រដ្ឋមន្រ្តីក្រសួងសាធារណការ និងដឹកជញ្ជូន លោកស៊ុន ចាន់ថុល បានឱ្យដឹងថាក្រុមហ៊ុនសាងសង់ផ្លូវល្បឿនលឿនភ្នំពេញ-ព្រះសីហនុ នឹងអនុញ្ញាតឱ្យប្រជាពលរដ្ឋប្រើប្រាស់ផ្លូវល្បឿនលឿនភ្នំពេញ-ព្រះសីហនុដោយឥតគិតលុយរយៈពេលមួយខែ ក្រោយសម្ភោធដាក់ឱ្យប្រើប្រាស់ជាផ្លូវការរួចរាល់។ ក្នុងឱកាសដឹកនាំយុវជនក្រសួង និងសិស្សនិស្សិត នៃវិទ្យាស្ថានតេជោសែនសាធារណការ និងដឹកជញ្ជូន ប្រមាណជាង៤០០ នាក់ចុះទស្សនកិច្ចផ្លូវល្បឿនលឿន ភ្នំពេញ-ព្រះសីហនុ នាថ្ងៃទី២៦ ខែមេសា ឆ្នាំ២០២២នេះ លោករដ្ឋមន្រ្តី ក៏បានឱ្យដឹងដែរថាក្នុងឆ្នាំទី១ ប្រជាពលរដ្ឋដែលប្រើប្រាស់ផ្លូវល្បឿនលឿននឹងត្រូវគិតលុយម្តង១២ដុល្លារអាមេរិក។  លោករដ្ឋមន្រ្តីបានបន្ថែមថា ផ្លូវល្បឿនលឿននេះលោកស្នើអាចឱ្យមានការបើកបរកុងទ័រ១២០គីឡូម៉ែត្រក្នុងមួយម៉ោង ខណៈម៉ូតូ និងម៉ូតូកង់បីមិនអនុញ្ញាតឱ្យបើកបរឡើយ។ សូមជម្រាបជូនថា គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧,០៥គីឡូម៉ែត្រ អនុវត្តការសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់៤៨ខែ គ្រោងចំណាយថវិកាប្រមាណ ២០១៩លានដុល្លារ សហរដ្ឋអាមេរិក។ ផ្លូវនេះបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ដែលគិតត្រឹមថ្ងៃទី២៦ ខែមេសានេះ ដំណើរការនៃការដ្ឋានសាងសង់គឺស្ថិតក្នុងដំណាក់កាលនៃការសាងសង់បញ្ចប់ ដែលគ្រោងនឹងបញ្ចប់នៅថ្ងៃទី៣១ ខែឧសភា ឆ្នាំ២០២៣ និងគ្រោងដាក់ឱ្យដំណើរការសាកល្បងនៅក្នុងខែកក្កដា ឆ្នាំ២០២២ ខាងមុខនេះ៕ ដោយ៖ ម៉ៅ សុភ័ក្រ្តា