កំណាត់ផ្លូវជាតិលេខ៣៣ (កែប មកកំពត រហូតដល់កំពង់ត្រាច) និងផ្លូវជាតិលេខ៣១ សម្រេចការសាងសង់បានប្រមាណជា៣០%ហើយ នៅថ្ងៃទី៣០ ខែ ឧសភា ឆ្នាំ២០២៣ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំប្រតិភូក្រសួង អញ្ជើញចុះពិនិត្យរោងចក្រ និងដំណើរការផលិតបេតុងកៅស៊ូAC (Asphalt Concrete) និងបន្តចុះពិនិត្យវឌ្ឍនភាពការងារសាងសង់ ផ្លូវជាតិលេខ៣៣ (កែប មកកំពត រហូតដល់កំពង់ត្រាច) និងផ្លូវជាតិលេខ៣១ ។ រោងចក្រផលិតបេតុងកៅស៊ូAC (Asphalt Concrete) ត្រូវបានបង្កើតឡើងដោយក្រសួងសាធារណការ និងដឹកជញ្ជូន និងកំពុងដំណើរការផលិតបេតុងកៅស៊ូAC ដោយមានម៉ាស៊ីន១គ្រឿង ។ នៅក្នុដំណើរនៃការចុះពិនិត្យនេះ ឯកឧត្ដម ស៊ុន ចាន់ថុល ទេសរដ្ឋមន្ត្រី បានបញ្ជាក់ថា កន្លងមកនេះ ក្រសួងបានយក បេតុងកៅស៊ូAC និងបេតុងកៅស៊ូត្រជាក់ ដែលបានផលិតនៅរោងចក្រនេះ យកទៅអ៊ុតលើផ្លូវចំនួន២ខ្សែទៅ៣ខ្សែរួចមកហើយ ជាលទ្ធផលឃើញថា បេតុងកៅស៊ូAC មានភាពរឹងមាំ ធន់ទឹក និងងាយស្រួលប្រើប្រាស់ក្នុងការបិទសម្បុកមាន់ ទាំងក្នុងរដូវប្រាំង និងក្នុងរដូវវស្សា។ ដោយឡែក សម្រាប់កំណាត់ផ្លូវជាតិលេខ៣៣ (កែប មកកំពត រហូតដល់កំពង់ត្រាច) និងផ្លូវជាតិលេខ៣១ ដែលកំពុងធ្វើការស្ថាបនានេះ មានប្រវែងប្រហាក់ប្រហែលគ្នា ដោយផ្លូវ១ខ្សែៗ មានប្រវែងជាង៥៨គីឡូម៉ែត្រ បច្ចុប្បន្នសម្រេចបានប្រមាណ៣០%ហើយ និងមានរយះពេលសាងសង់ចំនួន៤០ខែ។ដោយផ្លូវ១ខ្សែៗ គ្រោងចំណាយថវិកាប្រមាណ៥៨លានដុល្លាអាមេរិក។ ក្នុងដំណើរនៃការចុះពិនិត្យវឌ្ឍនភាពការងារសាងសង់ផ្លូវនេះ ប្រតិភូក្រសួងសាធារណការ និងដឹកជញ្ជូន ដឹកនាំដោយឯកឧត្តម ស៊ុន ចាន់ថុល បានវាយតម្លៃថា ចំពោះផ្លូវជាតិលេខ៣១នេះ បន្ទាប់ពីធ្វើតេស្តដោយម៉ាស៊ីន រួចមក ឃើញថា ការស្ថាបនាបានត្រឹមត្រូវ និងស្របតាមស្តង់ដារបច្ចេកទេស របស់ក្រសួង។ រីឯផ្លូវជាតិលេខ៣៣ (កែប មកកំពត រហូតដល់កំពង់ត្រាច) បន្ទាប់ពីបានត្រួតពិនិត្យហើយឃើញថា មិនទាន់បានត្រឹមត្រូវទៅតាមលក្ខណះស្តង់ដារបច្ចេកទេសនៅឡើយទេ ហើយនៅក្នុងឱកាសនេះដែរ ឯកឧត្ដម ស៊ុន ចាន់ថុល ទេសរដ្ឋមន្ត្រី បានធ្វើការណែនាំដល់ក្រុមហ៊ុនម៉ៅការសាងសង់ សូមធ្វើការពិនិត្យ និងធ្វើការកិនបង្ហាប់ផ្លូវនេះឡើងវិញ មុននឹងឈានដល់ការស្ថាបនាមួយស្រទាប់ទៀត។ ឆ្លៀតក្នុងឱកាសនេះដែរ ឯកឧត្តមទេសរដ្ឋមន្ត្រី ស៊ុន ចាន់ថុល សូមការយោគយល់ពីបងប្អូនប្រជាពលរដ្ឋដែលរស់នៅសង្ខាងផ្លូវទាំងពីរខ្សែនេះ និងបានជម្រុញដល់ក្រុមហ៊ុនម៉ៅការសាងសង់ សូមធ្វើការស្រោចទឹកឲ្យបានញឹកញ៉ាប់ ដាក់ស្លាកសញ្ញាចរាចរណ៍នៅតាមការដ្ឋាននីមួយៗឲ្យបានជាប់ជាប្រចាំ និងធ្វើការសម្រួលចរាចរណ៍ នៅលើកំណាត់ផ្លូវទាំង២ខ្សែនេះ នៅទីកន្លែងដែលមានសភាពកកស្ទះ ដើម្បីជៀសវាងនៅគ្រោះថ្នាក់នានា ដែលអាចកើតឡើយដោយយថាហេតុ៕