[Phnom Penh Post] - ក្នុងខែមីនា រថយន្តដឹកលើសទម្ងន់ជិត ៣០០ គ្រឿង ត្រូវបានឃាត់ទុករយៈពេល ១ ឆ្នាំ
2022-04-19
Go to the website published Phnom Penh Post
ភ្នំពេញៈ រថយន្តដឹកលើសទម្ងន់ជិត ៣០០ គ្រឿងត្រូវបានឃាត់ទុករយៈពេល ១ ឆ្នាំ និងត្រូវបានផាកពិន័យជាទឹកប្រាក់ជាង ១២ ម៉ឺនដុល្លារ នៅក្នុងខែមីនា ឆ្នាំ ២០២២ ដែលចំនួនរថយន្តដឹកលើសទម្ងន់នេះមានការថយចុះ ៥ ភាគរយ បើប្រៀបធៀបទៅនឹងរយៈពេលដូចគ្នាក្នុងខែកុម្ភៈ។ នេះបើយោងតាមរបាយការណ៍របស់ក្រសួងសាធារណការ និងដឹកជញ្ជូន។
គណៈកម្មាធិការសម្របសម្រួលអចិន្រៃ្តយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៃក្រសួងសាធារណការបានឱ្យដឹងថា នៅក្នុងខែមីនា ឆ្នាំ ២០២២ មន្ត្រីជំនាញពាក់ព័ន្ធបានចាប់រថយន្តដឹកជញ្ជូនលើសទម្ងន់ចំនួន ២៨២ គ្រឿង និងពិន័យបានថវិកាសរុបចំនួន ៤៩៩ លានរៀល (១២ ម៉ឺនដុល្លារ) ដែលចំនួននេះមានការថយចុះចំនួន ១៧ គ្រឿងស្មើ ៥ ភាគរយ បើធៀបនឹងទិន្នន័យ ខែកុម្ភៈ ឆ្នាំ ២០២២ ដែលមានចំនួន ២៩៩ គ្រឿង ។
ទន្ទឹមនេះដែរ ក្រសួងអំពាវនាវដល់ម្ចាស់រថយន្តដឹកទំនិញទាំងអស់សូមបញ្ឈប់ការដឹកលើសទម្ងន់នាំឱ្យខាតបង់ថវិកាផ្ទាល់ខ្លួន និងខូចខាតទ្រព្យសម្បត្តិសាធារណៈផងដែរ។
ក្រសួងបន្តថា៖ «សូមម្ចាស់រថយន្តដឹកទំនិញទាំងអស់ត្រូវដឹងថា ការបង្កផលប៉ះពាល់ដែលបណ្តាលមកពីការដឹកជញ្ជូនលើសទម្ងន់ គឺបានបំផ្លាញផ្លូវជាតិដែលនាំឱ្យខាតបង់ថវិកាជាតិ ព្រមទាំងបង្កនូវគ្រោះថ្នាក់ប៉ះពាល់ដល់ទ្រព្យសម្បត្តិសាធារណៈ និងជីវិតមនុស្ស»។
ប្រធានលេខាធិការដ្ឋានត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ លោក តាំង ពៅ ប្រាប់ភ្នំពេញប៉ុស្តិ៍នៅថ្ងៃទី ១៨ ខែមេសាថា រថយន្តទាំងនោះត្រូវបានឃាត់ទុករយៈពេល ១ ឆ្នាំ ដោយគិតចាប់ពីថ្ងៃចាប់បាន ហើយចំពោះរថយន្តដឹកលើសទម្ងន់ក្នុង ១ តោនត្រូវផាកពិន័យ ៣០ ម៉ឺនរៀល។ លោកបន្តថា រថយន្តដឹកលើសទម្ងន់ទាំងនោះភាគច្រើនចាប់បាននៅខេត្តកណ្តាលហើយជាប្រភេទរថយន្តដឹកខ្សាច់ ថ្ម ហើយមានដឹកទំនិញផ្សេងៗដូចជាគ្រឿងសំណង់ ស៊ីម៉ងត៍ ជាដើម។
