(ភ្នំពេញ)៖ គិតត្រឹមថ្ងៃទី១២ ខែមករា ឆ្នាំ២០២១ គម្រោងស្ថាបនាហេដ្ឋារចនាសម្ព័ន្ធ ៣៨ខ្សែក្នុងក្រុងសៀមរាប សម្រេចបាន ១៤.២៧%ហើយ ដែលរួមបញ្ចូលការងារ សាងសង់រួច និងសម្ភារដែលបានបញ្ជូនដល់ការដ្ឋាន។ នេះបើយោងតាមខ្លឹមសារនៃកិច្ចប្រជុំចង្អៀត ដើម្បីពិភាក្សាលទ្ធផលការងារអនុវត្តគម្រោងស្ថាបនា ហេដ្ឋារចនាសម្ព័ន្ធចំនួន៣៨ខ្សែ នៅក្រុងសៀមរាប ខេត្តសៀមរាប ក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង នាថ្ងៃទី១៣ ខែមករា ឆ្នាំ២០២១ នៅទីស្តីការគណ:រដ្ឋមន្ត្រី។ កិច្ចប្រជុំនេះមានការចូលរួមពី ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ និងជាអនុប្រធានគណៈកម្មការអន្តរក្រសួង, ទេសរដ្ឋមន្ត្រី រដ្ឋមន្ត្រី និងជាអនុប្រធានអចិន្ត្រៃយ៍គណៈកម្មការអន្តរក្រសួងព្រមទាំងមន្ត្រី ជាន់ខ្ពស់ពាក់ព័ន្ធ ជាច្រើនរូបទៀតផងដែរ។ យោងតាមជាខ្លឹមសារនៃកិច្ចប្រជុំចង្អៀតនេះ ជាជំហានបន្ទាប់គណៈកម្មការអន្តរក្រសួង នឹងធ្វើការបន្តការត្រួតពិនិត្យតាមដានការងារ ព្រមទាំងធ្វើការដោះស្រាយ កែតម្រូវចំណុចខ្វះចន្លោះ ដើម្បីធានាថាការស្ថាបនានឹងពិតជាមានគុណភាពតាមបទដ្ឋាបច្ចេកទេសថ្នល់ និងសៀវភៅបន្ទុក ព្រមទាំងជំរុញដោះស្រាយនូវផលប៉ះពាល់ ដែលនៅសេសសល់មួយចំនួនតូចឱ្យបានចង់សព្វគ្រប់។ សូមបញ្ជាក់ថា គម្រោងស្ថាបនាហេដ្ឋារចនាសម្ព័ន្ធ ៣៨ខ្សែក្នុងក្រុងសៀមរាបនេះ គ្រោងប្រើប្រាស់រយៈពេល ១៣ខែក្នុងការសាងសង់ ដែលគ្រោងនឹងបញ្ចប់នៅចុង ឆ្នាំ២០២១ខាងមុខនេះ។ ទាំង៣៨ខ្សែនេះ ត្រូវបានបែងចែកជា ៤ប្រភេទរួមមាន៖ ប្រភេទទី១៖ ជាដែលស្ថិតក្នុងតំបន់ភ្ញៀវទេសចរធ្វើដំណើរច្រើន និងមានកម្រាលល្អ ត្រូវជួសជុលដោយអ៊ុតក្រាលបេតុងកៅស៊ូ AC (Asphalt Concrete) កម្រាស់ ៥ ស.ម ឡើងវិញ (Overlay)។ ប្រភេទទី២៖ ជាដែលស្ថិតក្នុងតំបន់ភ្ញៀវទេសចរធ្វើដំណើរច្រើន និងមានកម្រាលមិនល្អ ត្រូវសាងសង់ថ្មី ដោយចាក់ក្រាលបេតុងសរសៃដែកម្រាស់២០ ស.ម រួចក្រាលបេតុង កៅស៊ូAC កម្រាស់ ៧ស.ម ពីលើ។ ប្រភេទទី៣៖ ជាដែលមិនស្ថិតនៅតំបន់មានភ្ញៀវទេសចរធ្វើដំណើរច្រើន នឹងត្រូវសាងសង់ថ្មី ដោយចាក់ក្រាលបេតុងសរសៃដែកកម្រាស់ ២០ស.ម។ ប្រភេទទី៤៖ ជាវាងក្រុង ដោយកំណាត់ដែលមានតួនៅល្អ នឹងត្រូវជួសជុលអ៊ុត ក្រាលបេតុងកៅស៊ូ AC ឡើងវិញ ចំណែកកំណាត់ដែលមានតួ មិនល្អនឹងត្រូវសាងសង់ថ្មី ដោយចាក់ក្រាលបេតុងសរសៃដែក កម្រាស់២៥ស.ម។ ខ្សែទាំង ៣៨ខ្សែនេះ នឹងមានរៀបចំបណ្តាញលូទឹកភ្លៀង លូទឹកកខ្វក់ ប្រព័ន្ធការពារទឹកជំនន់បញ្ចៀសការជន់លិចទីក្រុង រៀបខឿនចិញ្ចើម និងបង្គោលភ្លើងបំភ្លឺ ហើយព្រមទាំងបាន គិតគូរពីទិដ្ឋភាពផ្សេងៗទៀតមានជាអាទិ៍ដូចជា៖ បណ្តាញខ្សែកាប ប្រព័ន្ធបញ្ជូនអគ្គិសនី ថ្មើជើង, សម្រាប់ជនពិការ, ជិះកង់, ចំណតរថយន្ត, ផ្លាកសញ្ញា និងគំនូសសញ្ញាចរាចរណ៍, ប្រព័ន្ធកាមេរ៉ាសុវត្ថិភាព, សួនច្បារ និងការដាំដើមឈើលម្អជាដើម។ គម្រោងសាងសង់ខ្សែទាំង ៣៨ខ្សែ និងការងាររៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ដែលនៅក្រៅគម្រោងសាងសង់ខ្សែទាំង៣៨នេះ នឹងត្រូវអនុវត្ត ការសាងសង់ដោយអង្គភាពចំនួន០៨ រួមមាន៖ កងវិស្វកម្ម លេខ ១៧៨-ថ្នល់នៃនាយកដ្ឋានវិស្វកម្ម, កងវិស្វកម្មសម្តេចតេជោខេត្តសៀមរាប, កងវិស្វកម្មតេជោ ហ៊ុន សែន សៀមរាប, អគ្គនាយកដ្ឋានសាធារណការ, អគ្គនាយកដ្ឋានប្រព័ន្ធចម្រោះទឹកកខ្វក់, នាយកដ្ឋានគ្រឿងចក្រ និងស្ថាបនា, នាយកដ្ឋានជួសជុលនិងថែទាំថ្នល់ និង ខេត្តសៀមរាប៕