[Kampucheathmey] - ការដ្ឋានផ្លូវជាតិលេខ ៤៨ កោះកុង សម្រេចបានជាង ២៥ ភាគរយហើយ
2023-05-15
Go to the website published Kampucheathmey
គម្រោងស្ថាបនាផ្លូវជាតិលេខ ៤៨ ក្នុងភូមិសាស្ត្រខេត្តកោះកុង សម្រេចបានជាង ២៥ ភាគរយហើយ បើគិតត្រឹមបំណាច់ខែមេសា ឆ្នាំ ២០២៣ កន្លងទៅ។ នេះបើតាមការបញ្ជាក់របស់លោកស្រី អ៊ី នារីនេត អភិបាលរងខេត្តកោះកុង។
រដ្ឋបាលខេត្តកោះកុង ដឹកនាំដោយលោកស្រី មិថុនា ភូថង អភិបាលខេត្ត លោកស្រី អ៊ី នារីនេត អភិបាលរងខេត្ត និងក្រុមការងារសាងសង់ បានពិនិត្យ និងបង្ហាញពីលទ្ធផលសម្រេចបានពីគម្រោងស្ថាបនាផ្លូវជាតិលេខ ៤៨។
ថ្លែងក្រោយបញ្ចប់ទស្សនកិច្ចពិនិត្យស្ថានភាពជាក់ស្ដែងទីតាំងសំខាន់ នៃកំណាត់ផ្លូវជាតិលេខ ៤៨ លោកស្រី អ៊ី នារីនេត អភិបាលរងខេត្តកោះកុង បានឲ្យដឹងកាលពីល្ងាចថ្ងៃទី ១៤ ខែឧសភា ឆ្នាំ ២០២៣ ថា ផ្លូវជាតិលេខ ៤៨ នេះ បានចាប់ផ្ដើមដំណើរការសាងសង់តាំងពីខែមករា ឆ្នាំ ២០២២ ម្ល៉េះ ដូច្នេះចង់ដឹងពីវឌ្ឍនៈរបស់គម្រោង លោកស្រី មិថុនា ភូថង ក៏ចុះពិនិត្យទីតាំងធំចំនួន ៥ កន្លែង ចាប់ពីស្រុកស្រែអំបិល រហូតដល់ចំណុចអូរស្រណោះ ក្រុងខេមរភូមិន្ទ។
លោកស្រីអភិបាលរងខេត្ត បន្ថែមទៀតថា គិតត្រឹមខែមេសា កន្លងទៅ ក្រុមការងារស្ថាបនាសម្រេចបាន ២៥.៥៧ ភាគរយហើយ លើការអនុវត្តគម្រោងសាងសង់ផ្លូវជាតិលេខ ៤៨ ក្នុងភូមិសាស្ត្រខេត្តកោះកុង ដោយបច្ចុប្បន្នកំពុងពន្លឿនការងារបន្ថែមតំបន់ផ្លូវកោង ឬចុះចំណោតខ្លាំងដែលជាបញ្ហាប្រឈមដូចជា ៖ តំបន់ផ្លូវកោងហួសរង្វង់ព្រឹទ្ធាចារ្យ សាយ ភូថង និងតំបន់ចុះចំណោតតាតៃក្រោម។
រដ្ឋបាលខេត្តកោះកុង ក៏បានថ្លែងអំណរអរគុណចំពោះកិច្ចប្រឹងប្រែងរបស់ក្រុមការងារសាងសង់កំណាត់ផ្លូវជាតិលេខ ៤៨ ទោះបីជាអំឡុងពេលនេះជារដូវវស្សាចូលមកដល់ក៏ដោយ ក៏អាជ្ញាធរជឿជាក់ថា គម្រោងស្ថាបនាផ្លូវដ៏មានសារៈសំខាន់នេះ នឹងអនុវត្តជោគជ័យទៅតាមផែនការកំណត់។
កំណាត់ផ្លូវជាតិលេខ ៤៨ សព្វថ្ងៃ មានស្ថានភាពបត់បែន និងឡើងចុះចំណោតច្រើន ដោយទីតាំងខ្លះត្រូវប្រើពេលវេលាជីកកាយជ្រលងថ្មធំៗ ទីតាំងខ្លះតម្រូវឲ្យមានការវាងចំណោតកោងខ្លាំង និងជាពិសេសរដូវវស្សាពិបាកសាងសង់ ទើបធ្វើឲ្យដំណើរការហាក់យឺតយ៉ាវបន្តិច។
គម្រោងសាងសង់លើកកម្រិតគុណភាពផ្លូវជាតិលេខ ៤៨ ប្រវែង ១៤៨ គីឡូម៉ែត្រ ពីចំណុចប្រសព្វផ្លូវជាតិលេខ ៤ អូរជ្រៅ-ក្រុងខេមរភូមិន្ទ ខេត្តកោះកុង ក្រោមជំនួយរបស់រដ្ឋាភិបាលកូរ៉េខាងត្បូង ចំណាយអស់ ៧៨ លានដុល្លារអាមេរិក ត្រូវបានចាប់ផ្ដើមដំណើរការ កាលពីថ្ងៃទី ៣ ខែមករា ឆ្នាំ ២០២២។ផ្លូវជាតិលេខ ៤៨ នេះ គឺជាហេដ្ឋារចនាសម្ព័ន្ធដ៏សំខាន់មួយរបស់ប៉ូលសេដ្ឋកិច្ចទីពីរ រួមមាន ខេត្តព្រះសីហនុ ខេត្តកែប ខេត្តកំពត និងខេត្តកោះកុង ដែលជាតំបន់ឧស្សាហកម្ម ទេសចរណ៍ធម្មជាតិ និងតំបន់មាត់សមុទ្រ។
តាមរយៈផ្លូវជាតិលេខ ៤៨ ដ៏មានសក្ដានុពលនេះ ក៏នឹងជួយជំរុញដល់ការអភិវឌ្ឍសេដ្ឋកិច្ចក្នុងតំបន់ជាប់ព្រំប្រទល់ជាមួយប្រទេសជិតខាង ដោយរំពឹងបាននូវការទាក់ទាញវិនិយោគិន និងជំរុញការនាំចេញនៅតំបន់សេដ្ឋកិច្ចពិសេសចំនួន ៤ ស្ថិតនៅតាមបណ្ដោយផ្លូវនេះ៕
