រដ្ឋាភិបាលជប៉ុនបានប្រកាសពីការផ្ដល់ហិរញ្ញប្បទានឥតសំណង របស់ខ្លួនដល់ប្រទេសកម្ពុជាដែលមានចំនួន​​ប្រមាណ១០លាន៨សែនដុល្លារអាមេរិកសម្រាប់គម្រោងអភិវឌ្ឍន៍ប្រព័ន្ធចរាចរនាវានៅកំពង់ផែស្វយ័តក្រុងព្រះសីហនុ។ លិខិតប្តូរសារអំពីហិរញ្ញប្បទានឥតសំណងរបស់ជប៉ុននេះ ត្រូវបានចុះហត្ថលេខារវាងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេសកម្ពុជា និងលោក មិកាមិ ម៉ាសាហ៊ីរ៉ូ ឯកអគ្គរដ្ឋទូតជប៉ុនប្រចាំកម្ពុជា កាលពីម្សិលមិញ តាមប្រព័ន្ធវីដេអូ ។ ការផ្ដល់ហិរញ្ញប្បទានឥតសំណងនេះគឺត្រូវបានធ្វើឡើងដើម្បីឆ្លើយតបទៅនឹងសំណើ របស់រាជរដ្ឋាភិបាលកម្ពុជា និងដើម្បីពង្រឹងទំនាក់ទំនងមិត្តភាព ព្រមទាំងកិច្ចសហប្រតិបត្តិការ រវាងជប៉ុន-កម្ពុជា ។ គម្រោងនេះនឹងបង្កើតប្រព័ន្ធចរាចរនាវា (VTS) ដើម្បីធ្វើឲ្យប្រសើរឡើងនូវសុវត្ថិភាពផ្លូវសមុទ្រនិង ប្រសិទ្ធភាពការធ្វើនាវាចរណ៍ នៅជុំវិញកំពង់ផែស្វយ័តក្រុងព្រះសីហនុ។ តាមរយៈលទ្ធផល នៃគម្រោងនឹងមានវិធានការណ៍សុវត្ថិភាព នៅកំពង់ផែស្វយ័តក្រុងព្រះសីហនុ ការអភិវឌ្ឍសង្គមនិងសេដ្ឋកិច្ចរបស់ កម្ពុជាព្រមទាំងការតភ្ជាប់ ក្នុងតំបន់មេគង្គនឹងត្រូវបានលើកកម្ពស់។ ការអភិវឌ្ឍសេដ្ឋកិច្ចរបស់កម្ពុជា កំពុងតែបន្តលើកកម្ពស់ គុណភាពជីវភាពរស់នៅរបស់ ប្រជាជនម្នាក់ៗ ស្របគ្នាទៅនឹងការអភិវឌ្ឍសេដ្ឋកិច្ចជាតិទាំងមូល។ ជប៉ុនមានបំណងបន្តគាំទ្រ ដល់កិច្ចខិតខំប្រឹងប្រែង របស់រាជរដ្ឋាភិបាលកម្ពុជាដោយ ប្រើប្រាស់គ្រោងការណ៍អភិវឌ្ឍន៍ សេដ្ឋកិច្ច និងសង្គមនានា។ យោងតាមការចេញផ្សាយរបស់កាសែតខ្មែរថាមស៍ក្នុងខែកក្កដាឆ្នាំ ២០២០ កន្លងទៅ បានឲ្យដឹង ថាកំពង់ផែស្វយត័ក្រុងព្រះសីហនុ គ្រោងពង្រីកចំណតផែទឹកជ្រៅរបស់ខ្លួនបន្ថែមទៀត ខណៈដែលស្ថានីយចំនួន ២ បន្ថែមទៀតកំពុងសាងសង់ក្នុងពីរដំណាក់កាលដើម្បីដោះស្រាយចរាចរណ៍កុងតឺន័រដែលត្រូវបានព្យាករណ៍ថានឹងមានការកើនឡើងនៅឆ្នាំខាងមុខ។ ផែនការបច្ចុប្បន្នកំពុងដំណើរការសម្រាប់ការពង្រីកចំណតផែរបស់កំពង់ផែដែលមានប្រវែង ៤១០ ម៉ែត្រ និងជម្រៅ ១៦ ម៉ែត្រ ខណៈដែលការសាងសង់គ្រោងនឹងចាប់ផ្តើមនៅឆ្នាំនេះ ដែលគ្រោងនឹងបញ្ចប់នៅឆ្នាំ ២០២៤ ខាងមុខ។ ស្ថានីយទី ២ និងទី ៣ នឹងមានទំហំ ៤៤០ ម៉ែត្រ ជម្រៅ ១៧,៥ ម៉ែត្រ។ ទោះជាយ៉ាងណាក៏ដោយ ពេលវេលាក្នុងការសាងសង់ស្ថានីយទាំងនេះនៅមិនទាន់ត្រូវបានកំណត់នៅឡើយទេ។ អគ្គនាយករងកំពង់ផែស្វយត័ក្រុងព្រះសីហនុ លោកថៃ រិទ្ធី បានមានប្រសាសន៍ថាការសិក្សាលើដំណាក់កាលទី ២ និងទី ៣ នៃការពង្រីកស្ថានីយកំពង់ផែទឹកជ្រៅត្រូវបានធ្វើឡើងហើយ ខណៈកំពង់ផែកំពុងតែធ្វើការស្វែងរកថវិកាយ៉ាងសកម្មពីក្រសួង និងដៃគូអភិវឌ្ឍន៍នានាដើម្បីអភិវឌ្ឍគម្រោងនេះ។ យោងតាមរបាយការណ៍ហិរញ្ញវត្ថុឆ្នាំ ២០២០ របស់ខ្លួន ប្រាក់ចំណេញរបស់កំពង់ផែស្វយត័ក្រុងព្រះសីហនុសម្រាប់ឆ្នាំ ២០២០ បានធ្លាក់ចុះ ៥៤ ភាគរយ ដល់ចំនួន ១០,៣៧ លានដុល្លារ។ របាយការណ៍ហិរញ្ញវត្ថុនោះត្រូវបានចេញផ្សាយកាលពីថ្ងៃព្រហស្បតិ៍សប្តាហ៍មុន ហើយត្រូវបានពិនិត្យដោយ ក្រុម​ហ៊ុន​សវនកម្ម​ឯករាជ្យ PricewaterhouseCoopers (PwC)៕