កិច្ចប្រជុំពិភាក្សាអំពីវឌ្ឍនភាពការងារនៃគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្រុងតាខ្មៅ ជាមួយក្រុមហ៊ុនទីប្រឹក្សាបច្ចេកទេស DOHWA Engineering Co., Ltd. និងក្រុមហ៊ុន Seoyoung Engineering Co., Ltd. តាមប្រព័ន្ធវីដេអូពីចម្ងាយ ទីស្ដីការក្រសួង៖ ថ្ងៃសុក្រ ៦កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែមករា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំ កិច្ចប្រជុំជាមួយក្រុមហ៊ុនទីប្រឹក្សាបច្ចេកទេស DOHWA Engineering Co., Ltd. និងក្រុមហ៊ុន Seoyoung Engineering Co., Ltd. តាមប្រព័ន្ធវីដេអូពីចម្ងាយ ដើម្បីពិភាក្សាអំពីវឌ្ឍនភាពការងារនៃគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្រុងតាខ្មៅ ក្រោមឥណទានសម្បទានពីធនាគារនីហរ័ណ អាហរ័ណកូរ៉េ ដោយមានការចូលរួមពីថ្នាក់ដឹកនាំក្រសួងទទួលបន្ទុក មន្ត្រីជំនាញបច្ចេកទេស នៃអគ្គនាយកដ្ឋានប្រព័ន្ធចម្រោះទឹកកខ្វក់ និងសមាជិកសមាជិកាអង្គភាពគ្រប់គ្រងគម្រោងផងដែរ។ អង្គប្រជុំបានពិភាក្សាលើការកំណត់ពេលវេលាផ្ដល់ឯកសាររបាយការណ៍រចនាប្លង់លម្អិត ឯកសារដេញថ្លៃ និងរបាយការណ៍ពង្រាងចុងក្រោយនៃគម្រោង ដើម្បីជំរុញឱ្យការងារនេះអាចអនុវត្តទៅបានដោយរលូនតាមផែនការដែលបានគ្រោងទុក។ ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការ បានផ្ដល់អនុសាសន៍ដល់ក្រុមហ៊ុនទីប្រឹក្សាបច្ចេកទេសរៀបចំឯកសាររបាយការណ៍រចនាប្លង់លម្អិត និងរបាយការណ៍ពង្រាងចុងក្រោយនៃគម្រោង ឱ្យបានរួចរាល់ ត្រឹមខែមករា ឆ្នាំ២០២៣ ហើយបញ្ជូនមកក្រសួងសាធារណការ និងដឹកជញ្ជូន ដើម្បីអាចឱ្យក្រុមការងារបច្ចេកទេសបន្តអនុវត្តកិច្ចការជំហានបន្ទាប់សម្រាប់គម្រោងបាន៕