ពិធីបើវគ្គបណ្តុះបណ្តាលលើកទី២ ស្តីពីការរៀបចំផែនការសកម្មភាពឆ្នាំ២០២២ របស់មន្ទីរសាធារណការ និងដឹកជញ្ជូនរាជធានី ខេត្ត ដែលមានការចូលរួមពីលោកប្រធានមន្ទីររាជធានី ខេត្ត លោក លោកស្រីជា អនុប្រធានមន្ទីរ ប្រធានការិយាល័យ អនុប្រធានការិយាល័យ និងមន្រ្តីជំនាញ សរុបចំនួន ៩០រូប ថ្ងៃពុធ ១២រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី០១ ខែធ្នូ ឆ្នាំ២០២១ ឯកឧត្តម សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលលើកទី២ ស្តីពីការរៀបចំផែនការសកម្មភាពឆ្នាំ២០២២ របស់មន្ទីរសាធារណការ និងដឹកជញ្ជូនរាជធានី ខេត្ត តាមប្រព័ន្ធវីដេអូ (Zoom)។ វគ្គបណ្តុះបណ្តាលនេះមានគោលបំណងសំខាន់ក្នុងការរៀបចំវគ្គបណ្តុះបណ្តាលជាលើកទី២នេះ គឺដើម្បីពង្រឹងសមត្ថភាព និងលើកកម្ពស់ការយល់ដឹងបន្ថែមទៀតដល់ថ្នាក់ដឹកនាំ និងមន្រ្តីបង្គោល ដើម្បីជំរុញការរៀបចំផែនការសកម្មភាពឆ្នាំ២០២២ របស់មន្ទីរសាធារណការ និងដឹកជញ្ជូនរាជធានី ខេត្ត ឱ្យកាន់តែមានប្រសិទ្ធភាពខ្ពស់ និងមានសង្គតិភាពច្បាស់លាស់ស្របតាមទម្រង់តែមួយ ឈានឆ្ពោះទៅសម្រេចឱ្យបានតាមយុទ្ធសាស្រ្តចតុកោណដំណាក់កាលទី៤, ផែនការយុទ្ធសាស្រ្តអភិវឌ្ឍន៍ជាតិ រួមទាំងផែនការ និងគោលនយោបាយនានារបស់រាជរដ្ឋាភិបាល និងទិសដៅរបស់ក្រសួងសាធារណការ និងដឹកជញ្ជូនដែលបានដាក់ចេញនាពេលកន្លងមក។ ក្រសួងសាធារណការ និងដឹកជញ្ជូន បានរៀបចំផែនការសកម្មភាពរបស់ថ្នាក់ដឹកនាំ និងអង្គភាពថ្នាក់ជាតិ ចំនួន២ឆ្នាំជាប់ៗគ្នារួចមកហើយ ដែលឆ្នាំ២០២០ មានចំនួនសរុប ៤៣៨ សកម្មភាព និងឆ្នាំ២០២១ មានចំនួនសរុប ៩៣៨ សកម្មភាព។ ដោយឡែកសម្រាប់ឆ្នាំ២០២២ នាពេលខាងមុខនេះ សកម្មភាពដែលរួមបញ្ចូលទាំងអង្គភាពថ្នាក់ក្រោមជាតិ ត្រូវបានរំពឹងទុកថានឹងមានចំនួនកើនឡើងសរុបជាង២០០០ សកម្មភាព ដែលត្រូវធ្វើការពិនិត្យ តាមដាន និងវាយតម្លៃឱ្យបានច្បាស់លាស់ ដើម្បីជាឧបករណ៍ក្នុងការអនុវត្តការងារឱ្យកាន់តែមានប្រសិទ្ធភាពបន្ថែមទៀតជូនរាជរដ្ឋាភិបាល៕