ភ្នំពេញ៖ នាព្រឹកថ្ងៃសុក្រ ៧កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៣ ខែតុលា ឆ្នាំ២០២០ ឯកឧត្ដម ប៉េង ពោធិ៍នា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយ ស្តីពី “សវនកម្មផ្ទៃក្នុងតាមប្រព័ន្ធបច្ចេកវិទ្យាព័ត៌មាន” ដល់អង្គភាពក្រោមឱវាទក្រសួងសាធារណការ និងដឹកជញ្ជូន។ សិក្ខាសាលានេះ ត្រូវបានរៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងគោល បំណងបណ្តុះបណ្តាល និងពង្រឹងសមត្ថភាពបន្ថែមលើការធ្វើសវនកម្មផ្ទៃក្នុងតាមប្រព័ន្ធបច្ចេកវិទ្យាព័ត៌មាន ដល់អង្គភាពក្រោមឱវាទក្រសួង ដើម្បីបង្ការផលប៉ះពាល់នៃបច្ចេកវិទ្យាព័ត៌មានលើសវនកម្ម ការគ្រប់គ្រងធនធានសវនកម្មបច្ចេកវិទ្យាព័ត៌មាន ស្តង់ដារសវនកម្មប្រព័ន្ធបច្ចេកវិទ្យាព័ត៌មាន ការត្រួតពិនិត្យ និងវាយតម្លៃជាផ្លូវការលើហេដ្ឋារចនាសម្ព័ន្ធបច្ចេកវិទ្យាព័ត៌មាន ប្រព័ន្ធព័ត៌មានគោលនយោបាយ និងប្រតិបត្តិការរបស់ស្ថាប័ន អនុលោមតាមច្បាប់ បទប្បញ្ញតិ្ត និងគោលការណ៍ណែនាំ សម្រេចតាមគោលដៅរបស់អង្គភាពប្រកបដោយប្រសិទ្ធភាព និងស័ក្តិសិទ្ធិភាព ការពារនូវហានិភ័យបច្ចេកវិទ្យាព័ត៌មានថ្មីៗ ដែលកើតមានឡើង ដើម្បីពង្រឹកការគ្រប់គ្រង និងពង្រឹងសន្តិសុខ សំដៅសម្រេចឱ្យបាននូវផែនការ និងគោលនយោបាយរបស់ក្រសួង និងរាជរដ្ឋាភិបាល ប្រកបដោយប្រសិទ្ធភាព គុណភាព និងទាន់ពេលវេលា។ ថ្លែងនៅក្នុងកម្មវិធីបើកសិក្ខាសាលា ឯកឧត្ដមរដ្ឋលេខាធិការ បានមានប្រសាសន៍ថា៖ ការរៀបចំសិក្ខាសាលាស្តីពី សវនកម្មផ្ទៃក្នុងតាមប្រព័ន្ធបច្ចេកវិទ្យាព័ត៌មាននេះ នឹងលើកកម្ពស់គុណភាព ប្រសិទ្ធភាព និងសក្ក័សិទ្ធិភាព ដល់អង្គសិក្ខាកាមស្របតាមបរិបទនៃការធ្វើកំណែទម្រង់ហិរញ្ញវត្ថុសាធារណៈ ដំណាក់កាលទី៣ ការផ្សារភ្ជាប់ថវិកាទៅនឹងគោលនយោបាយ ដែលបាននិងកំពុងដាក់ឱ្យអនុវត្តនៅតាមក្រសួង ស្ថាប័ន និងអង្គភាពសាធារណៈរបស់រាជរដ្ឋាភិបាល។ ទន្ទឹមនឹងនេះដែរ សិក្ខាសាលាផ្សព្វផ្សាយ នៅថ្ងៃនេះក៏រួមចំណែកដ៏សំខាន់ ដើម្បីត្រៀមខ្លួនក្នុងការអភិវឌ្ឍ ការធ្វើកំណែទម្រង់គ្រប់គ្រងហិរញ្ញវត្ថុសាធារណៈ ដំណាក់កាលទី៤ ដែលត្រូវដាក់ឲ្យអនុវត្តនាពេលខ្លីខាងមុខនេះផងដែរ។ ឯកឧត្ដមរដ្ឋលេខាធិការ បានបន្តទៀតថា៖ ដោយសារតែប្រទេសកម្ពុជាមានសុខសន្តិភាព ស្ថិរភាពនយោបាយ និងសុខសន្តិភាពពេញលេញ ជាកត្តាដែលជំរុញឲ្យអ្នកវិនិយោគជាតិ និងអន្តរជាតិជាច្រើន បានចូលមកដាក់ទុនវិនិយោគនៅកម្ពុជា ធ្វើឲ្យសេដ្ឋកិច្ចជាតិមានការរីកចម្រើនលូតលាស់ គួរឲ្យកត់សម្គាល់។ ជាការឆ្លើយតបនឹងការកើនឡើងនៃសេដ្ឋកិច្ចនេះ រាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវគោលនយោបាយជាច្រើន ដើម្បីធានាឱ្យបាននូវប្រសិទ្ធភាពក្នុងការគ្រប់គ្រងហិរញ្ញវត្ថុសាធារណៈ ជាក់ស្ដែងការដាក់ឱ្យដំណើរការនូវប្រព័ន្ធព័ត៌មានហិរញ្ញវត្ថុ នៅតាមក្រសួង ស្ថាប័ន និងអង្គភាពសាធារណៈរបស់រាជរដ្ឋាភិបាល ធានាបាននូវប្រសិទ្ធភាព និងសក្កិសិទ្ធភាពនៃការគ្រប់គ្រងហិរញ្ញវត្ថុសាធារណៈ ស្របតាមភារូបនីយកម្មការគ្រប់គ្រងហិរញ្ញវត្ថុតាមប្រព័ន្ធបច្ចេកវិទ្យាព័ត៌មាន។ ដោយសង្កេតឃើញពីការវិវត្តន៍យ៉ាងឆាប់រហ័សបច្ចេកវិទ្យាព័ត៌មាន រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ បានខិតខំយកចិត្តទុកដាក់រៀបចំជាបទដ្ឋាបទដ្ឋានគតិយុត្តផ្សេងៗ ដើម្បីគាំទ្រដល់ការអនុវត្តមុខងារប្រព័ន្ធគ្រប់គ្រងព័ត៌មានហិរញ្ញវត្ថុ ដែលបាននឹងកំពុងអនុវត្តកន្លងមក។ ឯកឧត្ដមរដ្ឋលេខាធិការបានគូសបញ្ជាក់ថា ក្រសួងសាធារណការ និងដឹកជញ្ជូន បានខិតខំសិក្សាស្វែងយល់ ពីនីតិវិធីសវនកម្មផ្ទៃក្នុងតាមប្រព័ន្ធបច្ចេកវិទ្យាព័ត៌មាន ដើម្បីយកទៅអនុវត្តឲ្យមានប្រសិទ្ធភាព រួមចំណែកគាំទ្រដល់គោលនយោបាយរបស់រាជរដ្ឋាភិបាល និងជំរុញសេដ្ឋកិច្ចជាតិឲ្យមានការរីកចម្រើនលូតលាស់ ប្រកបដោយចីរភាព។ កន្លងមកនេះការអនុវត្តសវនកម្មផ្ទៃក្នុង នៅក្នុងក្រសួងសាធារណការ និងដឹកជញ្ជូន បានទទួលនូវលទ្ធផលជាទីមោទនៈ ក៏ដោយសារមានគោលនយោបាយ និងការគាំទ្រពីសំណាក់រាជរដ្ឋាភិបាល ពិសេសឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក៏ដូចជាក្រសួងសេដ្ឋកិច្ច និងដៃគូអភិវឌ្ឍន៍នានា ដែលតែងតែជួយគាំទ្រទាំងថវិកា ស្មារតី និងជំនួយបច្ចេកទេស ក្នុងការអនុវត្តសវនកម្មផ្ទៃក្នុងតាមប្រព័ន្ធបច្ចេបវិទ្យាព័ត៌មាន ប្រកបដោយប្រសិទ្ធភាពខ្ពស់ ឆ្លៀតក្នុងឱកាសនោះ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅជូនចំពោះ អង្គសិក្ខាកាម គ្រូឧទេស ថ្នាក់ដឹកនាំ មន្ត្រី និងរាជរដ្ឋាភិបាលកម្ពុជា ជាពិសេស ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងគណៈកម្មការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួងសេដ្ឋកិច្ច និងហិរញ្ញវត្ថុ ដែលតែងតែសម្របសម្រួលការរៀបចំវគ្គបណ្ដុះបណ្ដាល និងសិក្ខាសាលាប្រកបដោយជោគជ័យ។ ឯកឧត្តមរដ្ឋលេខាធិការ បានកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ និងមន្ត្រីសវនកម្មផ្ទៃក្នុងទាំងអស់ ដែលបានខិតខំបំពេញតួនាទីភារកិច្ចរបស់ខ្លួន និងសូមលើកទឹកចិត្តឱ្យពុះពាររាល់ឧបសគ្គនានា និងសម្រេចឱ្យបានប្រសិទ្ធផលការងារតាមទិសដៅផែនការសកម្មភាពដែលបានគ្រោងទុក ។ ឯកឧត្ដមរដ្ឋលេខាធិការ បានសម្ដែងនូវក្ដីសង្ឃឹមយ៉ាងមុតមាំថា៖ សិក្ខាសាលាស្តីពី សវនកម្មផ្ទៃក្នុងតាមប្រព័ន្ធបច្ចេកវិទ្យាព័ត៌មាន នឹងជាចំណេះដឹង និងបទពិសោធន៍បន្ថែមទៀតក្នុងការបំពេញបន្ថែមនូវចំណុចខ្វះខាតដែលកើតមានឡើង ជាពិសេសវានឹង ជំរុញឱ្យការរៀបចំផ្សព្វផ្សាយ ស្តីពី សវនកម្មផ្ទៃក្នុងតាមប្រព័ន្ធបច្ចេកវិទ្យាព័ត៌មានដល់អង្គភាពក្រោមឱវាទក្រសួងសាធារណការ និងដឹកជញ្ជូន កាន់តែមានប្រសិទ្ធភាពខ្ពស់ថែមទៀត៕