លោកនាយករដ្ឋមន្ត្រី ហ៊ុន សែន បានមានប្រសាសន៍ថា រយៈពេលប្រមាណ១០ថ្ងៃខាងមុខការដ្ឋានសាងសង់ចំនួន២ទៀតនឹងចាប់ផ្តើមបើកដំណើរការ។ ការដ្ឋានទាំង២ដែលនឹងត្រូវបើកនាឆ្នាំ២០២៣ខាងមុនរួមមាន៖ ការដ្ឋានស្ថាបនាផ្លូវ និង ស្ពានឆ្លងកាត់ទន្លេមេគង្គនៅខេត្តក្រចេះ ដែលនឹងធ្វើឡើងនៅថ្ងៃទី០២ ខែមករា ឆ្នាំ២០២៣។ ដោយឡែក ការដ្ឋានសាងសង់ទី២នឹងធ្វើឡើងនៅថ្ងៃទី០៩ ខែកមរា ឆ្នាំ២០២៣ ដោយបើកការដ្ឋានពង្រីកផ្លូវនៅក្នុងឃុំមួយដែលតភ្ជាប់នៅខេត្តកំពង់ចាម គឺផ្លូវជាតិលេខ៧។ គួរបញ្ជាក់ថា លោកនាយករដ្ឋមន្ត្រី ហ៊ុន សែន លើកឡើងបែបនេះនៅក្នុងឱកាសអញ្ជើញបើកការដ្ឋានស្តារ និងលើកកម្រិតគុណភាពផ្លូវពីរខ្សែ គឺផ្លូវជាតិលេខ៣១និង៣៣ ស្ថិតក្នុងភូមិសាស្ត្រខេត្តកំពត និងខេត្តកែប នាព្រឹកថ្ងៃទី៣០ ខែធ្នូ ឆ្នាំ២០២២នេះ៕