ឯកឧត្តមរដ្ឋលេខាធិការ ប៉ាល់ ចន្ទតារា ដឹកនាំ ក្រុមការងារបច្ចេកទេសចុះត្រួតពិនិត្យស្ថានភាព ផ្លូវជាតិលេខ៣៣ ស្ថិតក្នុងភូមិសាស្ត្រខេត្តកំពត និងខេត្តកែប នៅព្រឹកថ្ងៃព្រហស្បតិ៍ ១៤រោច ខែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៨ ខែកក្កដា ឆ្នាំ ២០២១ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំ ក្រុមការងារបច្ចេកទេសចុះត្រួតពិនិត្យស្ថានភាពផ្លូវជាតិលេខ៣៣ស្ថិតក្នុងភូមិសាស្ត្រខេត្តកំពត និងខេត្ត កែប ដោយមានការចូលរួមពីឯកឧត្តមអនុរដ្ឋលេខាធិការ ភី សុភាត់ លោកប្រធានមន្ទីរសាធារណការ និងដឹកជញ្ជូនខេត្តកំពត លោកប្រធានមន្ទីរសាធារណការ និងដឹកជញ្ជូនខេត្តកែប ក្រុមការងារនៃក្រុមហ៊ុនសាជីវកម្មស្ពានថ្នល់ចិន(CRBC)ផងដែរ។ ក្នុងដំណើរចុះពិនិត្យនេះ ក្រុមការងារបច្ចេកទេស បានអញ្ជើញចុះពិនិត្យមើលលទ្ធភាពសាងសង់ស្ពាន ឆ្លងកាត់ផ្លូវដែលស្ថិតនៅក្រៅកិច្ចសន្យាគម្រោង មានទីតាំងឋិតនៅមុខសាកលវិទ្យាល័យខេត្តកែប តាម ការស្នើសុំសាងសង់ពីសាលាខេត្តកែប ក្នុងនោះក្រុមការងារបានចុះពិនិត្យមើលផលប៉ះពាល់ទីតាំង ជាក់ស្តែង និងបានជជែកពិភាក្សាលម្អិតទៅលើហេដ្ឋារចនាសម្ព័ន្ធមួយចំនួនដែលមានចែងនៅក្នុង សៀវភៅបន្ទុកផងដែរ៕