[Kampucheathmey] - ខេត្តស្វាយរៀងស្ថាបនាផ្លូវក្រវាត់ព្រំដែនបានជាង ៨០ ភាគរយ ក្នុងតំបន់បោះបង្គោលព្រំដែនរួច
2023-04-28
Go to the website published Kampucheathmey
បើតាមការបញ្ជាក់របស់លោក ម៉ែន វិបុល អភិបាលនៃគណៈអភិបាលខេត្តស្វាយរៀង កងវិស្វកម្មបានស្ថាបនាផ្លូវក្រវាត់ព្រំដែនក្នុងភូមិសាស្រ្តខេត្តស្វាយរៀងសម្រេចបានជាង ៨០ ភាគរយនៅទីតាំងដែលបោះបង្គោលព្រំដែនរួចរាល់។
ថ្លែងនៅក្នុងសន្និសីទបង្ហាញពីជោគជ័យរយៈពេល ៥ ឆ្នាំ របស់រដ្ឋបាលខេត្តស្វាយរៀងកាលពីម្សិលមិញនេះ លោក ម៉ែន វិបុល បានឲ្យដឹងថា ការស្ថាបនាផ្លូវក្រវាត់ព្រំដែន ធ្វើឡើងតែតំបន់ដែលបោះបង្គោលព្រំដែនរួចតែប៉ុណ្ណោះ។
«ដូចបានបញ្ជាក់ នៅតំបន់ដែលដែលមិនទាន់បោះបង្គោលព្រំដែនអត់ទាន់ធ្វើទេ ពីព្រោះមិនទាន់ឯកភាពគ្នា។ មិនដឹងធ្វើចាប់ពីណាទៅណា។ បើមិនទាន់កំណត់ យើងមិនអាចចេះតែធ្វើនោះទេ។ និយាយរួមការស្ថាបនាផ្លូវក្រវាត់ព្រំដែនសម្រេចបានជាង ៨០% នៅទីតាំងដែលបោះបង្គោលព្រំដែនរួច»។
លោកបន្តថា ជាគោលការណ៍ការស្ថាបនាផ្លូវក្រវាត់ព្រំដែនត្រូវសាងសង់គម្លាត ៣០ ម៉ែត្រពីបង្គោលព្រំដែនដែលបោះរួច។
លោកអភិបាលខេត្តបានលើកឡើងបន្តទៀតថា ខេត្តស្វាយរៀងមានភូមិសាស្រ្តជាប់ខេត្តពីររបស់ប្រទេសវៀតណាម។ ក្នុងនោះជាប់ខេត្តតៃនិញប្រវែង ១៣០ គីឡូម៉ែត្រនៅ ៧ បង្គោលទៀតមិនទាន់បោះប្រហែល ៧ គីឡូម៉ែត្រ និងខេត្តឡុងអាននៅ ១៣ បង្គោល ក្នុងប្រវែង ១២៨ គីឡូម៉ែត្រ។
ខេត្តស្វាយរៀងមានភូមិសាស្ត្រជាប់ខេត្តចំនួនពីរជាមួយប្រទេសវៀតណាមគឺខេត្តតៃនិញ និងខេត្តឡុងអានលើប្រវែងព្រំដែនសរុប ២៥៨ គីឡូម៉ែត្រ។ ខេត្តស្វាយរៀងមានច្រកទ្វារព្រំដែនចំនួន ៨ កន្លែងសម្រាប់ទំនាក់ទំនងជាមួយប្រទេសវៀតណាមដែលរួមមាន ច្រកទ្វារព្រំដែនអន្តរជាតិ ២ កន្លែង ច្រកទ្វារព្រំដែនទ្វេភាគី ២ កន្លែង និងច្រកទ្វារតំបន់ព្រំដែន ៤ កន្លែង និងមានកំពង់ផែ ០១ កន្លែង ដែលកំពុងដើរតួនាទីយ៉ាងសំខាន់ក្នុងការជួយសម្រួលដល់ការដោះដូរពាណិជ្ជកម្ម កសិផលផ្សេងៗនិងការធ្វើដំណើរឆ្លងកាត់ព្រំដែនរបស់ប្រជាពលរដ្ឋ ភ្ញៀវជាតិនិងអន្ដរជាតិ។
បច្ចុប្បន្នរដ្ឋបាលខេត្ដស្វាយរៀង ក៏កំពុងរៀបចំសំណើទៅរាជរដ្ឋាភិបាល ដើម្បីស្នើសុំបង្កើតច្រកទ្វារតំបន់ព្រំដែនមួយកន្លែងទៀត គឺច្រកទ្វារតំបន់ព្រំដែនក្រសាំងជ្រំ ស្ថិតនៅភូមិក្រសាំងជ្រំ ឃុំគ្រួស ក្នុងស្រុកស្វាយជ្រំ៕
