ឯកឧត្តម ហ៊ុនម៉ានី ៖ ការតាក់តែងច្បាប់ថវិកា ឆ្នាំ២០២១ បង្ហាញយ៉ាងច្បាស់ពីភាពមុតស្រួច និងមិនប្រែប្រួលរបស់រាជរដ្ឋាភិបាលកម្ពុជា នៅជាប់ជាមួយប្រជាជនគ្រប់កាលៈទេសៈ និងការដាក់ប្រយោជន៍ប្រជាជនជាចម្បង នៅថ្ងៃទី២៥ ខែវិច្ឆិកា ឆ្នាំ២០២០ ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា និងជាប្រធាន សហភាពសហព័ន្ធយុវជនកម្ពុជា បានអញ្ជើញចូលរួមកិច្ចប្រជុំពិភាក្សា ការតាក់តែងសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២១ ក្រោមអធិបតីភាពដឹកនាំកិច្ចប្រជុំដ៏ខ្ពង់ខ្ពស់របស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា នាឱកាសនោះ ឯកឧត្តម ហ៊ុន ម៉ានី បានចូលរួមលើកឡើងថា ភាពមិនប្រែប្រួលរបស់រាជរដ្ឋាភិបាលកម្ពុជា គឺផ្តោតចម្បងលើការប្រយុទ្ធការពារអាយុជីវិតប្រជាជន ការរក្សាលំនឹងសង្គម-សេដ្ឋកិច្ច និងជីវភាពរបស់ប្រជាជន ព្រមទាំងការតម្រង់ធនធានឆ្ពោះទៅការស្តារ និងជំរុញកំណើនសេដ្ឋកិច្ចឡើងវិញ ក្រោយវិបិត្តិកូវីដ១៩។ ឯកឧត្តម ហ៊ុន ម៉ានី ចាត់ទុកថា ការតាក់តែងសេចក្តីព្រាងច្បាប់នេះ បង្ហាញយ៉ាងច្បាស់ពីភាពមុតស្រួច ការខិតខំរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការបន្តស្ថិតនៅជាប់ជាមួយប្រជាជនគ្រប់ពេលវេលា ទោះក្នុងកាលៈទេសៈណាក៏ដោយ និងការដាក់ផលប្រយោជន៍ប្រជាជនជាចម្បង ជាពិសេសក្នុងបរិបទ ដែលកម្ពុជាកំពុងជួបការលំបាកដោយវិបត្តិកូវីដ១៩ ក៏ដូចជាកម្ពុជាបានជួបផលប៉ះពាល់រងគ្រោះដោយសារគ្រោះធម្មជាតិនៃជំនន់ទឹកភ្លៀងកាលពីពេលថ្មីៗនេះក្តី។ ប្រភព៖ Hun Many Facebook Page Link ៖ https://www.facebook.com/HunManyCambodia/posts/3527982877296440