លោកថា៖ «ដឹកខ្សាច់ ថ្ម សព្វថ្ងៃនេះភាគច្រើនដែលយើងប្រតិបត្តិការជួបប្រទះគឺនៅខេត្តកណ្តាលរថយន្តដឹកលើសទម្ងន់ច្រើនជាងគេ ដោយសារយើងដឹងហើយផ្លូវជាតិចេញពីភ្នំពេញទៅសុទ្ធតែខេត្តកណ្តាល អ៊ីចឹងយើងចាប់បានច្រើនជាងគេក្នុងខេត្តនេះ»។ លោកគូសបញ្ជាក់ផងដែរថា ក្រុមមន្ត្រីជំនាញកំពុងបន្តផ្សព្វផ្សាយ ពន្យល់ណែនាំដល់ម្ចាស់យានយន្ត ម្ចាស់អាជីវកម្មដឹកជញ្ជូន ការដ្ឋានអាជីវកម្មកិនថ្ម ដេប៉ូខ្សាច់ រណ្តៅដី និងសាធារណជនទាំងអស់ឱ្យបានជ្រាបកាន់តែ ទូលំទូលាយ អំពីបទដ្ឋានច្បាប់ នានាដែលពាក់ព័ន្ធនឹងការដឹកជញ្ជូនលើសទម្ងន់កម្រិតកំណត់ ជាពិសេសច្បាប់ស្តីពីផ្លូវថ្នល់ មាត្រា ៦០ និងមាត្រា ២៦ ដែលចែងពីការផាកពិន័យចំពោះការដឹកលើសទម្ងន់។
យោងច្បាប់ស្តីពីផ្លូវថ្នល់មាត្រា ៦០ បានចែងថា អ្នកប្រើប្រាស់យានយន្តដឹកជញ្ជូនធុនធ្ងន់ដែលដឹកជញ្ជូនទំនិញលើផ្លូវថ្នល់ដែលមិនចូលថ្លឹងនៅស្ថានីយជញ្ជីងតាមបណ្តាញផ្លូវ ត្រូវពិន័យអន្តរការណ៍ជាប្រាក់ចំនួន ៥ សែនរៀល ។ ផ្ទុកទម្ងន់មិនលើស ៥ ភាគរយនៃទម្ងន់កម្រិតកំណត់ត្រូវធ្វើការព្រមានជាលាយលក្ខណ៍អក្សរ ។
ផ្ទុកទម្ងន់លើសពី ៥ ភាគរយ ទៅ ១០ ភាគរយនៃទម្ងន់កម្រិតកំណត់ត្រូវរើទំនិញចេញ និងឃាត់យានជំនិះទុកចំនួន ១០ ថ្ងៃ និងត្រូវពិន័យអន្តរការណ៍ ជាប្រាក់ចំនួន ១០ ម៉ឺនរៀល ក្នុងទម្ងន់ ១ តោន ។ ផ្ទុកទម្ងន់លើសពី ១០ ភាគរយ ទៅ ២០ ភាគរយត្រូវរើទំនិញចេញ និងឃាត់យានជំនិះទុកចំនួន ១ ខែ និងពិន័យអន្តរការណ៍ជាប្រាក់ ចំនួន ២០ ម៉ឺនរៀល ក្នុងទម្ងន់ ១ តោន។ ផ្ទុកទម្ងន់លើសពី ២០ ភាគរយនៃទម្ងន់កម្រិតកំណត់ត្រូវវើទំនិញចេញ និងឃាត់យានជំនិះទុកចំនួន ១ ឆ្នាំនិងពិន័យអន្តរការណ៍ជា ប្រាក់ចំនួន ៣០ ម៉ឺនរៀលក្នុងទំនិញទម្ងន់ ១ តោន ។
មាត្រាដដែលបន្តថា ក្នុងករណីដឹកលើសទម្ងន់លើសកម្រិតអនុគ្រោះនឹងត្រូវផាកពិន័យកាន់តែច្រើន ហើយដកបណ្ណបើកបរ និងព្យួរទុករយៈពេល ២ ឆ្នាំ។ យោងតាមរបាយការណ៍របស់ក្រសួងសាធារណការបានឱ្យដឹងថា ការអនុវត្តការងារក្នុងរយៈពេល ១១ ខែ ឆ្នាំ ២០២១ បានត្រួតពិនិត្យយានយន្តសរុបចំនួន ២ ៣៣៤ ៣៧១ គ្រឿង យានយន្តដឹកលើសទម្ងន់កម្រិតកំណត់ចំនួន ៧៣៩ ៥៣៨ គ្រឿង ស្មើនឹង ៣១,៦៨% ក្នុងនោះយានយន្តផ្ទុកលើសក្នុងកម្រិតអនុគ្រោះ ចំនួន ៧៣៦ ៧៣៥ គ្រឿង៕
