ភ្នំពេញ ៖ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវ៉ាក់ផ្គត់ផ្គង់នៅកម្ពុជា នាព្រឹកថ្ងៃទី២៣ ខែឧសភា ឆ្នាំ២០២២នេះ បានលើកឡើងថា ក្រោយពីរាជរដ្ឋាភិបាល សម្រេចបើកដំណើរការសង្គម-សេដ្ឋកិច្ចទាំងស្រុងឡើងវិញ កាលពីខែវិច្ឆិកា ឆ្នាំ២០២១មក សកម្មភាពនៃការដឹកជញ្ជូនទំនិញ ទាំងចេញនិងចូល ប្រទេសកម្ពុជា មានការកើនឡើង។ លោកបានបញ្ជាក់ថា ការកើនឡើងទំហំនៃការដឹកជញ្ជូននេះ ដោយសារការផលិតនៅក្នុងប្រទេស មិនមានការរាំងស្ទះ ពីការរាតត្បាតដោយជំងឺកូវីដ-១៩។ មានប្រសាសន៍ នៅក្នុងឱកាសដែលសមាគម ធ្វើកិច្ចប្រជុំបូលសរុបការងារឆ្នាំ២០២១ និងទិសដៅឆ្នាំ២០២២ និងប្តូរឈ្មោះសមាគម ពីសមាគមពាណិជ្ជករដឹកជញ្ជូនទំនិញ ទៅជាសមាគមពាណិជ្ជករដឹកជញ្ជូន និងខ្សែច្រវ៉ាក់ផ្តត់ផ្គង់នៅកម្ពុជា, លោក ជា ចាន់ដារ៉ា បានបង្ហាញក្តីរំពឹងថា ទំហំនៃការដឹកជញ្ជូននាំចេញ-នាំចូលរបស់កម្ពុជា នឹងមានការកើនឡើងខ្លាំង សម្រាប់ឆ្នាំ២០២២នេះ ដោយសារមិនមានការរាំងស្ទះ ដោយសារការរាតត្បាតពីជំងឺកូវីដ-១៩ ហើយតម្លៃនៃការដឹកជញ្ជូន ក៏ថោកជាង បើធៀបនឹងអំឡុងពេល ដែលមានការរាតត្បាតខ្លាំង ពីសំណាក់ជំងឺឆ្លងសាកលនេះ។ "ឆ្នាំ២០២២នេះ ខ្ញុំគិតថា វាល្អប្រសើរខ្លាំង ដោយសារការផលិតយើង មិនមានការរាំងស្ទះ ដូចនេះការនាំចេញ ក៏ដូចជាការនាំចូល គឺនឹងអាចមានការកើនឡើងច្រើន ហើយយើងបានមើលឃើញថា តម្លៃនាំការដឹកជញ្ជូនតាមផ្លូវទឹក ក៏មានការធ្លាក់ថ្លៃ ដោយក្នុងអំឡុងពេលឆ្នាំ២០២០ និង២០២១ ការនាំចេញទំនិញតាមនាវា មានតម្លៃកើនឡើងដល់២ម៉ឺន ឬជាង២ម៉ឺនដុល្លារក្នុងមួយកុងតឺន័រ ប៉ុន្តែបច្ចុប្បន្ននេះ បានធ្លាក់ថ្លៃមកនៅត្រឹម១ម៉ឺនដុល្លារជាងប៉ុណ្ណោះ ក្នុងមួយកុងតឺន័រ", នេះបើតាមការសម្តីរបស់លោក ជា ចាន់ដារ៉ា។ ពាក់ព័ន្ធនឹងការផ្លាស់ប្តូរឈ្មោះសមាគមនេះ, លោក ជា ចាន់ដារ៉ា បានបញ្ជាក់ថា ធ្វើឡើងក្នុងគោលបំណង ពង្រីកវិសាលភាពរបស់សមាគម និងសមាជិក ព្រមទាំងមានទិសដៅ ក្នុងការបង្កើតសាខា នៅទូទាំង២៥រាជធានី/ខេត្តផងដែរ។ សូមជម្រាបថា កំពង់ផែស្វយ័តភ្នំពេញ សម្រាប់ឆ្នាំ២០២១ សម្រេចបានលទ្ធផលអាជីវកម្ម ដោយទទួលបាននូវបរិមាណកុងតឺន័រ ចំនួនជិត៣៥ម៉ឺន TEUs (៣៤៨.៨៩៨TEUs) ដែលអនុវត្តបាន លើសផែនការឆ្នាំ២០២១ ចំនួន១៣% និងកើនឡើងចំនួន២០% ធៀបនឹងការអនុវត្តឆ្នាំ២០២០៕ អត្ថបទ ៖ សន ពិសិដ្