កំពត៖ សំរាមគឺជាប្រភពនៃមេរោគ និងអាចបំផ្លាញសោភ័ណ្ឌភាពទីក្រុងបាន ប្រសិនបើមិនមានការទុកដាក់បានត្រឹមត្រូវ ឬមិនមានទីលានទុកដាក់។ ទីលានដាក់សំរាម ក៏ជាផ្នែកមួយក្នុងការថែរក្សាសុខមាលភាពរបស់ប្រជាពលរដ្ឋក្នុងតំបន់ ព្រមទាំងមិនធ្វើឱ្យមានការកកស្ទះសំរាមក្នុងក្រុងផងដែរ។ នេះជាប្រសាន៍របស់ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន។ លោកទេសរដ្ឋមន្ត្រី ស៊ុន ចាន់ថុល បានលើកឡើងដូចនេះក្នុងពិធី ប្រគល់ ទទួល និងសម្ពោធដាក់ឱ្យប្រើប្រាស់គម្រោងអភិវឌ្ឍន៍ទីក្រុងរបៀង នៃមហាអនុតំបន់មេគ្គជំហានទី២ ទីលានទុកដាក់សម្រាមខេត្តកំពត នៅព្រឹកថ្ងៃទី៣០ ខែឧសភា ឆ្នាំ២០២៣។ លោកបានលើកឡើងយ៉ាងដូច្នេះថា៖ “ការទុកដាក់សំរាមពាស់វាលពាស់កាល គឺធ្វើឱ្យប៉ះពាល់ដល់សុខភាពប្រជាពលរដ្ឋ ព្រមទាំងធ្វើឱ្យខូចសោភ័ណ្ឌភាពទីក្រុង ហើយក្រុងកំពត ខេត្តកំពត គឺជាខេត្តគោលដៅទេសចរណ៍យ៉ាងសំខាន់។ ដូច្នេះយើងមិនចង់ឃើញមានសំរាមដាក់ចោលនៅតាមផ្លូវដោយគ្មានកន្លែងទុកដាក់ត្រឹមត្រូវនោះទេ ទើបក្រសួងសាធារណការធ្វើតាមការគ្រោងទុកនូវទីលានទុកដាក់សំរាមនេះ”។ ជាមួយគ្នានេះដែរ លោក ម៉ៅ ធនិន អភិបាលខេត្តកំពត បានរំពឹងថា ទីលានទុកដាក់សំរាមនេះ នឹងអាចធ្វើឱ្យក្រុងកំពត ខេត្តកំពត ក្លាយទៅទីក្រុងស្អាត គ្មានការទុកដាក់សំរាមពាស់វាលពាស់កាល និងថែមទាំងអាចថែរក្សាសុខមាលភាពប្រជាពលរដ្ឋផងដែរ។ សូមបញ្ជាក់ថា គម្រោងអភិវឌ្ឍន៍ទីក្រុងរបៀង នៃមហាអនុតំបន់មេគង្គជំហានទី២ បានប្រើប្រាស់កម្ចីឥណទានពីធនាគារអភិវឌ្ឍន៍អាស៊ី(ADB) និងគ្រប់គ្រងគម្រោងដោយក្រសួងសាធារណការ និងដឹកជញ្ជូន ថវិកាគម្រោងមានចំនូន ៣.៣៧២.៥១៤ដុល្លារ ចាប់ផ្ដើមសាងសង់ថ្ងៃទី២០ ខែឧសភា ឆ្នាំ២០២១ និងបានបញ្ចប់ការសាងសង់នៅថ្ងៃទី៣០ ខែកញ្ញា ឆ្នាំ២០២២។ គម្រោងនេះ មានទីតាំងស្ថិតនៅក្នុងភូមិថ្មី ឃុំថ្មី ស្រុកទឹកឈូ ខេត្តកំពត ដែលបានរចនាឡើងជាពីររណ្តៅ មានទំហំមាត់រណ្តៅប៉ុនគ្នា(៨០ម៉ែត្រ x ១៧០ម៉ែត្រ) ជម្រៅ ៣ម៉ែត្រ ត្រូវជា ១,៣៦ហិកតា។ តាមផែនការ រណ្តៅទាំងពីរនេះ នឹងត្រូវបំពេញសំរាមរហូតដល់ ១០ម៉ែត្រ គិតចាប់ពីមាត់រណ្ដៅ ដែលអាចផ្ទុកបរិមាណសំរាមបានប្រមាណ ៣៤៨.៤០០ម៉ែត្រគូប សាងសង់លើផ្ទៃដី ៨,៧៧ហិកតា លើផ្ទៃដីសរុបទំហំ ១០,៣៣៨ហិកតា ដែលនឹងប្រើប្រាស់ក្នុងរយៈពេល ២០ឆ្នាំ សម្រាប់ប្រជាជនក្នុងខេត្តកំពតទាំងមូលប្រមាណជា ៥២.៣៣៧នាក់៕