពេលនេះ ដើម្បីបំពាក់បំប៉នបន្ថែមដល់ សមាជិក សមាជិកា ពិសេសមន្ត្រីជំនាញទទួលបន្ទុកបច្ចេកទេសទាំងអស់ ដោយស្វែងយល់ ពង្រឹងសមត្ថភាព ហើយពិភាក្សាគ្នាឱ្យកាន់តែស៊ីជម្រៅ ច្បាស់លាស់ ទៅលើវិធីសាស្រ្តគណនា និងនីតិវិធីពិន័យចំពោះយានយន្តល្មើសលើការផ្ទុកលើសទម្ងន់នៃភ្លៅនីមួយៗ ដើម្បីយកទៅអនុវត្តតាមស្ថានីយជញ្ជីងរៀងៗ ឱ្យមានប្រសិទ្ធភាពខ្ពស់។ ស្របពេលគ្នានេះដែរ គ្រប់ស្ថានីយជញ្ជីងទាំងអស់ ត្រូវធ្វើសកម្មភាពផ្សព្វផ្សាយ ពន្យល់ និងចែកជូនសេចក្តីជូនដំណឹងរបស់ក្រសួង ដល់អ្នកបើកបរ និងម្ចាស់យានយន្តដឹកជញ្ជូនធុនធ្ងន់ ឱ្យបានទូលំទូលាយបន្ថែមទៀត៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube