គិតត្រឹមខែវិច្ឆិកា ឆ្នាំ២០២២ ការសាងសង់ផ្លូវជាតិលេខ ៤៨ មានរយៈពេលជាង ១១ ខែហើយ ហើយគម្រោងផ្លូវជាតិដ៏សំខាន់នេះ បានសម្រេចវឌ្ឍនភាពការងារបាន ១១,៧៦%ហើយ ខណៈផ្លូវនេះគ្រោងនឹងបញ្ជាប់ការសាងសង់ក្នុងខែមិថុនា ឆ្នាំ២០២៤។ នេះបើយោងតាមបញ្ជាក់របស់ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ ក្រសួងសាធារណការ និងដឹកជញ្ជូន ក្នុងឱកាសចុះត្រួតពិនិត្យសម្រេចវឌ្ឍនភាពការងារផ្លូវជាតិលេខ៤៨ កាលពីថ្ងៃទី២១ ខែវិច្ឆិកា ឆ្នាំ២០២២ ។ការចុះពិនិត្យនេះធ្វើឡើងក្នុងគោលបំណងដើម្បីពិនិត្យតាមដានពីស្ថានភាពវិវឌ្ឍនជាក់ស្ដែងក្នុងការដ្ឋាន សង់សង់ផ្លូវជាតិលេខ៤៨ ដែលអនុវត្តការសាងសង់ដោយក្រុមហ៊ុនកូរ៉េ IL SUNG & HANIL Joint Venture ដើម្បីអាចឱ្យក្រុមការងារអនុវត្តគម្រោងរៀបចំផែនការសកម្មភាពបន្ទាប់ សំដៅពន្លឿនការសាងសង់ឱ្យសម្រេចបញ្ចប់តាមផែនការកំណត់។ ជាមួយគ្នានេះដែរគម្រោងផ្លូវជាតិលេខ៥៨​នេះតភ្ជាប់ចាប់ពីចំណុចប្រសព្វផ្លូវជាតិលេខ៤ ត្រង់គីឡូម៉ែត្រលេខ ១៤១+៧៥០ ដែលមានប្រវែងសរុប ១៤៨ គីឡូម៉ែត្រ មានទីតាំងស្ថិត ក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង។គួរបញ្ជាក់ផងដែរថាគម្រោងសាងសង់ផ្លូវជាតិខាងលើនេះ បើកការដ្ឋានសាងសង់តាំងពីថ្ងៃទី៣ ខែកមរា ឆ្នាំ២០២២មកម៉្លេះ ដោយចំណាយថវិកាសរុបប្រមាណ ៦៥,១៤លានដុល្លារ ហើយផ្លូវនេះទៀតសោតបែងចែកជា២គន្លង ប្រវែង ១២២,៩គីឡូម៉ែត្រ និងផ្លូវ៤គន្លងមានប្រវែង ២៥,១គីឡូម៉ែត្រ ក្រាលដោយបេតុងកៅស៊ូ (AC) កម្រាស់ ០៧សង់ទីម៉ែត្រ រួមជាមួយបេតុងសរសៃដែក ដែលនឹងប្រើប្រាស់ត្រង់ផ្លូវប្រសព្វចំនួន៥ទីតាំង៕