អាជ្ញាធរខេត្តបន្ទាយមានជ័យ បាន និងកំពុងប្រឹងប្រែងបន្តជំរុញធ្វើការជួសជុល ស្ថាបនាផ្លូវថ្នល់ ដែលបានរងការខូចខាតនៅក្នុងមូលដ្ឋានឱ្យមានភាពល្អប្រសើរឡើងវិញ ដើម្បីឆ្លើយតបទៅនឹងសំណូមពរ សេចក្តីត្រូវការរបស់ប្រជាពលរដ្ឋក្នុងការធ្វើចរាចរណ៍ ទៅមកបានលឿន។​នេះជាប្រសាសន៍លើកឡើងរបស់អភិបាលខេត្តបន្ទាយមានជ័យឯកឧត្តម អ៊ុំ រាត្រី​​នៅក្នុងឱកាសជួបសំណេះសំណាលសួរសុខទុក្ខប្រជាពលរដ្ឋ និងបើកការដ្ឋានសាងសង់ផ្លូវ​បេតុង ១ខ្សែ ប្រវែង១០០០ម៉ែត្រ ក្នុងភូមិព្រះពន្លា ភូមិព្រៃឫស្សី សង្កាត់ព្រះពន្លា ក្រុងសិរីសោ​ភ័ណ​​ កាលពីព្រឹក​ថ្ងៃអង្គារ ​៣រោច ​ខែជេស្ឋ ​ឆ្នាំ​ថោះ​ បញ្ចស័ក​ ព.ស២៥៦៧​ ត្រូវនឹងថ្ងៃទី​០៦​ ខែមិថុនា ​ឆ្នាំ២០២៣នេះ។​ ក្នុងពិធីនេះ ឯកឧត្តម អ៊ុំ រាត្រី មានប្រសាសន៍ថា ដោយមានការគិតគូរយកចិត្តទុកដាក់ ពីសំណាក់ឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានក្រុមការងាររាជរដ្ឋាភិបាលចុះជួយ​ខេត្តបន្ទាយមានជ័យ បានផ្តល់ផ្លូវបេតុងមួយខ្សែប្រវែង១០០០ម៉ែត្រនេះ ជូនដល់ប្រជាពលរដ្ឋ នៅក្នុងភូមិព្រះពន្លា​ ទៅភូមិព្រៃឫស្សី សង្កាត់ព្រះពន្លា​ ក្រុងសិរីសោភ័ណ​ជាការឆ្លើយតបទៅ នឹងសេចក្តីការរបស់ប្រជាពលរដ្ឋចង់បានផ្លូវល្អ ធានាការប្រើប្រាស់បានយូរអង្វែង​ស្របទៅ នឹងការរីកចម្រើនរបស់ប្រទេសជាតិនោះ។​​​ ឯកឧត្តមអភិបាល​ខេត្តបន្ទាយមានជ័យបានបញ្ជាក់ថា​​​ ជានិច្ច​​កាលរាជ​រដ្ឋាភិបាល​កម្ពុជាយើងដែល​មាន​សម្ដេចអគ្គមហាសេនាបតីតេជោ ​ហ៊ុន សែន ជា​នាយរដ្ឋមន្ត្រី​តែង​ផ្ដោត​សំខាន់បន្តការយកចិត្តទុកដាក់​លើការអភិវឌ្ឍ​វិស័យ​ផ្លូវថ្នល់​ក្នុង​នោះ​មិន​ថា ​ផ្លូវជាតិ​​ផ្លូវលំ នៅ​គ្រប់​ទីកន្លែង​​នោះ​ទេ​ ត្រូវ​បាន​ស្ថាបនា​ពីតំបន់ដែល​គ្មាន​ផ្លូវ​ ទៅជាមាន​ផ្លូវ​ ក្រាល​គ្រួស​ក្រហម​ ​ប្រែក្លាយ​​​ទៅ​ជា​ផ្លូវ​បេតុង ​ឬ​កៅ​ស៊ូ​ផ្សារភ្ជាប់​ពីទី​ជនបទ​មក​ទី​​​ប្រជុំជនខេត្ត ស្រុក ក្រុង ដែល ​​ឆ្លើយតបទៅនឹង​​អនុសាសន៍សម្តេចតេជា​​មាន​ផ្លូវ​​មាន​ក្តី​សង្ឃឹមនោះ​។ ​​​​ជាមួយនោះដែរឯកឧត្តម អ៊ុំ រាត្រី ក៏​​បាន​អំពាវនាវដល់​ប្រជាពលរដ្ឋ​ដែល​មាន​លទ្ធភាព​មានធនធានសូមមេត្តាចូលរួមជាមួយអាជ្ញាធរក្នុងការជួសជុលផ្លូវណា ដែលរងការខូចខាត ខ្លាំងឱ្យបានល្អឡើងវិញ ទោះបីការស្ថាបនានោះជាផ្លូវក្រាលគ្រួសក្រហមផ្លូវបេតុងឬកៅស៊ូក្តី។​​ទន្ទឹមនឹងនោះ ឯកឧត្តមក៏បានក្រើនរម្លឹកដល់ប្រជាពលរដ្ឋដែលរស់នៅតាមដងផ្លូវ ដែលកំពុងធ្វើការជួសជុលនេះ សូមមេត្តាចូលរួមទាំងអស់គ្នាជួយបង្កលក្ខណៈងាយស្រួល ដល់ក្រុមជំនាញដែលកំពុងធ្វើផ្លូវនេះបានលឿន ហើយត្រូវចូលរួមជួយថែទាំផ្លូវដែល បានជួសជុល ហើយនេះឱ្យនៅប្រើប្រាស់បានយូរ​អង្វែង។​ជាមួយនេះដែរ ឯកឧត្តមក៏បានអំពាវនាវទៅកាន់ប្រជាពលរដ្ឋទាំងអស់គ្នាត្រូវចូលរួម គោរព​ច្បាប់ចរាចរណ៍ផ្លូវគោគឱ្យបានខ្ជាប់ខ្ជួន ដើម្បីចៀសវាងការគ្រោះថ្នាក់ដល់អាយុជីវិត៕