កិច្ចប្រជុំចាប់ផ្តើមនៃបេសកកម្មគាំទ្រការអនុវត្តគម្រោងលើកទី០៨ នៃគម្រោងលើកកម្ពស់ការផ្គត់ផ្គង់ ទឹកស្អាត និងអនាម័យ ក្រោមហិរញ្ញប្បទានឥណទានរបស់ធនាគារពិភពលោក (World Bank) ភ្នំពេញ៖ ថ្ងៃចន្ទ ៨រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៣ ខែកុម្ភៈ ឆ្នាំ២០២៣ ឯកឧត្តមបណ្ឌិត រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានអង្គភាព គ្រប់គ្រងសមាសភាគគម្រោង-២ (Component Management Unit-2) បានអញ្ជើញដឹកនាំកិច្ចប្រជុំ ចាប់ផ្តើមនៃបេសកកម្មគាំទ្រការអនុវត្តគម្រោងលើកទី០៨ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានឥណទានរបស់ធនាគារពិភពលោក ដោយមានការអញ្ជើញចូលរួមពី ឯកឧត្តម ស៊ឹម ស៊ីថា រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងជា ប្រធានអង្គភាពគ្រប់គ្រងសមាសភាគគម្រោង-១(Component Management Unit-1) លោក កូវ ភារម្យ ប្រធានក្រុមការងារគម្រោង លោកស្រី Marie Krumova Chapuis ប្រធានក្រុមការងារ និង សហការីធនាគារពិភពលោកប្រចាំកម្ពុជា សមាជិកសមាជិកាក្រុមការងារអង្គភាពគ្រប់គ្រងសមាសភាគ គម្រោងទាំងពីរ និងភាគីពាក់ព័ន្ធ តាមប្រព័ន្ធវីដេអូពីចម្ងាយ។ កិច្ចប្រជុំនេះបានប្រព្រឹត្តទៅចាប់ពីថ្ងៃទី១៣-១៧ ខែកុម្ភៈ ឆ្នាំ២០២៣ ផ្ដោតជាសំខាន់លើរបៀបវារៈមួយ ចំនួនរួមមាន៖ ១) ការពិនិត្យវាយតម្លៃវឌ្ឍនភាពការងារ ដែលបានអនុវត្តចាប់ពីបេសកកម្មចុងក្រោយ កាលពីខែកញ្ញា-តុលា ឆ្នាំ២០២២ និងការពន្លឿនសកម្មភាពអនុវត្តគម្រោងឱ្យសម្រេចបានទៅតាម ផែនការដែលបានគ្រោងទុកប្រកបដោយប្រសិទ្ធភាព ២) ការពិភាក្សាកម្រិតបច្ចេកទេសជាមួយអង្គភាពលូទឹក និងច្រោះសម្អាតទឹកសំណល់ និងការពិនិត្យអនុលោមភាពការងារហិរញ្ញវត្ថុ លទ្ធកម្ម ការគ្រប់គ្រង និងការគាំពារបរិស្ថាននិងសង្គមផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្ដមរដ្ឋលេខាធិការ បានផ្ដាំផ្ញើឱ្យគ្រប់ភាគីទាំងអស់ខិតខំប្រឹង ប្រែងបំពេញការងារឱ្យអស់ពីសមត្ថភាព ចូលរួមសហការសម្របសម្រួលជាមួយក្រុមការងារបេសកកម្ម របស់ធនាគារពិភពលោក សំដៅធ្វើយ៉ាងណាសម្រេចបានលទ្ធផលប្រកបដោយផ្លែផ្កាក្នុងបេសកកម្ម គាំទ្រការអនុវត្តគម្រោងលើកទី០៨នេះ ជាពិសេស រិះរកគ្រប់មធ្យោបាយ និងយុទ្ធសាស្ត្រ ក្នុងការជំរុញការរៀបចំគម្រោងឱ្យប្រព្រឹត្តទៅតាមផែនការដែលបានគ្រោងទុក។ គួរកត់សម្គាល់ថា៖ គម្រោងនេះផ្តោតជាសំខាន់លើការអភិវឌ្ឍវិស័យទឹកស្អាត និងអនាម័យ ដើម្បីធានា សុខុមាលភាពប្រជាពលរដ្ឋ និងលើកកម្ពស់ជីវភាពរស់នៅរបស់ពួកគាត់ឱ្យមានការរីកចម្រើនថែមមួយ កម្រិតទៀត តាមរយៈការសាងសង់បណ្តាញទឹកស្អាត និងទឹកកខ្វក់ នៅតាមបណ្តារាជធានី-ខេត្ត សំខាន់ៗ និងការអភិវឌ្ឍស្ថាប័ន និងសមត្ថភាពប្រតិបត្តិករទាំងវិស័យទឹកស្អាត និងអនាម័យផងដែរ៕