ភ្នំពេញ៖ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន នៅថ្ងៃចន្ទទី២៧ ខែមិថុនា ឆ្នាំ២០២២នេះ បានអញ្ជើញជាអធិបតីក្នុងកម្មវិធីបើកវិញ្ញាសារប្រឡងបញ្ចប់ ឆមាសទី១ ឆ្នាំទី២របស់និស្សិតជំនាន់ទី១ វិទ្យាស្ថានតេជោសែន សាធារណការ និងដឹកជញ្ជូន សម្រាប់ឆ្នាំសិក្សា២០២១-២០២២ ដោយមានការចូលរួមពីថ្នាក់ដឹកនាំវិទ្យាស្ថាន លោក លោកស្រី ថ្នាក់ដឹកនាំនាយកដ្ឋាន និងក្រុមការងារវិទ្យាស្ថានផងដែរ។ នាឱកាសនោះ ឯកឧត្តមនាយកវិទ្យាស្ថានបានគូសបញ្ជាក់អំពីបេសកកម្មរបស់វិទ្យាស្ថានក្នុងការបណ្តុះបណ្តាលនិស្សិតដ៏មានសក្តានុពល ឱ្យមានសមត្ថភាពពិតប្រាកដ ចំណេះដឹងទូលំទូលាយ និង សីលធម៌ គុណធម៌។ឯ ឯកឧត្តមបានសម្តែងសេចក្តីសោមនស្សរីករាយ ដែលបានចូលរួម បើកវិញ្ញាសារប្រឡងបញ្ចប់ឆមាសទី១ ឆ្នាំទី២ ជូននិស្សិតជំនាន់ទី១ របស់វិទ្យាស្ថានតេជោសែន សាធារណការ និងដឹកជញ្ជូន និងបានជំរុញលើកទឹកចិត្តឱ្យក្មួយៗនិស្សិតទាំងអស់ខិតខំប្រឹងប្រែងប្រឡងឱ្យបានជាប់ទាំងអស់គ្នា ដោយគោរពតាមបទបញ្ជា និងការណែនាំរបស់វិទ្យាស្ថាន ក៏ដូចជាបទបញ្ជា និងការណែនាំរបស់អនុរក្សដែលឈរពិនិត្យតាមដានការប្រឡងនៅក្នុងថ្នាក់ប្រឡងរយៈពេលបីថ្ងៃនេះ។ ឯកឧត្តមក៏បានថ្លែងអំណរគុណផងដែរដល់ថ្នាក់ដឹកនាំ និងក្រុមការងារវិទ្យាស្ថានដែលបានខិតខំប្រឹងប្រែងរៀបចំការប្រឡងឆមាសទី១ ឆ្នាំទី២ របស់និស្សិតជំនាន់ទី១ នៃវិទ្យាស្ថានតេជោសែន សាធារណការ និងដឹកជញ្ជូន៕ សូមជម្រាបជូនថា៖ ការប្រឡងបញ្ចប់ឆមាសទី១ ឆ្នាំទី២ របស់និស្សិតវិទ្យាស្ថានតេជោ សែន សាធារណការ និងដឹកជញ្ជូន ជំនាន់ទី១ ឆ្នាំសិក្សា២០២១-២០២២ នេះ នឹងប្រព្រឹត្តទៅរយៈពេលបីថ្ងៃពេញ ទាំងព្រឹក និងពេលរសៀល ចាប់ពីថ្ងៃទី២៧ ដល់ថ្ងៃទី២៩ ខែមិថុនា ឆ្នាំ២០២២ នៅសាលប្រជុំទីស្តីការក្រសួង ដែលមាននិស្សិតជំនាន់ទី១ ចូលរួមប្រឡងលើឯកទេសចំនួន ៣ និងជំនាញចំនួន ៦ រួមមាន៖ ១. ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ ២. ជំនាញប្រព័ន្ធចម្រោះទឹកកខ្វក់ ៣. ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤. ជំនាញភស្តុរភារកម្ម និងគ្រប់គ្រងខ្សែច្រវាក់ផ្គត់ផ្គង់ ៥. ជំនាញបើកបរនាវា និង៦. ជំនាញម៉ាស៊ីននានា៕