ភ្នំពេញ៖ ថ្ងៃព្រហស្បតិ៍ ៦កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែតុលា ឆ្នាំ២០២០ នៅទីស្ដីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការ បានអញ្ជើញដឹកនាំកិច្ចប្រជុំពិភាក្សាបន្តលើសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ ដោយមានការអញ្ជើញចូលរួមពីថ្នាក់ដឹកនាំ មន្ត្រីជំនាញ និងក្រុមការងារបច្ចេកទេសពាក់ព័ន្ធជាច្រើនរូប។ កិច្ចប្រជុំនេះធ្វើឡើងដើម្បីពិភាក្សាបន្តលើសេចក្តីព្រាងច្បាប់ស្ដីពីទឹកកខ្វក់ និងប្រព័ន្ធលូ ក្នុងមាត្រា ១៥ (១២ថ្មី) ដែលការពិភាក្សានេះផ្ដោតលើការប្រើប្រាស់ពាក្យពេចន៍ ឃ្លា ប្រយោគ និងការកំណត់និយមន័យឱ្យបានច្បាស់លាស់ ជាក់លាក់ ស៊ីជម្រៅ និងគ្រប់ជ្រុងជ្រោយក្នុងបរិបទនៃការគ្រប់គ្រងទឹកកខ្វក់ និងប្រព័ន្ធលូ សំដៅជៀសវាងការបកស្រាយផ្សេងផ្ទុយពីខ្លឹមសារនៃច្បាប់។ ឯកឧត្ដមអនុរដ្ឋលេខាធិការបានឱ្យដឹងថា អង្គប្រជុំបានជជែកគ្នា និងឯកភាពសម្រេចកែសម្រួលខ្លឹមសារនិងអត្ថន័យមួយចំនួននៃមាត្រា១៥(១២ថ្មី)នេះ ដើម្បីឱ្យមានខ្លឹមសារជាគតិយុត្តគ្រប់គ្រាន់ និងមានវិសាលភាពគ្របដណ្ដប់គ្រប់ជ្រុងជ្រោយក្នុងក្របខណ្ឌគ្រប់គ្រងទឹកកខ្វក់ និងប្រព័ន្ធលូក្នុងព្រះរាជាណាចក្រកម្ពុជា។ ឯកឧត្តមរដ្ឋលេខាធិការបានជំរុញឱ្យក្រុមការងារបច្ចេកទេសខិតខំពន្លឿន សេចក្ដីព្រាងច្បាប់នេះមានសន្ទុះទៅមុខកាន់តែលឿន និងបន្តវប្បធម៌សាមគ្គីសហការ ពិនិត្យខ្លឹមសារតាមមាត្រានីមួយៗឱ្យបានល្អិតល្អន់មុនកិច្ចប្រជុំមកដល់ ដោយគូសសម្គាល់ចំណុចទាំងឡាយណាដែលយល់ថាមិនទាន់មានខ្លឹមសារច្បាស់លាស់ ទុកពិភាក្សាក្នុងកិច្ចប្រជុំ ដែលត្រូវធ្វើឡើងជារៀងរាល់សប្ដាហ៍។ ឯកឧត្ដមអនុរដ្ឋលេខាធិការបាន ស្នើឱ្យក្រុមការងារជំនាញពិនិត្យលើការប្រើប្រាស់ពាក្យពេចន៍ ឃ្លាប្រយោគឱ្យបានល្អិតល្អន់និងស៊ីជម្រៅ ព្រមទាំងខិតខំប្រមូលឯកសារគតិយុត្តពាក់ព័ន្ធទាំងឡាយនៅក្នុងព្រះរាជាណាចក្រកម្ពុជា ក៏ដូចជាសិក្សាគំរូច្បាប់របស់ប្រទេសនានា ដើម្បីជាមូលដ្ឋានគ្រឹះ ក្នុងការរៀបចំសេចក្ដីព្រាងច្បាប់នេះឱ្យមានខ្លឹមសារនិងវិសាលភាពគ្រប់ជ្រុងជ្រោយតាមកម្មវត្ថុនៃច្បាប់៕