[Kampucheathmey] - គ្រោងសាងសង់ផ្លូវកាត់ថ្មី ធ្វើដំណើរពីស្រុកកោះធំទៅអ្នកលឿងកាន់តែលឿន
2022-11-01
Go to the website published Kampucheathmey
ផ្លូវថ្មីមួយខ្សែទៀតស្ថិតនៅក្នុងខេត្តកណ្តាល គ្រោងនឹងបើកការដ្ឋានសាងសង់ឆាប់ៗនេះ ក្រោយសិក្សាចប់សព្វគ្រប់។
លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងក្នុងសន្និសីទរបស់ក្រសួងកាលពីសប្តាហ៍មុនថា ផ្លូវថ្មីមួយខ្សែនេះបានចរចាចប់សព្វគ្រប់ហើយ នៅរង់ចាំតែថ្ងៃបើកការដ្ឋានសាងសង់តែប៉ុណ្ណោះ។
លោក ស៊ុន ចាន់ថុល បានបញ្ជាក់ថា ផ្លូវលេខ ២៣ ជាផ្លូវថ្មីតភ្ជាប់ពីឃុំលើកដែកស្រុកកោះធំ ទៅស្រុកលើកដែកខេត្តកណ្តាល។
បើតាមលោករដ្ឋមន្រ្តី តាមរយៈផ្លូវថ្មីលេខ ២៣ នេះ បងប្អូននៅឃុំលើកដែក ស្រុកកោះធំ បើចង់ទៅលេងអ្នកលឿង មិនបាច់មកភ្នំពេញតាមផ្លូវជាតិលេខ១ គឺអាចធ្វើដំណើរត្រង់តាមផ្លូវលេខ ២៣ នេះតែម្តង។
ខេត្តកណ្តាលកំពុងអភិវឌ្ឍផ្លូវយុទ្ធសាស្រ្តថ្មីៗចំនួន ២ ខ្សែទៀត។ ផ្លូវទី១ មានប្រវែងបណ្តោយជាង ៧ គីឡូម៉ែត្រ ទទឹង ៦០ ម៉ែត្រ សាងសង់ចេញពីក្បែរច្រកទ្វារក្អមអន្តរជាតិសំណស្រុកលើកដែកឆ្ពោះទៅស្រុកកោះធំ និងផ្លូវថ្មីមួយខ្សែទៀតមានប្រវែង ៣២ គីឡូម៉ែត្រ ទទឹង៥០ម៉ែត្រ ចេញពីស្រុកលើកដែក ឆ្ពោះទៅផ្លូវក្រវាត់ក្រុងទី៣ ឬចំណុចបំបែកផ្លូវលេខ១ ម្តុំខាងលិចស្ពានអ្នកលឿង។
ដោយឡែក ក៏កំពុងសិក្សាកសាងផ្លូវប្រវែងជាង ៥ គីឡូម៉ែត្រ ទទឹង ៥០ ម៉ែត្រឆ្ពោះទៅស្រុកកោះធំមួយផ្សេងទៀតផងដែរ៕
